ލާމަރުކަޒީ ކުރަންވީ މިހިންވެ؟

 ރާއްޖޭގެ ރަށްތައް އޮތް ހާލަތާއި ރަށްތަކަށް އެކަށީގެންވާ ތަރައްގީއެއް ނާންނަކަމުގެ ޝަކުވާއަކީ ރައްޔިތުންގެ ނިމުމެއް ނެތް ޝަކުވާއެކެއެވެ. ރައްޔިތުން އަބަދުމެ ކޮންމެ ސަރުކާރަކާއި އެކު އުއްމީދުކުރަމުން އަންނަނީވެސް ރަށްތަކައް ބޭނުންވާ އުމްރާނީ ތަރައްގީ އާއި އެހެނިހެން ވަސީލަތްތައް އެ ރަށްތަކައް ފޯރުކޮށްދިނުމެވެ. ކޮންމެ ސަރުކާރެއް ވެރިކަމަށް އަންނައިރުވެސް ރައްޔިތުން ކާރީ އެންމެ ގިނައިންވާ އެއް ވައުދަކަށްވެފައި އޮންނަނީ ރައްޔިތުން މި އެދޭ އެދުން ފުއްދައިދޭނެ ކަމުގެ ވައުދެއެވެ. ހުރިހާ ކަމަކަށް ވެރިރަށް މާލެއަށް އަންނަންޖެހޭ ޖެހުމަށް ނިމުމެއް ގެނެސް،  ރައްތައް ތަރައްގީކޮށްދޭނެ ކަމުގެ ވައުދެވެ.

މި ސަރުކާރަކީ އެންމެ ބޮޑަށް ރައްޔިތުންނަށް ލާ މަރުކަޒީ ނިޒާމަކުން ރާއްޖޭގެ ރަށްތަށް ހިންގުމުގެ މުހިއްމުކަމުގެ މައްޗަށް އެންމެ ބޮޑަށް ވަކާލާތު ކުރެއްވި ބޭފުޅުން ތިއްބެވި ސަރުކާރެވެ. ވެރިކަން ކުރާ އެމްޑީޕީން އަބަދުވެސް ބުނަމުން އަންނަނީ މާލޭގެ ތޮއްޖެހުން ކުޑަވެ ރަށްތައް ތަރައްގީ ކުރެވިގެން އަންނާނީ ލާމަރުކަޒީކޮށް ރާއްޖޭގެ ރަށްތައް ހިންގައިގެން ކަމަށެވެ. އެ ރަށެއްގެ ރައްޔިތުންނަށް ނިންމުންތައް ނިންމުމުގެ ބާރުދީގެން ކަމަށެވެ.މި ސަރުކާރުން މި ކަމަށް ގިނަ ބަދަލުތަކެއް ގެނައިކަން ފާހަގަކޮށްލެވެއެވެ. އެގޮތުން ނިމިދިޔަ ރައީސް ޔާމީންގެ ސަރުކާރުން ލާމަރުކަޒީ ގާނޫނަށް ގެނައި ބޮޑެތި ބަދަލުތައް އަބުރާ އިއާދަކުރިއެވެ. އެގޮތުން ލާމަރުކަޒީ ގާނޫނަށް ބަދަލު ގެނެސް ކައުންސިލްތަކަށް ބާރުތައް ދޫކޮށްލިއެވެ. އެ ރަށެއްގެ ތަރައްގީއަށް ނިންމަންޖެހޭ ނިންމުންތައް ނިންމުމާއި، އަދި ވަކި މިންވަރެއްގެ ތަރައްގީގެ ޕްރޮޖެކްޓްތައް ހިންގުމުގެ ބާރު ކައުންސިލައް ލިބިދޭ ފަދަ ގޮތަކަށް ގާނޫނު ވަނީ ބަދަލުކޮށްފައެވެ.

