އާންމު މެންބަރުންގެ ނިންމުން: 2023ގައި ވެސް ރިޔާސީ ޓިކެޓް ރައީސް ސޯލިހަށް!

އެމްޑީޕީގެ ތާރީހުގައި ވެސް މިހާތަނަށް ބޭއްވި އެންމެ ފޯރިގަދަ އަދި އެންމެ ވާދަވެރި އިންތިހާބު ހޮނިހިރު ދުވަހު ވަނީ ނިންމާލާފައެވެ. އެމްޑީޕީގެ އެތެރޭގެ އެންމެ ފޯރިގަދަ އިންތިހާބުގައި ޗެއާޕާސަން ކަމުގެ މަގާމަށް ކުރިމަތިލެއްވީ މާފަންނު އުތުރު ދާއިރާގެ މެންބަރު އަދި އެ ޕާޓީގެ ސްޕޯކްސް ޕާސަންގެ މަގާމުގައި ވެސް ހުންނެވި އިމްތިޔާޒު ފަހުމީ އާއި އެމްޑީޕީގެ އިކޮނޮމިކް މިނިސްޓަރު ފައްޔާޒް އިސްމާއީލެވެ. ވާދަވެރި ކެމްޕެއިނަކަށް ފަހު ހޮނިހިރު ދުވަހު ބޭއްވި އިންތިހާބުން ބޮޑު ތަފާތަކުން ކުރި ހޯއްދެވީ ފައްޔާޒެވެ.

މި އިންތިހާބު ވެފައި ވަނީ ހަމައެކަނި ޗެއާޕާސަނެއް ހޮވުމުގެ އިންތިހާބަކަށް ނޫނެވެ. އޭގެ ބަދަލުގައި މި އިންތިހާބަކީ 2023ގެ ރިޔާސީ ޓިކެޓާ މެދު އުފެދިފައިވާ ބަހުސަށް ވެސް ލިބިގެންދިޔަ ޖަވާބެކެވެ. މި އިންތިހާބު ވެފައި ވަނީ މިހާރުގެ ރައީސް އިބްރާހީމް މުހައްމަދު ސޯލިހާއި ކުރީގެ ރައީސް އަދި އެމްޑީޕީ އާއި މަޖިލީހުގެ ރައީސް މުހައްމަދު ނަޝީދުގެ މަގުބޫލުކަން ޕާޓީގެ ތެރޭގައި އޮތް މިންވަރު މިނެކިރާލަން ވެސް ލިބުނު ފުރުސަތަކަށެވެ. ފާޅުގައި ކެމްޕެއިން ނުކުރެއްވި ނަމަވެސް ހާމަކަން ބޮޑު ގޮތެއްގައި ދެ ބޭފުޅުން ތިއްބެވީ ދެ ފަޅި ނަންގަވައިގެންނެވެ. ރައީސް ސޯލިހާއި އެ މަނިކުފާނުގެ ބައިވެރިން ފައްޔާޒަށް ތާއީދުކުރެއްވި އިރު ރައީސް ނަޝީދު ގެންދެވީ، ނަމެއް ވިދާޅު ނުވި ނަމަވެސް ހާމަކަން ބޮޑު ގޮތެއްގައި ފައްޔާޒާ ދެކޮޅަށް މަސައްކަތް ކުރައްވަމުންނެވެ. އެހެންކަމުން ޕާޓީގެ އެތެރޭގައި އޮތް ވާދަވެރިކަން އުފެދިފައި އޮތީ “އަންނި”ގެ ސަޕޯޓަރުންނާއި “އިބޫ”ގެ ސަޕޯޓަރުންގެ މެދުގައެވެ. އަދި އިންތިހާބު ވެސް އޮތީ “އަންނި” އާއި “އިބޫ” އާ ދެމެދުގައެވެ.

