ކާބޯތަކެތި އިސްރާފްނުކޮށް ވާނީ ކިހިނެއް؟

ކާބޯތަކެތި އިސްރާފުވެގެން އުކާލަން ޖެހޭ ފަހަރު އާދެއެވެ. ބާޒާރުން އެއްޗެހި ގަންނައިރު ގަންނަނީ ކޮންމެހެން ބޭނުންޖެހޭ ތަކެތި ކަމަށް ބަލައިގެންނެވެ. އެއްގޮތަކަށްވެސް އިސްރާފުކުރާކަށް ނޫނެވެ. ގޭގައި، މަސައްކަތުގެ މާހައުލުގައި ނުވަތަސްކޫލްގައި ކާބޯތަކެތި އިސްރާފު ނުވާނެ ގޮތަށް ބަލައިގެން ކަންތައް ކުރުމަކީ މުހިއްމު ކަމެކެއެވެ. އެގޮތުން މި އާރޓިކަލްގައި ބަލާލާނީ މި ދެންނެވި ފަދަ ހާލަތްތަކުގައި ކާބޯތަކެތި އިސްރާފުނުކޮށް ކުރެވިދާނެ ކަންތައްތަކާއި ގުޅޭ ގޮތުންނެވެ.

ގިނައިން ގަތުމުގެ އާދަ ދޫކޮށްލުން

advertisement

ކާބޯތަކެތި އިސްރާފުވެގެން އުކާލަންޖެހޭނަމަ ކުރެވިދާނެ އެންމެ މުހިއްމު ކަމަކީ ބޭނުންވާ ވަރަށް ވުރެ ގިނައިން ގަތުމުގެ އާދަ ދޫކޮށްލުމެވެ. ފްރިޖް ފުރޭ ވަރަށް އެއްޗެހި ގަނެފައި ރީތިކޮށް އަތުރާލާފައި ބެހެއްޓުމުން ބަލާލަން ވަރަށް ރީއްޗެވެ. އެހެންނަމަވެސް އެ ފްރިޖްގައި ހުންނަ އެއްޗެހި ގޭ އެންމެން ކައި ހުސްނުވެގެން އެ ހަލާކު ވެގެން އުކާލަންޖެހުމަކީ ކުރެވޭ އިސްރާފެކެއެވެ.

އުކާލުމުގެ ކުރިން އެއްފަހަރު ވިސްނާލުން

 ބައެއް ކާބޯތަކެއްޗަކީ ގަނެފައި ގިނަ ދުވަހު ހުރުމުގެ ސަބަބުން އޭގެ ކުލަ އާއި ވަހަށް ބަދަލު އަންނަ ތަކެއްޗެވެ.މި ގޮތަށް ވުމުން އެ ކާބޯތަކެތި އުކާލުމުގެ ބަދަލުގައި އޭގެއިން ކުރެވޭނެ ކޮންމެވެސް ބޭނުމެއް އޮތްތޯ ވިސްނުމަށްފަހު، އުކާލުމުގެ ބަދަލުގައި އެ ކަމަކަށް ބޭނުންކުރެވިދާނެއެވެ. މިސާލަކަށް ކުލަ ބަދަލުވެފައި ހުންނަ ތަރުކާރީން ސޫޕް ތައްޔާރުކޮށްލުން، ނުވަތަ ހަރުވެފައި ހުންނަ ޕާނުން ޕާން ކުނޑި ހަދައިގެން ބޭނުން ކުރުން ފަދަ ކަންތައް ކުރެވިދާނެއެވެ.

އަބަދުވެސް ޝޮޕިން ލިސްޓެއް ހަދާލުން

ގިނަ ފަހަރަށް ކާތަކެތި އިސްރާފުވެގެން އުކާލަންޖެހޭ ސަބަބުތަކުގެ ތެރޭގައި ގޭގައި ހުންނަ އެއްޗެހި ދެވަނަ ފަހަރަށް ގަނެގެން ގެއަށް ގެނެވުން ހިމެނެއެވެ. އަބަދުވެސް ބާޒާރަށް ދިއުމުގެ ކުރިން ގޭގައި ހުރި ނެތް އެއްޗެހި ބެލުމަށްފަހު، ޝޮޕިން ލިސްޓެއް ތައްޔާރުކޮށްގެން ދިއުމުން ޑަބަލްކޮށް ތަކެތި ގެއަށް ގަންނަން ނުޖެހޭނެއެވެ. މިހެން ހެދުމުގެ ސަބަބުން އިސްރާފުވެގެން އުކާލަން ޖެހޭ އެއްޗެހި މަދުވެގެން ދާނެއެވެ.