މަސައްކަތްތެރިންގެ ހައްޤުތައް: ލެޓަރ އޮފް އެޕޮއިންޓްމަންޓް

އައު ވަޒީފާއަކަށް ނިކުންނައިރު ވަޒީފާއާއި ބެހޭ މައުލޫމާތުތައް މުވައްޒަފަށް ފޯރުކޮށްދިނުމަކީ ވަޒީފާދޭ ކުންފުންޏަކުން ކޮންމެހެންވެސް ކުރަންޖެހޭކަމެކެވެ. ވަޒީފާއަށް ނިކުންނައިރު މުވައްޒަފަށް ކުންފުނީގެ ކަންކަން ރަނގަޅަށް އިނގިފައި އޮންނަންޖެހެއެވެ.

ވަޒީފާ ލިބިގެން ކުންފުނިތަކުން މުވައްޒަފަށް ފޮނުވާ ސިޓީގައި ބައެއް ޚާއްސަ މައުލޫމާތުތައް ހިމަނަންޖެހެއެވެ. މި ސިޓީއަކީ ފޯމަލް ސިޓީއަކަށް ވާންޖެހޭނެއެވެ. ވަޒީފާ ލިބިގެން ފޮނުވާ މި ސިޓީގައި ކޮންމެހެން ހިމަނަންޖެހޭ މައުލޫމާތުތަކެއް ހުރެއެވެ. އެގޮތުން ވަޒީފާގެ މާހައުލާއި ވަޒީފާއާއިބެހޭ ކުރު ތައާރަފެއް ދޭންޖެހެއެވެ. އަދި އެ ވަޒީފާގެ މުސާރައާއި، މަސައްކަތްކުރަންޖެހޭ ވަގުތާއި، މަސައްކަތްކުރަންޖެހޭ ތަން ސާފުކޮށް ވަޒީފާ ލިބުނުކަމުގެ ސިޓީގައި ހިމަނަންޖެހެއެވެ.

ނަމަވެސް މިހާރަކަށްއައިސް ބައެއް މުވައްޒަފުން ވަޒީފާއަށް ނިކުންނައިރު މި މައުލޫމާތުތައް ކުންފުނިން ފޯރުނުކޮށްދޭކަން ފާހަގަކޮށްލެވެއެވެ. ނަތީޖާއެއްގެ ގޮތުން ވަޒީފާއަށް ނިކުތުމަށްފަހު ކަންތައް ކުރަންވީގޮތް މުވައްޒަފަށް ރަނގަޅަށް ނޭންގެއެވެ. ނަމަވެސް ބައެއް ކުންފުނިތަކުން ވަރަށް ރަނގަޅަށް މިކަމަށް އަމަލުކުރަމުންވެސް ދެއެވެ.