ކެންސަރ ސޮސައިޓީގެ ފަރާތުން ސަޕޯޓު ގުރޫޕެއް!

2016 ވަނަ އަހަރުގެ ފެބްރުއަރީމަހު އުފައްދާފައިވާ ކެންސަރ ސަޕޯޓް ގްރޫޕް (ސީ.އެސް.ޖީ) އަކީ ކެންސަރު ބަލީގެ ޝިކާރައަކަށްވެފައިވާ ބަލިމީހުންނާއި އެމީހުންގެ އާއިލާތަކަށް ނަފްސާނީ އަދި އިޖްތިމާއީ ސަޕޯޓް ދީ އެހީތެރިކަން ފޯރުކޮށްދޭ ގުރޫޕެކެވެ.

2021 ވަނަ އަހޖަރުގެ ޑިސެމްބަރ މަހާއި ހަމައަށް މި ގްރޫޕަށް 200 އަށްވުރެ ގިނަ މެންބަރުން ގުޅިފައިވާކަމަށް އެ ޖަމިއްޔާއިން ބުނެއެވެ. އޭގެތެރޭގައި ކެންސަރުބަލި ޖެހިފައިވާ މީހުންނާއި، އެބަލިން ސަލާމަތްވެފައިވާ މީހުންގެ އިތުރުން ބަލިމީހުންގެ އެހީތެރިންވެސް ހިމެނެއެވެ.

ކޮންމެ ހަފްތާއެއްގެ އަންގާރަ ދުވަހު ސީ.އެސް.ޖީ ގެ ބައްދަލުވުން ކުރިއަށްގެންދެއެވެ. މި ބައްދަލުވުން ކުރިއަށްދާނީ އެންމެން އެއްތަނުން ބައްދަލުވެގެން ނުވަތަ ޒޫމް މެދުވެރިކޮށްކަމަށް ސީ.އެސް.ޖީއިން މައުލޫމާތުދެއެވެ.

މި ގްރޫޕްއާއި ގުޅެންވީ ކީތްވެ؟

ކެންސަރު ބައްޔަށް ފައްސިވެ ފަރުވާ ހޯދަމުންދާ މީހުންނާއި ފަރުވާ ހޯދައި ނިމިފައިވާ މީހުންގެ އެހީތެރިކަމާއި އެއްބާރުލުމުގެ އިތުރުން ދިމާވާ އެކި ކަންކަމުގައި ކުރިއަށް ދިއުމުގައި ނަސޭހަތާއި އިރުޝާދު ހޯދުމަށް މިއީ މުހިންމު ގްރޫޕެކެވެ.

ކެންސަރު ބަލި ޖެހިފައިވާ މީހަކު ތަހައްމަލް ކުރަމުންދާ ވޭނާއި އުފުލަމުންދާ ބުރަ ރަނގަޅަށް ގަބޫލުކުރެވޭ މީހުންނާއި ވާހަކަދައްކައި، އެމީހުންގެ އެކަންކަމާއި ކުރިމަތިލާނެ ގޮތާއި މެދު މި ގްރޫޕް މެދުވެރިކޮށް އެެހީތެރިކަން ލިބޭނެއެވެ.

ބަލީގެ ފަރުވާއަށް ބޭނުންކުރާ ބޭސްތަކުގެ ސަބަބުން ހަށިގަނޑާއި ނަފްސާނީ ދުޅަހެޔޮކަމަށް ކުރާ ނޭދެވޭ އަސަރުތަކާއިމެދު މަޝްވަރާކޮށް ދުޅަހެޔޮ ކާނާއާއި ކެއުން ބަހައްޓާނެގޮތާއި ބެހޭ މައުލޫމާތާއި، ކުރިމަތިލާންޖެހޭ ގޮންެޖެހުންތަކާއިއެކު ކުރިއަށްދާނެ ގޮތާއި ބެހޭގޮތުން ދީނީ އިލްމުވެރިންގެ އިރުޝާދު ލިބޭނެއެވެ. އަދި ކަސްރަތުކުރުމާއި ދުޅަހެޔޮ ސިއްހަތެއްގައި ހުރުމަށް ކުރެވިދާނެ ކަންކަމާއި ބެހޭގޮތުން ކަމާބެހޭ ފަރާތްތަކުގެ ކިބައިން މައުލޫމާތުވެސް ލިބޭނެއެވެ.

ކެންސަރު ސްޕޯޓް ގްރޫޕާއި ގުޅޭން ބޭނުންވާ ފަރާތްތަކުން 7505500 އަށް ގުޅުމުން މި ގްރޫޕްގައި ބައިވެރިވެވޭނެއެވެ.