އެހެންމީހުން ކުށްވެރިކުރުމުގެ ބަދަލުގައި ފަހި ވިސްނުން ދިރިއުޅުމަށް ގެންނާނީ ކިހިނެއް؟

 ބައެއް ފަހަރު ދިރިއުޅުން ދަނީ އަހަރެމެން އެންމެ ބޭނުންވާ ގޮތަކަށް ނޫނެއެވެ. ކޮންމެ މީހަކުވެސް ދިރިއުޅުމުގައި ލަނޑުދަނޑިތަކެއް ހާސިލްކުރުމަށް އަޒުމް ކަނޑައަޅައެވެ. ބައެއް ފަހަރު މި ލަނޑުދަނޑިތައް ހާސިލްނުވާ ފަހަރުވެސް އާދެއެވެ. އެ ހާސިލްނުވުން އެއީ އަދި ކަންބޮޑުވާންޖެހޭ މައްސަލައެއްވެސް ނޫނެއެވެ. ބައެއް ފަހަރު ދިރިއުޅުމުގައި ދިމާވާ މިފަދަ ކަންތަކުގައި ތިމާ އެކަމުގައި ނަގަންޖެހޭ ޒިންމާ ނެގުމުގެ ބަދަލުގައި އަނެކާ ކުށްވެރިކުރެވޭތަން އާދެއެވެ. މި ގޮތަށް ތިމާއަށް ކުރެވޭ ކަމަކަށް އަނެއް މީހާ ކުށްވެރިކޮށް ނުވަތަ “ބްލޭމް” ކުރުމުން ތިމާއަށް އޭގެއިން ކުރާނެ ފާއިދާއެއް ނެތެއެވެ.

މި ގޮތަށް ދިރިއުޅުމުގައި ދިމާވާ ކަންތަކުގައި، އެ ކަމުގެ ޒިންމާ އެހެން މީހުންގެ ބޮލުގައި އެޅުވޭނަމަ، އެކަން ބަދަލުކުރަން އެބަޖެހެއެވެ. ތިމާއަކީ ފަހި ވިސްނުން ނުވަތަ “ޕޮޒިޓިވް ތިންކިންގ” ގެ މީހަކަށް ވާން އެބަޖެހެއެވެ.  މި ގޮތަށް ތިމާގެ ވިސްނުން ބަދަލުކުރެވިއްޖެނަމަ  ތިމާއަކީ ދިރިއުޅުމުގައި ނުހަނު ކާމިޔާބު މީހަކަށް ވެވިދާނެއެވެ.

advertisement

 ވިސްނުން ފަހި ވިސްނުމަށް ނުވަތަ ” ޕޮޒިޓިވް ތިންކިންގ” ބަދަލުކުރުމަށް ކުރެވިދާނެ ކަންތައްތަކެއް:

 މައުލޫމާތު ހޯދައި ލިބިގަތުން

އެއްވެސް މީހަކީ ހުރިހާ ކަމަކާއި ބެހޭ ހުރިހާ މައުލޫމާތެއް އިގޭނެ މީހެއް ނޫނެއެވެ. އެހެންކަމުން ވީހާވެސް ގިނައިން އެކި އެކި މައުޝޫއުތަކާއި ގުޅޭ ފޮތްތައް ކިޔައި މައުލޫމާތުގެ ހަޒާނާ މުއްސަނދި ކުރާށެވެ.

ބުރަކޮށް މަސައްކަތް ކުރަން ފަށައިގަތުން

ކުރާ މަސައްކަތަކުން ތިމާއަށް ޕްރޮމޯޝަނެއް ނޫނީ އިތުރު ކުރިއެރުމެއް ނުލިބުނު ކަމުގައި ވިޔަސް އެހެންމީހުން ކުށްވެރިކުރުމުގެ ބަދަލުގައި ތިމާއަށް ގޯސްހެދުނު ހިސާބު ހޯދައި ބަލައި އެކަން ރަނގަޅު ކުރުމަށް އިތުރު ހިތްވަރަކާއި އެކު ބުރަކޮށް މަސައްކަތް ފަށައިގަންނާށެވެ.

ދިރިއުޅުމަށް ފާއިދާކުރާނެ ކަމެއް ހޯދައި ހުސްވަގުތުގައި ކުރުން

ހުސްވަގުތު ކުރާނެ ރަނގަޅު މަސައްކަތެއް ހޯދައި ފަށައިގެންފި ކަމުގައި ވާނަމަ، ފޫހިވެގެން ޝަކުވާ ކުރުމުގެ ބަދަލުގައި އެކަމެއްގައި މަޝްއޫލުވެގަތުމުން ދިރިއުޅުމަށް ފަހި ވިސްނުން ގެނެވޭނެއެވެ.

ކުށްކުރެވިދާނެ ކަމަށް ބިރު ނުގަތުން

ގިނަ ފަހަރަށް މީހުން ބްލޭމް ކުރެވޭ މީހުންނަށް އެކަން ކުރެވެނީ ތިމާ ކުރަން އުޅޭ ކަމެއްގައި ނާކާމިޔާބީ އާއި ކުރިމަތިލާން ޖެހުމުންނެވެ. ދިރިއުޅުމުގައި ނާކާމިޔާބީ އާއިވެސް ކުރިމަތިލާންޖެހޭނެކަމަށް ދެކޭށެވެ. ނާކާމިޔާބީގައި އެއްވެސް މީހަކު ކުށްވެރިކުރުމުގެ ބަދަލުގައި، އެކަން ދިމާވި ގޮތް ހޯދައި ބަލައި، އެއީ ލިބުނު ފިލާވަޅެއް ކަމުގައި ދެކޭށެވެ.