ހޮނިހިރު ދުވަހުގެ ނަތީޖާތައް ދައްކާ ގޮތުން ފައްޔާޒު އިންތިހާބު ކާމިޔާބުކުރެއްވީ ބޮޑު ތަފާތަކުންނެވެ. ވަގުތީ ނަތީޖާ ދައްކާ ގޮތުން ވެސް 58 ޕަސެންޓަށް ވުރެ ގިން މެންބަރުން ފައްޔާޒަށް ތާއީދުކޮށްފައި ވެއެވެ. އަނެއްކޮޅުން މި ފަހަރުގެ އިންތިހާބު ވެފައި ވަނީ އެމްޑީޕީގެ ތާރީހުގައި ވެސް އެންމެ ގިނަ އަދަދެއްގެ މެންބަރުން ވޯޓުލީ އިންތިހާބަށެވެ. މޫސުން ގޯސް ނަމަވެސް ގާތްގަނޑަކަށް 50 ވަރަކަށް ހާސް މީހުން ވޯޓުލާން ނުކުމެފައި ވެއެވެ. މިއީ ވެސް އެތައް ގޮތަކުން ޕާޓީ އަށް ލިބުނު ކުރިއެރުމެކެވެ.

ޕާޓީގެ ދަފްތަރުގައި ތިބި 90 ހާހަށް ވުރެ ގިނަ މެންބަރުންގެ ތެރެއިން ދެ ބައިކުޅަ އެއްބައި ވަރަކަށް މީހުން ނުކުމެ ޕާޓީގެ ކުރިމަގާ މެދު އެ ވަނީ ގޮތް ނިންމާފައެވެ. މި އިންތިހާބުގައި ސުވާލުކުރެވުނީ ހަމައެކަނި ޕާޓީގެ ޗެއާޕާސަންގެ މަގާމު ދޭނެ ބޭފުޅަކާ ބެހޭ ގޮތަކުން ނޫނެވެ. ރިޔާސީ އިންތިހާބުގައި ޕާޓީން ތާއީދުކުރާނީ ކޮން ބޭފުޅަކަށްތޯ ނުވަތަ މިހާރު ރައީސް އިބްރާހީމް މުހައްމަދު ސޯލިހަށް އަދި އެއް ދައުރު ވެރިކަންކުރުމުގެ ފުރުސަތު ދޭނީތޯ ވެސް މި އިންތިހާބުގައި އެ ވަނީ ސުވާލުކުރެވި، އެއް އަށް ޖަވާބު ލިބިފައެވެ. މި ސުވާލަށް މަޖިލީހުގެ މެންބަރުންގެ މެދުގައި މާކުރިން ވަނީ ގޮތެއް ނިންމާފައެވެ. މެންބަރުންގެ ބޮޑު މެޖޯރިޓީއެއް ވަނީ ރައީސް ސޯލިހާއެކުގައެވެ. ނޭނގި އޮތީ އާންމު މެންބަރުންގެ ވިސްނުމެވެ. ހޮނިހިރު ދުވަހުގެ އިންތިހާބުން އެ ވަނީ އެކަން ކަށަވަރުކޮށްދީފައެވެ.

ޗެއާޕާސަންގެ ކެމްޕެއިންގެ ތެރޭގައި ކުރެވުނު ބަހުސްތަކުގައި ދެ ކެންޑިޑޭޓުންނާ ވެސް އެ ސުވާލު ކުރެވުނެވެ. ވަރަށް ފާޅުގައި ތަކުރާރުކޮށް ފައްޔާޒު ވިދާޅުވީ 2023ގެ ރިޔާސީ ޓިކެޓް ރައީސް ސޯލިހަށް ދިނުމަށް ތާއީދުކުރައްވާ ކަމަށެވެ. އަދި އިންތިހާބުގައި ފައްޔާޒަށް ދޭ ވޯޓަކީ ވެސް މި ސަރުކާރު ދެ ވަނަ ދައުރަކަށް ގެނައުމަށް ދެވޭ ވޯޓެއްގެ ގޮތުގައި ވެސް ސިފަކުރައްވާފައި ވެއެވެ. އިންތި ތަކުރާރުކޮށް ވިދާޅުވަމުން ގެންދެވީ އެކަން ކަނޑައަޅާނީ ޕްރައިމަރީއަކުން ކަމަށެވެ.

