އެންމެނަށް އެނގޭ ބޮޑު ސިއްރު: އާއިލީ ވަޒީފާތައް!

ކޮންމެ ވަޒީފާއަކަށް ވެސް ވަކި ހާއްސަ ޝަރުތުތަކެއް (ތައުލީމާއި ތަޖުރިބާ ހިމެނޭގޮތަށް) ފުރިމަވާން ޖެހެއެވެ. ވަޒީފާ އަށް ކުރިމަތިލުމާއި، އިންޓަވިއުކުރުމާއި، މީހަކު ހޮވުމާއި މިހުރިހާ މަރުހަލާތަކެއްގައިވެސް ކަން ކުރަންވީ ގޮތް ހުރިހާ އިދާރާތަކެއްގައި ވެސް އޮވެއެވެ. ހާއްސަކޮށް ސަރުކާރުގެ އިދާރާތަކުގައި މިކަންކަން ކުރަނީ އެ އިދާރާއެއްގެ ރެކްރޫޓްމަންޓް ޕޮލިސީ ނުވަތަ އެޗް އާރް ޕޮލިސީ އާ އެއްގޮތަށެވެ. އެއީ އެކަމަކު ހުރިހާ ފަހަރަކު ނޫނެވެ. ބައެއް ފަހަރެވެ. އެއީ ކީއްވެހެއްޔެވެ؟ އެއީ ނުހަމަގޮތުގައި ކޮންމެވެސް މީހަކަށް ވަޒީފާ ދިނުމަށްޓަކައެވެ.

ސަރުކާރުގެ މަތީ ފަޑިއަށް ބަލައިލުމުން ސާފުވާ އެއް ހަގީގަތަކީ ވެރިކަމުގެ ބާރުގަދަ ފަރާތްތަކުގެ އާއިލާތަކުގެ މީހުންނަށް އެކި ނަންނަމުގައި ވަޒީފާ ދީފައި ހުރިމިންވަރެވެ. ރައީސުލް ޖުމުހޫރިއްޔާއާއި ގާތް އާއިލީ ފަރާތްތަކާއި، ރައްޔިތުންގެ މަޖިލީހުގެ ރައީސްގެ އާއިލީ ފަރާތްތަކަށާއި، މި ފަރާތްފަރާތުގެ ޅިއަން ފަހަރިންނާއި، މިނިސްޓަރުންނާއި އެކިކި ބޯޑުތަކުގަތިބި ނުފޫޒުގަދަ ފަރާތްތަކުގެ އާއިލީ މީހުންނާއި ގާތް ރަހުމަތްތެރިން ބޮޑު މުސާރަ އާއި އިނާޔަޔް ލިބޭ ވަޒީފާތަކުގއި އެބަ ތިއްބެވެ. ސުވާލަކީ މިއީ އިންސާފުތޯއެވެ؟

advertisement

ނެޕޮޓިޒަމް ނުވަތަ ގާތް މީހުނަށް މޮޅު ގޮތް ހޯދައިދިނުގެ ވާހަކަ ދެއްކީމާ އެފަރާތްތަކުން އެންމެ ފުރަތަމަވެސް ބުނާ ވާހަކައަކީ ތިމަންނާމެންގެ ގާބިލުކަން ހުރި ވާހަކައެވެ. އެހެނަސް މިރާއްޖޭގައި މި އާއިލާތަކުގެ މީހުން ނޫނަސް ގާބިލު މަސައްކަތްތެރިން އެބަތިބިއެވެ. އިންސާފުވެރި އިންޓަވިއުއަކާއި ހަމައަށް ދެވޭނަމަ އިންސާފުވެރިކަމާއެކު މަސައްކަތްތެރިން ހޮވާނަމަ ގާތް މީހުންގެ ބަދަލުގައި އެވަޒީފާތަކުގައި ތިބީހީ މެރިޓުން ރަނގަޅު މާކްސް ހޯދާ މީހުންނެވެ.

