މީހުން ބުނާހާ ކަންކަން ކޮށްދޭކަށް ނުޖެހޭނެ، ނޫނެކޭ ބުނަން ދަސްކުރޭ

އަހަރެމެންގެ ތެރޭގައި ބައެއް މީހުންނަށް އެހެން މީހުން ބުނާ ކޮންމެ ކަމެއް ކޮށްދެވޭ ފަހަރު އާދެއެވެ. ވަޒީފާގެ މާހައުލާއި އަދި ދިރިއުޅުމުގައިވެސް މިފަދަ ހާލަތްތައް އާދެއެވެ. ތިމާގެ އަމިއްލަ ނަފްސަށްވުރެ އެހެން މީހުންނާއި ދޭތެރޭގައި މާބޮޑަށް ވިސްނޭ ފަހަރު އާދެއެވެ. ނޫނެކޭ ބުނަންޖެހޭ ހާލަތްތަކުގައިވެސް ނޫނެކޭ ބުނަން ނުކެރޭ ފަހަރު އާދެއެވެ. ނަމަވެސް މިއީ މުޅިއަކުން މިކަން އޮންނަންވާނެ ގޮތެއް ނޫނެވެ. ބައެއް ހާލަތްތަކަކީ ނޫނެކޭ ބުނަން އުނދަގޫވިއަސް އަދި ބުނަން ބޭނުން ނުވިއަސް ނޫނެކޭ ބުނަންޖެހޭނެ ފަހަރުތަކެވެ.

މިފަދަ ހާލަތްތަކުގައި ތިމާގެ ސިކުނޑި ނޫނެކޭ ބުނިނަމަވެސް ދުލުން ބުނެވޭ ބަހަކީ އާނއެކޭއެވެ. ކޮންމެ ކަމަކަށް އާނއެކޭ ބުނާނަމަ ތިމާގެ ނާޖާއިޒް ފައިދާ އެހެން މީހުން ނަގާނެއެވެ. އެއީ މަސައްކަތުގެ މާހައުލުގައިވިއަސް އަދި އަމިއްލަ ދިރިއުޅުމުގައިވިއަސް އެވެ.

advertisement

ގިނަ މީހުންނަށް ނޫނެކޭ ބުނަން ނުކެރޭ ސަބަބުތަކުގެ ތެރޭގައި އެމީހުން ތިމާދެކެ ރުޅިއައިސް ތިމާއާއި ލައިކް ނުވުމަކީ މައިގަނޑު ސަބަބު ތަކުގެ ތެރޭގައި ހިމެނޭކަމެކެވެ. ނޫނެކޭ ބުނަން ޖެހިލުންވާ އެހެން ސަބަބުތަކުގެ ތެރޭގައި ހިމެނެނީ:

ހަމަނުޖެހުން ކުޑަކުރުން

އެހެންމީހަކު ބުނާ އެއްޗަކަށް ނޫނެކޭ ނުވަތަ އެ ބުނުމާއި ދެކޮޅަށް އެއްޗެއް ބުނުމުގެ ސަބަބުން އުދެފިދާނެ ދެބަސްވުމަކުން ދުރުވުމަށް ގިނަ މީހުން އާންއެކޭ ބުނެއެވެ.

އެހެންމީހުންގެ ރުހުން ހޯދުން

އެހެން މީހެއްގެ ރުހުން ހޯދުމަށްޓަކައި ކޮންމެ ކަމަކަށް އާނއެކޭ ބުނާމީހުން އުޅެއެވެ. މިފަދަ ހާލަތްތައް އެންމެ ގިނައިން ދިމާވަނީ ވަޒީފާގެ މާހައުލުގައެވެ.

ކޮންމެ ކަމަކާއިހެދި އާނއެކޭ ބުނިނަމަވެސް ކޮންމެ މީހަކު ބުނާ ކޮންމެ އެއްޗަކަށް އާބަސް ބުނެވޭނަމަ އެކަމާއިމެދު ވިސްނާލަންޖެހެއެވެ. ސަބަބަކީ މިއީ ބައެއް ފަހަރު ތިމާ ދަށްވެވޭކަމެކެވެ. އެއީ މީގެ ސަބަބުން އަމިއްލަ ނަފްސަށް އޮންނަ އިތުބާރު ކުޑަކަން ހާމަވެއެވެ. އަދި މިއީ ތިމާގެ އަމިއްލަ ގާބިލްކަން ތިމާއަށް ގަބޫލުކުކުރެވޭކަމުގެ ހެއްކެކެވެ. އާނއެކޭ ބުނަންޖެހޭ ހާލަތްތަކުގައި އާނއެކޭ ބުނާށެވެ. ނަމަވެސް އެއީ ކޮންމެ ހާލަތަކަށް ނަހަދާށެވެ.