ޕްރައިމަރީއެއްގެ ވާހަކަ އެންމެ ބޮޑަށް ދައްކަވަނީ ރައީސް ނަޝީދާއި އެމަނިކުފާނަށް ތާއީދުކުރައްވާ ބޭފުޅުންނެވެ. ނަމަވެސް ރައީސް ސޯލިހުގެ ފަޅީގައި ތިއްބެވި ގިނަ ބޭފުޅުން ދެކެވަޑައިގަންނަވާ ގޮތުގައި ޕާޓީގެ އަސާސީ ގަވާއިދަށް ރައީސް ނަޝީދުގެ ތާއީދާ އެކު ގެންނެވި އިސްލާހުގައިވާ ގޮތުން އެމްޑީޕީގެ ރައީސަކަށް ދެ ވަނަ ދައުރަކަށް ވާދަކުރުމުގެ ޓިކެޓް ޕްރައިމަރީއަކާ ނުލައި ދޭންޖެހެއެވެ. މިއާ ދެކޮޅަށް ވާހަކަ ދައްކާ ފަރާތްތަކުން ބުނަމުންދަނީ 2018 ވަނަ އަހަރުގެ ރިޔާސީ އިންތިހާބުގެ ރިޔާސީ ޓިކެޓް ދިނުމަށް އާންމު މެންބަރުން ނިންމާފައި ވަނީ ރައީސް ނަޝީދަށް ކަމަށެވެ. ކަން ދިމާކުރި ގޮތުން އެމަނިކުފާނަށް އިންތިހާބުގައި ވާދަކުރުމުގެ ފުރުސަތު ލިބިވަޑައިނުގެން ކޮންގްރެސް އިން އެ ޓިކެޓް ރައީސް ސޯލިހަށް ދެއްވީ ކަމަށެވެ. އެހެންކަމުން އަލުން ޕްރައިމަރީއެއް ބާއްވަންޖެހޭނެއެވެ. އަސަސީ ގަވާއިދުގައި މިހާލަތަށް ރިއާޔަތްކޮށްފައެއް ނުވެއެވެ.

ޕްރައިމަރީއެއް ބޭއްވުމާ މެދު ގޮތް ނިންމުމުގެ ބާރު އޮތީ ކޮންގްރެސްއަށެވެ. އެއްބަޔަކު ދެކޭ ގޮތުގައި ހޮނިހިރު ދުވަހު ބޭއްވި އިންތިހާބާއި އަދި އޭގެ ކުރިން ގައުމީ މަޖިލިސް ކަނޑައެޅުމަށް ބޭއްވި އިންތިހާބުގައި ވެސް ރައީސް ސޯލިހުގެ ފަޅިއަށް ބޮޑު ކާމިޔާބެއް ލިބިފައިވުމުން ޕްރައިމަރީއެއްގެ ވާހަކަ ދައްކާ ފަރާތްތަކުގެ ބަހުގައި މާ ބޮޑު އޮއްޓަރެއް ނެތެވެ. އަދި ހާއްސަކޮށް ހޮނިހިރު ދުވަހުގެ ބައްޔަށް ފަހު ޕްރައިމަރީ އަށް ވަކާލާތުކުރުމުގެ މާބޮޑު ބޭނުމެއް ވެސް މިހާރު ނެތެވެ. އާންމު މެންބަރުން އެ ވަނީ ގޮތެއް ކަނޑައަޅާފައެވެ. ބޮޑު އަގުލަބިއްޔަތަކުން 2023ގައި އެމްޑީޕީން ރިޔާސީ އިންތިހާބުގައި ވާދަކުރާނީ “އިބޫ” ކަމަށް މެންބަރުން އެ ވަނީ ނިންމާފައެވެ. ދެން ކުރަން އޮތް މަސައްކަތަކީ ވާދަވެރިކަން އެއްފަރާތެއްގައި ބާއްވާފައި އެމްޑީޕީގެ ވެރިކަން ދެމެހެއްޓުމަށާއި ކުރިއަށް އޮތް ދައުރުގައި ވެސް އެމްޑީޕީގެ ވެރިކަމެއް ގެނައުމަށް މަސައްކަތްކުރުމެވެ. ޕްރައިމަރީއެއްގެ އަވާގައި ޖެހި ޕާޓީ ބައިބައިވުމަށް ފުރުސަތު ނުދީ އަސާސީ ގަވާއިދުގައިވާ ގޮތަށް އަދި އާންމު މެންބަރުން ނިންމި ގޮތަށް ރައީސް ސޯލިހާ އެކު ރިޔާސީ އިންތިހާބަށް އެކަތިގަނޑެއްގެ ގޮތުގައި މަސައްކަތް ފަށަންވީއެވެ.