ދައުލަތުގެ އިދާރާތަކުގައި ބައެއްފަހަރު ވަޒީފާ އުފައްދަނީވެސް ސީދާ ވަކިމީހަކަށް ނޫނީ އެ މަގާމަށް ޝަރުތު ހަމަނުކުރެވޭނެ ގޮތަށެވެ. އެއީ ވަޒީފާއަށް މީހުން ހޯދަނީއެއް ނޫނެވެ. އެއީ މީހުނަށް ވަޒީފާ ހޯދައި ދެނީއެވެ. ނުހައްގުންނެވެ.

ރާއްޖޭގެ ރަށްރަށުގައި މިކަން ހިނގާ ގޮތަކީވެސް ފާހަނގަކުރަންޖެހޭ ކަމެކެވެ. ދައުލަތުގެ އިދާރާއަކުން ވަޒީފާއެއް ހުސްވާ އިރަށް އެރަށެއްގެ އެމް.ޕީ ނުވަތަ ކައުންސިލަރުން މީސްމީހުނަށް އެ އިއުލާނެއް ފޮނުވައެވެ. އާއްމުކޮށް މިކަން ކުރާނީ ރަށުގެ ވައިބަރ ގްރޫޕްތަކުގައެވެ. ދެން އެ އިއުލާން ހުޅުވުމަށް ފަހު ޝަރުތުހަމަ ވާ ނަމަ އެންމެންވެސް ބަލާނީ އަވަހަށް ސީވީ ހަދައި އީމެއިލް ކުރެވޭތޯއެވެ. ދެވަނަ މަރުހަލާއަކީ އެ އިއުލާން ދެއްކި އެމްޕީ ނުވަތަ ކައުންސިލަރަށް ނުވަތަ ޕާޓީ އެކްޓިވިސްޓަށް ޑިރެކްޓް މެސެޖުކޮށް ތިމަންނާ އެޕްލައި ކުރިވާހަކަ ބުނުމެވެ. މިގޮތަށް މެސެޖު ކުރާ އެންމެން ގާތުވެސް އެމީހުން ބުނާނީ އެއް ވާހަކައެކެވެ. އެއީ އިންޝާﷲ ވަޒީފާ ހަމަޖެހޭނެ ކަމަށާއި، ތިމަންނާ ވީވަރަކުން މިކަންތައް ބަލައިދޭނެ ވާހަކައެވެ.

