ވަރިވުމަށްފަހު ދަރިންނާ ބައްދަލުކުރުމުގެ އުސޫލުތައް

ދަރިން ލިބުމަށްފަހުގައި ދެމަފިރިން ކޮންމެވެސް ސަބަބަކާއިހެދި ވަކިވާން ޖެހޭ ހާލަތައްތައް އާދެއެވެ. މިފަދަ ހާލަތްތަކުގައި ދަރިން އުޅެނީ މަންމަ ނުވަތަ ބައްޕަގެ ތެރެއިން ކޮންމެވެސް އެކަކު ކައިރީގައެވެ.

2 މީހުން ވަކިވި ނަމަވެސް ކުއްޖާއަށް މަންމައާއި ބައްޕަގެ ލޯބި ބޭނުންވެއެވެ. މަންމައާއި ބައްޕައާއި އެކުގައި ވަގުތު ހޭދަކުރުންވެސް މުހިންމެވެ. ނަމަވެސް ބައެއްފަހަރު ކުއްޖާއަށް މިއިން ކޮންމެވެސް އެކަކާއިއެކު ވަގުތު ހޭދަކުރުމުގެ ފުރުސަތު ނުލިބެއެވެ. މިސާލަކަށް ބުނާނަމަ ކުއްޖާ އުޅެނީ މަންމަ ކައިރީގައިނަމަ ބައެއް ފަހަރު ބައްޕައާއިއެކު ވަގުތު ހޭދަކުރުމަށް ފުރުސަތު ނުލިބޭ ފަހަރުވެސް އާދެއެވެ. ނަމަވެސް ދަރިންނާއިއެކު ވަގުތު ހޭދަކުރަން ބެލެނިވެރިޔާއަށް ނުލިބޭނަމަ މިކަން ކޯޓުން ވެސް ހަމަޖެއްސިދާނެއެވެ. އެގޮތުން ދަރިންނާ ބައްދަލުކުރުމުގެ ދައުވާއެއްގައި ބައްދަލުކުރުމަށް އެދޭ އުސޫލުތައް ހިމެނިދާނެއެވެ.

advertisement

މިސާލަކަށް ހަފްތާގެ ކޮންމެ ބަންދު ދުވަހެއްގައި ކުއްޖާއާއިއެކު ވަގުތު ހޭދަކުރުމަށް ވަކި ގަޑިއެއް ހަމަޖެއްސުމަށް އެދެވިދާނެއެވެ. އަދި ކުއްޖާއާއި ފޯނުން ވާހަކަ ދައްކަން ބޭނުންވާނަމަ ކުއްޖާގެ މަސްލަހަތަށް ބަލައި، އެންމެ އެކަށީގެންވާ ގަޑިތަކެއްގައި ކުއްޖާއާއި ފޯނުން ވާހަކަދެއްކުމުގެ ފުރުސަތު ދިނުމަށާއި، ގަޑިތަކެއް ކަނޑައެޅުމަށް އެދެވިދާނެއެވެ.

މީގެއިތުރުން ސްކޫލް ބަންދުތަކުގައި މައިންބަފައިންކުރެ ދެފަރާތައްވެސް ހަމަހަމަވާ ގޮތަކަށް ކުއްޖާއާއިއެކު ވަގުތު ހޭދަކުރެވޭނެ ގޮތެއް ހަމަޖައްސައިދުމަށްވެސް އެދެވިދާނެއެވެ. ދަރިންނާއި ބައްދަލުކުރުމަށް އެދިފައިވާ ގޮތާއިމެދު ކޯޓުން ގޮތެއް ނިންމުމުގައި ކުއްޖާގެ ނަފްސާނީ، ޖިސްމާނީ ދުޅަހެޔޮކަމަށާއި ރައްކާތެރިކަމަށް ކޯޓުން ރިޢާޔަތްކުރާނެއެވެ.

ކޯޓު މެދުވެރިކޮށް ކުއްޖާއަށް ބައްދަލުކުރުމުގެ ފުރުސަތު ހޯދުނުނަމަވެސް މިކަމުގައި އެންމެ ރަނގަޅު ގޮތަކީ ކައިވެނި ރޫޅުނު ނަމަވެސް 2 މީހުން މަޝްވަރާކޮށްގެން ކުއްޖާއަށް އެންމެ ފައިދާހުރި ގޮތަކަށް ކޯޓާއި ހިސާބަށް ނުގޮސް ކުއްޖާގެ މަންމަ އަދި ބައްޕައާއިއެކު ވަގުތު ހޭދަކުރުމުގެ ފުރުސަތު ކުއްޖާއަށް ފަހިކޮށްދިނުމެވެ.