ގެވެށި އަނިޔާ ލިބޭ ފިރިހެނަކަށް އެހީވާނީ ކިހިނެއް؟

އަބަދުވެސް އަހަރެމެންނަށް ހީވެފައި އޮންނަނީ ކައިވެންޏަށް ފަހުގައި ބައިވެރިޔާގެ ފަރާތުން އަނިޔާ ލިބެނީ ހަމައެކަނި އަންހެނުންނަށްކަމަށެވެ. އެއީ އަބަދުވެސް ހައްޤުތަކުގެ ވާހަކަދެކެވޭއިރު ދެއްކެނީ އަންހެނުންގެ ހައްޤުތަކާއި އަންހެނުންނަށް ލިބޭ އަނިޔާގެ ވާހަކައެވެ. ނަމަވެސް ކައިވެންޏަށް ފަހުގައިވެސް ބައިވެރިޔާގެ ފަރާތުން ފިރެހެނުންނަށް ލިބޭ އަނިޔާތައްވެސް ގިނައެވެ. އެމެރިކާގައި ހެދި ދިރާސާއަކުން ދައްކާގޮތުގައި ކޮންމެ 4 ފިރެހެނަކުން އެކަކީ ބައިވެރިޔާގެ ފަރާތުން ކޮންމެވެސް ކަހަލަ އަނިޔާއަކާއި ކުރިމަތިލާން ޖެހިފައިވާ މީހެކެވެ.

ރާއްޖޭގައި މިފަދަ ދިރާސާއެއްގައި ބައިވެރިވާނީ ކިތަށް ފިރިހެނުންތޯއެވެ؟

advertisement

ގެވެށި އަނިޔާގެ ޝިކާރައަށް ފިރިހެނުން އެފަދަ ވާހަކަ ދައްކަންވެސް ޖެހިލުންވެ އެވެ. ފިރިހެނުން މިފަދަ ވާހަކަ ދައްކަން ބާރުވެރިކޮށް، އެމީހުންނަށް ޕްރޮފެޝަނަލް އެހީތެރިކަން ހޯދުމަށް އަހަރުމެން ބާރު އަޅުވަން ޖެހެއެވެ.

އަންހެނުންނާއި ހިލާފަށް ފިރެހެނުންނަށް ބައިވެރިޔާގެ ކިބައިން އަނިޔާ ލިބޭނަމަ އެކަމުގެ ސަބަބުން ކުރާ އަސަރު ބޮޑެވެ. އޭގެތެރޭގައި އެންޒައިޓީއަށް ދިއުމާއި، އަމިއްލަ ނަފްސާއިމެދު އޮންނަ އިތުބާރު ގެއްލުމާއި، އަނިޔާއަށް ދުރުވާން މަސައްކަތް ކުރަން ފަސްޖެހެއެވެ. މީގެ ސަބަބުން ގެއިން ނިކުމެ އުޅެން ބިރުގަތުމާއި، އަނިޔާގެ ވާހަކަ އެހެން މީހެއް ކައިރީގައި ބުނަން ނުވަތަ އެހީއަށް އެދެން ފަސްޖެހުން ހިމެނެއެވެ.

ނަމަވެސް އަނިޔާ ލިބޭ އަންހެނުންގެ ވާހަކަ ދައްކާހެން ފިރެހެނުންނަށް ލިބޭ އަނިޔާގެ ވާހަކަވެސް ދައްކަންޖެހެއެވެ. އަދި އަންހެނުންނަށް އެހީތެރިކަން ފޯރުކޮށްދޭހެން ފިރެހެނުންނަށްވެސް އެހީތެރިކަން ފޯރުކޮށްދޭންޖެހެއެވެ.

އަންހެނަކަށް އަނިޔާ ލިބޭނަމަ ފުލުހުން އެކަން ބަލައި އަނިޔާކުރި ފިރެހެން މީހާއަށް އަދަބު ދެއެވެ. ނަމަވެސް ފިރެހެނަކަށް އަނިޔާ ލިބުނު ނަމަވެސް މިކަން މިގޮތައް ހިނގާތަނެއް ނުފެނެއެވެ.

އަނިޔާ ލިބޭ އަންހެނުންނަށް ބޯހިޔާވަހިކަން ފޯރުކޮށްދޭހެން އަނިޔާ ލިބޭ ފިރެހެނުންނަށްވެސް ހަމަ މިފަދަ ގޮތައް ބޯހިޔާވަހިކަން ފޯރުކޮށްދޭންޖެހެއެވެ.

މިހުރިހައި ކަމެއްގެ އިތުރުން އަނިޔާ ލިބޭނަމަ އަންހެނުންނެކޭ އެއްފަދައިން ފިރެހެނުންވެސް ޕްރޮފެޝަނަލް އެހީތެރިކަން ބޭނުންވާނަމަ އެ އެހީތެރިކަން ހޯދުމަކީ ވަރަށް މުހިންމު ކަމެކެވެ. އިނގެންޖެހޭ ކަމަކީ ޕްރޮފެޝަނަލް އެހީތެރިކަން ހޯދާ ފިރެހެނުންނަކީ އެއްވެސް ހާލަތެއްގައި ފިރެހެންވަންތަކަށް ކުޑަ ބައެއް ނޫންކަމެވެ.