ދެން އެތަނުން ކޮންމެ މީހަކު ހޮވުނަސް ވަރިހަމަތާއެވެ. އެ އެމްޕީ އަކު ނުވަތަ ސިޔާސީ އެކްޓިވިސްޓު އެމީހަކަށް ގުޅާފައި މަރުހަބާ ކިޔައި އެއީ ތިމަންނާ ކޮށްދިން ކަމެއް ކަމަށް ހަދައެވެ. މި މީހުން ވަޒީފާ ދޭން އެއްވެސް ކަމެއް ނުވެސް ކުރާނެއެވެ. ކުރާކަށް ނުވެސް ޖެހޭމެއެވެ. ނަމަވެސް އެހިސާބުން އެވަޒީފާ ލިބުނު މީހާއާއި އޭނާގެ މުޅި އާއިލާ އެއޮތީ އިއުލާނު ދެއްކި ސިޔާސީ މީހާއަށް ދަރާފައެވެ. މިއީ ސީދާ ނުފޫޒު ނުފޯރުވައި ރަށްރަށުގެ އާއިލާތައް ސިޔާސީ މީހުންގެ ކޮންޓްރޯލުގެ ދަށަށް ގެންނަ އެއްގޮތެވެ.
އަނެއްގޮތަކީ ސީދާ ނުފޫޒު ފޯރުވުމެވެ. މިގޮތަށް ސީދާ ނުފޫޒު ފޯރުވަނީ އާއްމުގޮތެއްގައި ވަރަށް ގާތް މީހުންގެ ވަޒީފާގެ ކަމެއްގައެވެ. ނުވަތަ އެ ސިޔާސީ މީހަކަށް ވަރަށް މުހިންމު ކީ މީހެއްގެ ވަޒީފާއެއްގެ ކަމެއް ނަމައެވެ. މިސާލަކަށް އިދިކޮޅަށް ވޯޓު އަޅާ މީހުން ގިނަ އާއިލާއަކުން ތިމަންނާގެ ދަރިއަށް ވަޒީފާ ދީފި ނަމަ އާއިލާ އެންމެން ކޮޅު ބަދަލުކޮށްލަން ބުނެފިނަމަ އެއްކަލަ ސިޔާސީ މީހާ އެއާއިލާގެ އަދަދު ވިއްކައިގެން އެ ވަޒީފާއެއް ހަމަޖައްސައިދޭނެއެވެ. މަގާމުގެ ޝަރުތު އޮތްތާ ބާއްވާފައެވެ.
މިގޮތަށް ކަން ކުރުމުން މަސައްކަތްތެރިއާ ކޮންމެހެން މަސައްކަތް ކުރާކަށް ނޫޅުމަކީވެސް ވެދާނެ ކަމެކެވެ. އެހެނީ އޭނާ އަށް ވަޒީފާ ލިބުނީ މުސާރައިގެ ބަދަލުގައި މަސައްކަތް ކުރުމަށް އެއްބަސްވެގެނެއް ނޫންތާއެވެ. އޭނާ އެއްބަސްވީ މަހު މުސާރައަށް ވަޒީފާ ލިބުމުން އާއިލާ އެންމެންގެ ވޯޓު ތާއެވެ. ވީމާ އޭނާ އެކަން ކުރާނެއެވެ. ދައުލަތުގެ އޮފީހުން އޭނާއަށް ވަޒީފާދޭނެއެވެ. ހާއްސަކޮށް ރަށްރަށުގެ އިދާރާތަކުގައި ވަޒީފާ އަދާކުރާ މީހުންގެ ކިބައިން ނަތީޖާ ނުފެންނަ ސަބަބުތަކުގެ ތެރޭގައި މިކަން ހިމެނޭނެއެވެ.
މިފަސާދައިގެ ސަބަބުން ރަށްރަށުގެ ކުދި މުޖުތަމައުތަކުގައި ހާއްސަކޮށް ފިތުނަ އުފެދި، ޕާޓީ ވާދަވެރިކަން ބޮޑުވެއެވެ. މި ހަޑީހޭވުމުގެ ތެރެއަށް ނުވަންނަން ބޭނުންމީހާ އާއި، ޕާޓީ އަކަށް ނުވަދެ ހުންނަ ގާބިލު މީހާ ޖެހޭނީ ވަޒީފާ ނެތި ދިރިއުޅޭށެވެ. ނުވަތަ މާލެގޮސް ކޮންމެވެސް ވަޒީފާއެއް ލިބޭތޯ އުޅޭށެވެ.

އާއިލީ ވަޒީފާތައް ދިނުމަކީ މިގައުމުގެ ބޮޑު މައްސަލައަކަށް ވެފައިވާއިރު ސަރުކާރުން މިކަމަށް އެދެވޭ ހައްލު ހޯދައިދޭން މަސައްކަތް ކުރާ ތަނެއް ނުފެނެ އެވެ. މިފަދަ ކަންކަން ހުއްޓުވޭނެ ފަރާތްތަކަކީ ކޮބައިތޯ ބަލާއިރު، އެ ފަރާތްތަކުންވެސް ތިބީ ގާތް މީހުންނަށް ވަޒީފާ ހަމަޖައްސައިދީގެންނެވެ. ހުދު އެފަރާތްތަކުން އެތިބި މަގާމުތަކަކީ ވެސް ބާރާއި ނުފޫޒު ބޭނުންކޮށްގެން ނުހައްގުން ހޯދާފައިވާ މަގާމުތަކަށް ވުން ވަރަށް ގާތެވެ. މި ރާއްޖޭގައި ރަނގަޅު ވަޒީފާއެއް ހޯދުމަކީ ބާރުގަދަ މީހުންނާއި ގުޅުން ނެތްނަމަ ވަރަށް އުނދަގޫ ނާދިރު ކަމެކެވެ. ވަޒީފާ ދެނީ ހިތަށް އެރި މީހަކަށެވެ. މިއީ އެންމެން ދަންނަ ބޮޑު ސިއްރެކެވެ.