ބަލިމަޑުކަމެއްގެ ތެރޭގައި އުޅޭއިރު، ފިނިކުރި ތަކެތި އުފުލުމުގައި އިހްމާލު؟

ކާބޯތަކެތި އުފުލަންޖެހޭ ގޮތްނޫން އެހެން ގޮތްގޮތައް ނުވަތަ ސިއްހަތައް ގެއްލުންލިބޭ ގޮތްތަކަށް އުފުލުމުގެ ކަންބޮޑުވުން މިހާރަކަށް އައިސް ސޯޝަލް މީޑިއާގައި ދަނީ މީހުން ފާޅުކުރަމުންނެވެ. އެގޮތުން ބާޒާރު ސަރަހައްދުގައި ފިނިކުރި ކުކުޅު ކޭހެއް ބިންމަތީގައި ބަހައްޓާފައި ހުރި ފޮޓޯއެއް ޓުވީޓްކޮށްފައި ބުނެފައިވަނީ ފިނިކުރި ތަކެތި އުފުލުގައި ގެންގުޅޭ އުސޫލްތަކުގެ ސަބަބުން ކަންބޮޑުވާކަމަށެވެ. މީގެ ސަބަބުން މީހުންނަށް އެކިކަހަލަ ބަލިތައް ޖެހޭކަމުގެ ކަންބޮޑުވުން އޭނާ ވަނީ ފާޅުކޮށްފައެވެ.

މި ޓްވީޓަށް ރައްދުދީ އެހެންމީހުންވެސް ވަނީ ފިނިކުރި ތަކެތި އުފުލުގައި ތަންތަނުން ގެންގުޅޭ އުސޫލަށް ކަންބޮޑުވުން ފާޅުކޮށްފައެވެ. އެހެން މީހަކު ބުނެފައިވަނީ ފިހާރަތަކުގައި ވިއްކާ މަހަށް ބަލާލިނަމަވެސް ފެންނަނީ މިފަދަ މަންޒަރެއްކަމަށެވެ. އެގޮތުން އެ ފިހާރައަށް ގެންދަނީ ހުޅުމާލޭ ޖެޓީ މަތީގައި އަވީލާފައި، މާލެ ގެނެސް ޓީޖެޓީގައި އަވީލާފައި، އެ ޕިކަޕަކަށް އަރުވައިގެން ފިހާރައަށްކަމަށެވެ. މޯލްޑިވްސް ފުޑް އެންޑް ޑްރަގް އޮޓޯރިޓީއަކީ ނަމެއްގައި ހުންނަ ތަނެއްކަމަށާއި، އިސްނަގައިގެން ކަމެއްކުރާ ބައެއް ނޫޅޭކަމަށް ވަނީ ބުނެފައެވެ.

އެހެންމީހަކު  ބުނެފައިވަނީ އެއްވެސް ފިނިކުރުމުގެ ނިޒާމެއްނެތި ރެފްރިޖްރޭޓަރަކަށްވެސް ނުލައި، ބީފް ޝިޕްމަންޓެއް ލޮރީއަކަށް އަރުވައިގެން ގެންދާ މަންޒަރު ފެނިފައިވާކަމަށެވެ. އަދި އެއް ލޮރީ އަންލޯޑް ކުރަންދެން އެ ޝިޕްމަންޓް އެއްވެސް ފިނިކުރާ ނިޒާމެއް ނެތި ހާމައަށް ހުންނަކަމަށް އޭނާ ވަނީ ބުނެފައެވެ.