ރަހުމަތްތެރިކަމަށް ބުރޫއަރާފާނެ ކަންކަން ހުރޭ

ރަނގަޅު ރަހުމަތްތެރިއަކު ލިބުމަކީ ވަރަށް ބޮޑު ނަސީބެކެވެ. ރަނގަޅު ރަހުމަތްތެރިއަކު ލިބުން ނަމަވެސް ރަހުމަތްތެރިކަން ދެމެހެއްޓުމަކީ ވަރަށް އުނދަގޫ ކަމެކެވެ. ރަހުމަތްތެރިކަން ދެމެހެއްޓުމަށްޓަކައި ގިނަ ކަންތައްތަކެއް ކުރަންޖެހެއެވެ. ރަހުމަތްތެރިކަން ދެމެހެއްޓޭނީ 2 ފަރާތުގެވެސް އެއްބާރުލުމާއި އެކުގައެވެ.

ރަހުމަތްތެރިކަން ކިތަންމެ ވަރުގަދަވީނަމަވެސް ބައެއް ކަންތައްތަކުގެ ސަބަބުން އެ ގުޅުމަށްވެސް އަސަރުކޮށްފާނެއެވެ. އޭގެތެރޭގައި:

advertisement

• މާގިނައިން ވާހަކަދެއްކުން

ރަހުމަތްތެރިކަން ދެމެހެއްޓުމަށް ވާހަކަދެއްކުމަކީ އޮންނަ ކަމެކެވެ. ނަމަވެސް ކޮންމެ ކަމެއްވެސް އޮންނަ މިންގަނޑު ފަހަނަ އަޅައިދިއުމުން ރަހުމަތްތެރިކަމަށްވެސް އަސަރުކުރެއެވެ. އެގޮތުން މާގިނައިން ގެއަށް ޒިޔާރަތްކޮށް، ގުޅައި، މެސެޖްކޮށް، ސޯސަލް މީޑިއާއާއި، އީމެއިލް، ވީޑިއޯ ޗެޓް އިން ވާހަކަދައްކަން ބޭނުންވުން ނުވަތަ ވާހަކަ ދައްކަން އުޅުމަކީ ރަހުމަތްތެރިކަމަށް ބުރޫ އަރާފާނެ ކަމެކެވެ.

ކިތަންމެ ރަނަގަޅު ރަހުމަތްތެރިއެއްނަމަވެސް އަދި ކިތަންމެ ވަރުގަފަ ގުޅުމެއްގައި ވިއަސް ޕާސަނަލް ސްޕޭސް ބޭނުންވާނެއެވެ. މި ސްޕޭސް ނުލިބޭނަމަ އެ ގުޅުމަށް ބުރޫއަރާފާނެއެވެ.  އެހެންކަމުން ކިތަންމެ ގާތްވިނަމަވެސް ވާހަކަދެއްކުމުގައި މިންގަނޑު ކަނޑައަޅައި ފަހަނައަޅައި ނުދާށެވެ.

މާގިނައިން ވާހަކަދެއްކުމުން ރަހުމަތްތެރިކަމަށް ބުރޫއަރާހެން މާމަދުން ވާހަކަދެއްކުމަކީވެސް އޭގެ ސަބަބުން ރަހުމަތްތެރިކަމަށް ބުރޫއަރާ ކަމެކެވެ. ދިރިއުޅުމުގެ ކަންކަން ބައްޓަންވެފައި ހުންނަގޮތުން ވަޒީފާއާއި އާއިލީ ކަންކަމާއި އަމިއްލަ ކަންކަމަށް ވަގުތު ދިނުމަށްފަހު ގިނަފަހަރު ރަހުމަތްތެރިންނަށް ވަގުތު ނުދެވޭ ފަހަރު އާދެއެވެ. މިއީވެސް ގުޅުމަށް އަސަރުކުރާކަމެކެވެ.

• ރަހުމަތްތެރިޔާގެ ހާލަތު ނޭންގުން

ފަހަރުގައި ތިމާގެ ރަހުމަތްތެރިޔާ ދިރިއުޅުމުގެ ވަރަށް އުނދަގޫ ހާލަތެއްގައި ހުރެދާނެއެވެ. ނަމަވެސް ތިމާއަށް އެކަން ނޭންގި ނުވަތަ އޭނާއަށް ފުރިހަމަ އަޅަނުން ނުދޭނަމަ ތިޔަ ގުޅުމަށް އަސަރުކޮށްފާނެއެވެ. ރަނގަޅު ރަހުމަތްތެރިންނަކީ އެމީހުންނަށް ދިމާވާ ކޮންމެ ހާލަތެއްގައިވެސް އޭނާއާއި އެއްކޮށް ހުންނަ މީހާއެވެ. ރަހުމަތްތެރިކަން ވަރުގަދަ ވަނީވެސް މި ސަބަބަށްޓަކައެވެ.

• އަގުވަޒަން ނުކުރުން

އެހެން ގުޅުންތަކާއި އެއްގޮތައް ރަހުމަތްތެރިކަމުގައިވެސް އަގުވަޒަންކުރުމަކީ ވަރަށް މުހިންމު ކަމެކެވެ. އަގުވަޒަން ނުކުރާނަމަ އެ ގުޅުމަށް ބުރުއަރާނެއެވެ.

• ކަންކަން ސިއްރުކުރުން

ރަހުމަތެރިޔާއަށް ކަންކަން ސިއްރުކުރާނަމަ އެކަމުގެ އަސަރު އެ ގުޅުމަށް ކުރާނެއެވެ.

• ސޯސަލް މީޑިއާގައި މިންތައް ކަނޑަނޭޅުން

ސޯސަލް މީޑިއާގައި މާގިނައިން ފޮޓޯ ޝެއަރކޮށް އޭނާގެ ޓައިމްލައިންގައި އެއްޗެހި ސެއަރކޮށް ހިތްހަމަނުޖެހޭ ގޮތައް ކޮމެންޓްކުރުމަކީވެސް ފަހަރުގައި ރަހުމަތްތެރިކަމަށް ބުރޫ އަރާފާނެކަމެކެވެ.