advertisement

ނަމަވެސް އުފެދޭ ސުވާލަކީ ލާމަރުކަޒީ ގާނޫނަށް މި ގެނެވުނު ބަދަލާއެކު ރަށްތަކަށް އެކަށީގެންވާ ތަރައްގީ އަންނަމުންދޭތޯއެވެ. ހަގީގީ ލާމަރުކަޒީ ނިޒާމުގެ މަންފާ ރައްޔިތުންނަށް ލިބެމުން އާދޭތޯއެވެ. ސޯޝަލް މީޑިޔާގައި ގިނައިން ދައުރުވަމުން އަންނަ ރައްޔިތުންގެ ކަންބޮޑުވުމުގެ ކަންތަކަށް ބަލާއިރު، ފެންނަމުން އަންނަނީ އަދިވެސް ރައްޔިތުން އެދޭ ހެޔޮ ބަދަލު އެކަށީގެންވާ މިންވަރަށް އަދިވެސް އައިސްފައިނުވާ ކަމުގެ ޝަކުވާއެވެ.ދާދި އިހަކަށް ދުވަހުވެސް ސޯޝަލް މީޑިޔާގައި ދައުރުވަމުން އައި ހަބަރަކަށް ބަލާއިރު ފެނިގެން ދިޔައީ ރަށެއްގެ އެމްބިއުލާންސް މަސައްކަތް ނުކުރާ ވާހަކައެވެ. އެމްބިއުލާންސް އޮވެމެ މަސައްކަތް ނުކުރުމާއި، އެމްބިއުލާންސެއް ނެތިގެން ރައްޔިތުން ޕިކަޕްގައި ނުވަތަ އަށީގައިވެސް އުފުލާ މަންޒަރުވަނީ ފެނިގެން ގޮސްފައެވެ. މިފަދަ ހިދްމަތްތަކަކީ އަސާސީ މުހިއްމު ހިދްމަތްތަކެވެ. ރަނގަޅު ބޯފެނާއި، ނަރުދަމާ،  ރަނގަޅު ސިއްހީ ނިޒާމަކާއި، މަތީ ތައުލީމް އާއި، ވަޒީފާގެ ފުރުސަތުތައް ރަށްރަށުން ލިބެން އެބަޖެހެއެވެ. މާލޭގެ ތޮއްޖެހުން ކުޑަކުރެވެން އޮތީ މިފަދަ ތަރައްގީ ރަށްތަކަށް ގެނެވިގެންނެއެވެ.މާލޭގައި ދިރިއުޅެމުން އަންނަ ރައްޔިތުންގެ ޝަކުވާއަކަށްވެފައި އޮންނަނީ އެ ބަޔަކު ދިރިއުޅެމުން އަންނަ ރަށްރަށުން މި ފަދަ ހިދްމަތްތައް ލިބެން ނުހުންނާތީ މަޖްބޫރުވެގެން މާލޭގައި އުޅޭ ކަމަށެވެ.

މާލޭގައި އޮތް ތޮއްޖެހުން ނިމުމަކަށް އިހްލާސްތެރިކަމާއި އެކު ބަޔަކު ބޭނުންނަމަ، އެކަން ކުރެވެން އޮތީ މާލޭގައި ހުރި ބައެއް ހިދްމަތްތައް ރަށްތަކަށް ބަދަލުކޮށްގެންނެވެ. ރާއްޖޭގައި ހިންގާ ކޮންމެ އުމްރާނީ ތަރައްގީގެ މަޝްރޫއެއް ކޮންމެހެން ވެރިރަށް މާލޭގައި ހިންގަން އިސްކަންދޭ އިސްކަންދިނުމަށް ބަދަލުގެންނަން އެބަޖެހެއެވެ. އެގޮތުން އެމްޑަބްލިއުއެސްސީ، ފެނަކަ،އެމްޓީސީސީ، އެމްއެންޔޫ ފަދަ ތަންތަނުގެ މައި އޮފީސް ކޮންމެހެން ވެރިރަށް މާލޭގައި ހުރުން އެއީ ލާޒިމްކަމެއް ނޫނެއެވެ. ރާއްޖޭގެ އެކި އަތޮޅުތަކަށް ބަދަލު ކުރެވިދާނެއެވެ. އޭރުން ހަގީގީ ލާމަރުކަޒީ ނިޒާމުގެ މަންފާ ރަށްތަކަށް ލިބިގެންދާނެއެވެ.

ގާނޫނެއް ހަދާލުމަކުން ނުފުދެއެވެ. އެ ގާނޫނުގެ ހަގީގީ މަންފާ ރައްޔިތުންނަށް ލިބެމުން އާދޭތޯވެސް ބަލަންޖެހެއެވެ. ރައްޔިތުން އެދެނީ ހަގީގީ ލާމަރުކަޒީ ނިޒާމުގެ ފޮނިމީރުކަން ރައްޔިތުންނަށް ލިބިގެން ދިއުމެވެ.