ދަރިފުޅު ސްކޫލުން ބަލާގޮސް، ހިތުހުރި ގޮތަކަށް ސައިކަލް ޕާކު ކުރުން ހުއްޓާލަންޖެހޭ!

އިންސާނުންނަކީ އަބަދުވެސް ލަސްވެފައި ތިބޭ މީހުންނެވެ. އޮފީހަށް ދާންވިޔަސް، ސްކޫލަށް ދާންވިޔަސް، ދަރިފުޅު ބަލައި ސްކޫލް ދޮށަށް ދާންވިޔަސް އަބަދުވެސް ތިބެނީ ގަޑިޖެހިފަ އެވެ. ލަސްވެފަ އެވެ. ހަލަބޮލި މި މާލެގެ ހާލަތަކީވެސް އެއީ އެވެ.

އެކަމަކު ހައްލުނުވެ އޮތް ޕާކިންގެ މައްސަލަތަކާއި ޓްރެފިކް މައްސަލަތައް މިކަމުގެ ސަބަބުން ބޮޑުވަނީ ކިހާ މިންވަރަކަށްތޯ އެއްވެސް ވަރަކަށް ވިސްނާލިންތޯ އެވެ. ދިވެހިންނަކީ ކޮންމެ ކަމެއް ވަރިހަމަ ބައެކެވެ. އެކަން މަގުތަކުގައި ޕާކުކޮށްފައި ހުންނަ ވެހިކަލްތަކަށް ބަލާލުމުން އެނގޭނެ އެވެ. އެހެން ނަމަވެސް ގާނޫނީގޮތުން ފިޔަވަޅެއް އަޅާއިފި ނަމަ އެ ފިޔަވަޅު އަޅާ މީހަކަށްވުރެ ގޯސް މީހަކު ނުހުންނާނެ އެވެ.

advertisement

ފިހާރައަކަށް ދިޔަޔަސް ގިނަ ދިވެހިން ބޭނުންވަނީ ކައުންޓަރާއި ހިސާބަށްވެސް ސައިކަލުގައި ދާށެވެ. މިހެން މިބުނީ ފިހާރަތަކުގެ ދޮރުމަތީގައި މީހުން ކިތަންމެ ވަރަކަށް ވަދެ ނިކުމެ ހެދިޔަސް ސައިކަލް ޕާކުކޮށްފައި ދާތީ އެވެ. އެކަމަކު ދެތިން މިނިޓު ހިނގާފައި ދެވޭހާ ދުރުމިނެއްގައި ޕާކިން ޒޯންވެސް ހުރެ އެވެ. އެކަމަކު ހިނގާލާފައި ފިހާރައަށް އައުން ވަނީ ބުރައަކަށްވެފަ އެވެ. ހަމައެހެންމެ ސްކޫލް ދޮށަށް ދަރިން ބަލާ ގޮސްފައިވެސް ކަންތައް ކުރަނީ މިއުސޫލަށެވެ.

ސްކޫލް ދޮރާއި ދިމާލުންނާއި މަގުގެ މެދެއްހާ ހިސާބުގައިވެސް ޕާކު ކޮށްފައި ހިނގައިދާނެ އެވެ. ސްކޫލް ގަޑިތަކަކީ އާންމުކޮށްވެސް ޓްރެފިކަށް ބާރުބޮޑު ވަގުތުތަކަކަށްވެފައި މިފަދަ އަމަލުތައް ކުރުމުން އުދަނގޫވާނީ ތިމާފަދަ ކިތަށް ރައްޔިތުންތަކަށްތޯ މިއީ ވިސްނާލަންޖެހޭ ކަމެކެވެ.

ތިމާ އަވަސް އަރުވާލާފައި ދަރިފުޅު ބަލައި ދާން ބޭނުންވާ ގޮތަށް އަނެކާވެސް އެގޮތް ބޭނުންވާނެ އެވެ. އެކަމަކު ބޭނުންހާ ގޮތަކަށް ސައިކަލް ޕާކު ކޮށްފައި ދިޔުން އެއީ އެންމެ ރަނގަޅު ގޮތް ނޫން ކަން ގަބޫލުކުރަންޖެހޭނެ އެވެ. ސްކޫލް ކައިރީގައިވެސް ޕާކިން ޒޯން ހުންނަ އިރު އެތަނުން ޖާގަ ލިބޭނަމަ އެތަނުގައި ޕާކު ކޮށްފައި ހިނގާލާފައި ގޮސް ދަރިފުޅު ގޮވައިގެން އައުން މިއީ ދެރަ ކަމެއް ނޫނެވެ. އެ ތަނުން ޖާގަ ނުލިބިއްޖެ ނަމަ ދެން އެންމެ ކައިރީގައި ހުރި ޕާކިން ޒޯނެއްގައި ޕާކު ކޮށްފައި ދިޔުމަކުން ހަށިގަނޑުން ބައެއް އުންޏެއް ނުވާނެ ކަން ޔަގީނެވެ. އަދި މިއީ ރީތި އާދަތަކުގައި ހިމެނެ ކަމެކެވެ.

މިފަދަ ކުދި ކުދި ކަންކަމުންވެސް ރީތި ނަމޫނާ ދަރިންނަށްވެސް ދެއްކިދާނެ އެވެ. އަދި މުޖުތަމައުއަށްވެސް މީގެ މިސާލު ތިޔައިގެ ތެރެއިން ކޮންމެ މީހަކަށްވެސް ދެއްކިދާނެ އެވެ.