އެލަރޖީއެއްކަން ދެނެގަންނާނެ ގޮތްތައް

ވިއްސާރަ މޫސުމުގައި ނުވަތަ ރޯގާއެއް އުޅޭ ދުވަސްވަރެއްގައި ރޯގާޖެހި، ކިނބިހި އަޅާނަމަ އެއީ އަރިދަފުސް ރޯގާގެ އަލާމާތްތަކެވެ. ނަމަވެސް ހޫނު މޫސުމުގައި ނުވަތަ ރޯގާއެއް ނެތް ދުވަސްވަރެއްގައި ރޯގާތޯ ނުވަތަ އެލަރޖީއެއްތޯ ދެނެގަންނާނީ ކިހިންތެހެއްޔެވެ.

• ހިކިކެއްސުން ކެއްސުން

އަރިދަފުސް ރޯގާޖެހިގެން އުޅޭއިރު ކެއްސާ ކެއްސުމާއި އަދި އެލަރޖީގައި ކެއްސާ ކެއްސުން ތަފާތުވާނެއެވެ. ރޯގާޖެހިގެން އުޅޭއިރު ކަރަށް ތަދުވެ، ހިންދިރުވަން އުނދަގޫވާނެއެވެ. ހީވާނީ ކަރުގައި އެއްޗެއް ތާށިވެގެން އުޅޭހެނެވެ. ނަމަވެސް އެލަރޖީއެއްގައި ކެއްސާނީ ހިކި ކެއްސުމެވެ.

advertisement

• ލޯކަހައި ފެންއައުން

ރޯގާޖެހިގެން އުޅޭނަމަ ލޯކައިރި ރަށްވެ އުނދަގޫވާކަހަަލަ އިހްސާސެއްވާނެއެވެ. ނަމަވެސް އޭގެބަދަލުގައި އެލަރޖީގައި ލޯކަހާނެއެވެ. އަދި ލޮލުން ފެންއަންނާނެއެވެ. ރޯގާޖެހުމުން ނޭފަތާއި ކަރު ކަހާފާނެއެވެ. ނަމަވެސް އެލަރޖީއެއްނަމަ ލޯކައިރި ދުޅަވުމަކީވެސް ވެދާނެކަމެކެވެ.

• އަލާމާތްތައް ގިނަދުވަހަށް ހުރުން

ރޯގާޖެހިގެންނަމަ އާންމުގޮތެއްގައި އަލާމާތްތައް ހުންނާނީ 5 ވަރަކަށް ދުވަހަށެވެ. ނަމަވެސް އެލަރޖީގައި އަލާމާތްތައް ގިނަ  ދުވަހަށް ދެމިގެންދެއެވެ.

• ރޯގާއަކީ މޫސުމީ ކަމެއް

އާންމުގޮތެއްގައި އަހަރުގެ ވަކި ދުވަސްވަރެއްގައި ރޯގާ ޖެހޭމީހުން އުޅެއެވެ. އެހެންކަމުން ކޮންމެ އަހަރެއްގެވެސް އެދުވަސްވަރުގައި ރޯގާޖެހޭނަމަ އެއީ އާންމު ރޯގާއެކެވެ. ނަމަވެސް ރޯގާ ނުޖެހޭ ދުވަސްވަރެއްގައި މިފަދަ އަލާމާތްތައް ފެންނަނަމަ އެއީ އެލަރޖީއަކަށް ވެދާނެއެވެ.

• ހުންނައުން

އާންމުގޮތެއްގައި ރޯގާގައި ހުންއާދެއެވެ. ހުން އައުމަށްފަހު އެހެން އަލާމާތްތައް ފެނެއެވެ. އެހެންނަމަވެސް ހުން ނައިސް އެހެން އަލާމާތްތައް ފެންނަނަމަ އެއީ އެލަރޖީއަކަށް ވެދާނެކަމަށް ޑޮކްޓަރުން ބުނެއެވެ.

• ތެދުވެ އުޅެވުން

އާންމުގޮތެއްގައި ރޯގާ ޖެހުމުން ހަށިގަނޑު ވަރަށް ބޮޑަށް ވަރުބަލިކޮށްލައެވެ. ބައެއް މީހުންނަށް އެނދުން ތެދުވެ އުޅުމަކީވެސް އުނދަގޫކަމެކެވެ. އެލަރޖީގައި މީހާ ވަރުބަލިވިނަމަވެސް އެނދުގައެއް ނޯންނާނެއެވެ.