ނ. ކުޑަފަރީ: ކުނި މެނޭޖްކުރުމުގައި ނަމޫނާ ރަށެއް

ކުނި މެނޭޖްކުރުމަށް ރާއްޖޭގެ ގިނަ ރަށްރަށެއްގައި މިހާރު ދަނީ ރަށު ފެންވަރުގައި ގިނަ މަސައްކަތްތަކެއް ކުރަމުންނެވެ. އެގޮތުންވެސް ނ.ކުޑަފަރީއަކީ ކުނި މެނޭޖްކުރުމުގައި މިއަދު އެހެން ރަށްރަށައް ނަމޫނާ ދައްކަމުން އަންނަ ރަށެކެވެ. އެރަށުގެ ކުނި މެނޭޖްކުރާ ސެންޓަރުގެ މުވައްޒަފުން ކޮންމެ ދުވަހަކުވެސް ކުރަމުން އަންނަނީ ހީވާގި ބުރަ މަސައްކަތްތަކެކެވެ.

ނ. ކުޑަފަރީގައި ކުނި މެނޭޖްކުރުމުގެ މަސައްކަތްކުރާ މުވައްޒަފުން ކޮންމެ ދުވަހަކުވެސް އެރަށުން ނަގާ ކުނި 18 ބަޔަކަށް ވަކިކުރެއެވެ. އޭގެތެރޭގައި ގޭގެއިން ނަގާ ކުނި 8 ބަޔަކަށް ވަކިކުރެއެވެ.

advertisement

ކޮންމެ ދުވަހަކު ގޭގެއިން ނަގާ ކުނީގެ ތެރެއިން ރީސައުކަލް ކުރެވޭ ތަކެތި މިރަށުގައި ބެއިލްކުރެއެވެ. ގޯތިތެރެއާއި އާންމު އިޖްތިމާއީ ސަރަހައްދުތަކުން ގެންނަ ފަތްކުންޏާއި އެކުވެފައި ހުންނަ ވެލި ވަކިކޮށް މިރަށުގައި ދަނީ މަލްޗްކުރަމުންކަމަށް ކައުންސިލުން ވިދާޅުވެއެވެ.

ކުނި މެނޭޖްކުރުމަށް މުޅި ކުޑަފަރީގެ ހުރިހައި ރައްޔިތުންގެ ފަރާތުންވެސް ބޮޑު އެއްބާރުލުމެއް މިކަމުގައި ލިބެއެވެ. އެގޮތުން މި ދުވަސްވަރަކީ ސްކޫލް ބަންދު ދުވަސްވަރުކަމުން ގޭގެއިން ކުނި ނެގުމުގެ މަސައްކަތުގައި ސްކޫލްގެ ބައެއް ދަރިވަރުންވެސް އެހީވެދެއެވެ. އަދި ގޭގެއިން ނަގާ ރީސައިކަލް ކުރެވޭ ދަޅާ، ފުޅިއާއި، ފޮއްޗާ ސެންޓަރުގެ މުވައްޒަފުންނަށް ހަވާލުކުރަނީ ދޮވެ ސާފުކޮށްފައެވެ. ކުޑަފަރީ ކައުންސިލުން ވިދާޅުވީ، އެރަށުގައި ކުނި މެނޭޖްކުރުމަށް ކުރަމުން އަންނަ މަސައްކަތައް ލިބޭ އެންމެ ބޮޑު ކާމިޔާބީއަކީ ރައްޔިތުންގެ ފަރާތުން މިކަމަށް ލިބޭ އެހީތެރިކަމާއި އެއްބާރުލުންކަމަށެވެ.

މި މަސައްކަތުގައި ހިލޭ ސާބަހަށްވެސް އަންނަނީ އެކިއެކި ފަރާތްތަކުން މަސައްކަތްކުރަމުންނެވެ. އެގޮތުން އެރަށުގެ ޒީރޯ ވޭސްޓް ވޯކިންގ ގްރޫޕް ފާހަގަކޮށްލެވެއެވެ.

ކޮންމެ ރަށެއްގައިވެސް ފަރުދީ ފެންވަރުގައި އެރަށެއްގެ ކުނި މެނޭޖްކުރުމަށް މަސައްކަތް ކުރާނަމަ މިއީ ހަމަ ކޮންމެ ރަށެއްގައިވެސް ކާމިޔާބު ކަމާއިއެކު ކުރެވިދާނެ މަސައްކަތެއްކަން ކުޑަފަރީން އަންނަނީ ދައްކާދެމުންނެވެ.