މޫދުން ނުފެންނާނެ ޕްލާސްޓިކެއްވެސް މިހާރު ނެތް

މޫދަށް އެކި ބާވަތްތަކުގެ ޕްލާސްޓިކް އަޅައިގެން އަބަދުވެސް ސޯސަލް މީޑިއާގައި އެކަމުގެ ކަންބޮޑުވުން ފާޅުކުރެއެވެ. މިއީ މޫދުގެ އެކި ދިރުންތަކާއި އަދި އިންސާނުންގެ އަމިއްލަ ސިއްހަތައްވެސް މީގެ ސަބަބުން ގެއްލުން ކުރިމަތިވާ ކަމެކެވެ.

ދާދިފަހުން ސޯސަލް މީޑިއާގައި އޯޝަނިކް ބަޓްލަރއިން ވަނީ ސިއްހަތައް ގެއްލުންވާ ކެމުކަލްއާއި އަދި ޕްލާސްޓިކް ހިމެނޭ “ބަޔޯރ ހަޒާޓް” ޕްލާސްޓިކް ކޮތަޅެއް ވިލިމާލެ މޫދު ސަރަހައްދުން ފެންނަ ފޮޓޯއެއް ހިއްސާކޮށްފައެވެ. މި ޕޯސްޓްގައި އޯޝަނިކް ބަޓްލަރއިން ބުނެފައިވަނީ ވޭސްޓް މެނޭޖްކުރުމުގައި ރާއްޖޭގައި ގިނަ ގޮންޖެހުންތަކެއް ހުރިކަމަށެވެ. އަދި މިކަން ރަނގަޅުނުވާކަން ވަނީ ފާހަގަކޮށްފައެވެ. މިހާރު މި މައްސަލަ ބޮޑުވަމުންގޮސް މޫދުން “ބަޔޯރ ހަޒާޓް” ޕްލާސްޓިކް ކޮތަޅު ފެންނަ ހިސާބަށް ގޮސްފައިވާކަމަށް އެ ޖަމިއްޔާއިން ވަނީ ބުނެފައެވެ.

advertisement

އޯޝަނިކް ބަޓްލަރއިން ބުނެފައިވަނީ ވިލިނގިލީ ހޮސްޕިޓަލުން މިކަން ވަރަށް ސީރިއަސް މައްސަލައެއްގެ ގޮތުގައި ބަލަންޖެހޭ ކަމަށެވެ. އަދި މިއީ އީޕީއޭއިންވެސް ބަލަންޖެހޭ މައްސަލައެއްގެ ގޮތުގައި ވަނީ ފާހަގަކޮށްފައެވެ. ވިލިނގިލީ މޫދު ސަރަހައްދުން ފެނިފައިވަނީ ކޯވިޑް ސާންޕަލް ނެގުމަށްފަހު ސާންޕަލް ލާންގެންގުޅޭ ކޮތަޅެވެ. މިއީ ސިއްހަތައް ގެއްލުންވާ މާއްދާތަކެއް އެކުލެވޭ އެއްޗެކެވެ.

މޫދަށް މިފަދަ ޕްލާސްޓިކްތައް އުކުމުގެ ސަބަބުން މޫދުގެ އެކިއެކި ދިރުންތަކަށް ގެއްލުން ލިބެއެވެ. އެގޮތުން މޫދުގައި އުޅޭ މަސްމަހާމެހި މި ޕްލާސްޓިކްތައް ކެވުމުގެ ސަބަބުން އަދި އެ މަސްތައް ކެއުމުގެ ސަބަބުން އިންސާނާގެ ހަށިގަނޑަށް ގެއްލުން ލިބެއެވެ. އެހެންކަމުން ޕްލާސްޓިކްގެ މިފަދަ އުފެއްދުންތައް ރައްކާތެރިކަމާއިއެކު ނައްތާލަންޖެހެއެވެ.