އަމިއްލަ ނަފްސުދެކެ އަބަދު ރުޅި އާދެވޭތަ؟

ބައެއް މީހުންނަކީ އަބަދު އަމިއްލަ ނަފްސުދެކެ ރުޅިއައިސްފައި ތިބޭ މީހުންނެވެ. ތިމާގެ ވަށައިގެންވާ ކަންކަމަށް އަމިއްލަ ނަފްސު ކުއްވެރިކޮށް އެކަންކަމަށް ނަފްސުދެކެ ރުޅިއާދެވެއެވެ. މިހެން އާންމުގޮތެއްގައި ވަނީ ޑިޕްރެޝަން ނުވަތަ އެންޒައިޓީ ހުންނަ ނަމައެވެ.

އަމިއްލަ ނަފްސުދެކެ އަބަދު ރުޅިއާދެވޭނަމަ ތިމާގެ އުޅުމުންވެސް އެކަން ހާމަވާނެއެވެ. އަމިއްލަ ނަފްސުދެކެ ރުޅިއަންނަ މީހެއްގެ ކިބައިން ފެންނަ ބައެއް އަލާމާތްތައް:

advertisement

• ނަފްސު ކުއްވެރިކުރުން

އަމިއްލަ ނަފްސު ކުއްވެރިކުރާ މީހަކަށް ދެރަކަމެއްވުމުން ދިރިއުޅުމުގެ ހުރިހައިކަމެއް ނިމުމަށް އައީކަމަށް ހީވެއެވެ. އަދި ތިމާއަކީ ފެއިލްވެފައިވާ މީހެއްކަމަށް ވިސްނެއެވެ.

• ނެގެޓިވްކޮށް ވިސްނުން

ދުވާލުގެ ވަގުތުތަކުގައި ކިތަންމެކަމެއް ރަނގަޅަށް ވީނަމަވެސް ދިމާވާ އެންމެ ގޯސް ކަމެއްގެ ސަބަބުން އެކަމަކަށް މާބޮޑަށް ވިސްނައެވެ. އަދި ވެދިޔަ ރަނގަޅު ކަންތައްތަކުގެ މަތިން ހަނދާންނެތެއެވެ.

• އެއްވެސް އަގެއްނެތް މީހެއްކަމަށް ގަބޫލުކުރުން

އަމިއްލަ ނަފްސު ކުއްވެރިކުރާ މީހަކު އެމީހާއަކީ އެއްވެސް އަގެއްނެތް މީހެއްކަމަށް ގަބޫލުކުރެއެވެ. އަދި އަމިއްލަ ނަފްސާ އެހެން މީހުންނާއި އަޅާކިޔާ ތިމާގެ އަމިއްލަ ނަފްސުގެ އަގު ވަޒަންނުކުރާނެެއެވެ.

• ފާޑުކިޔުމުން ބަލައިނުގަނެވުން

ތިމާކުރާ ކަމަކާއި ގުޅޭގޮތުން މީހަކު ފާޑުކިޔުމުން އެކަމެއް ބަލައިގަންނަން އުނދަގޫވެއެވެ. އަދި ގިނަ ދުވަސްތަކެއް ވަންދެން އެކަމާއިމެދު ވިސްނާނެއެވެ.

• އެހެން މީހުންނަށް ޖެލަސްވުން

އަމިއްލަ ނަފްސުދެކެ ރުޅިއަންނަ މީހުންނަކީ އަބަދުވެސް އެހެންމީހުންދެކެ ޖެލަސްވެފައިތިބޭ ބައެކެވެ. އަދި މީގެ ސަބަބުން އެހެންމީހުންނާއިމެދު އޮންނަ ގުޅުންވެސް ކަނޑާލައެވެ.

• ކަންކަން ކުރުމަށް ފަސްޖެހުން

ތިމާ ބޭނުންވާ ކަމެއް ކުރުމަށް މިފަދަ މީހުން ފަސްޖެހޭނެއެވެ. އެއީ ފެއިލް ވެދާނެތީ ގަންނަ ބިރެއްގެ ސަބަބުންެނެވެ.