4 އަހަރުގެ ކުއްޖަކަށް ގަލޮޅު މަދަރުސާގައި ޖިންސީގޯނާކުރި މައްސަލައިގައި ސްކޫލަށް ކުއްޖާގެ މައިންބަފައިންގެ ތުހުމަތުތަކެއް

ގަލޮޅު މަދަރުސާގައި ތައުލީމު ހާސިލްކުރަމުންދިޔަ އުމުރުން 4 އަހަރުގެ ކުއްޖަކަށް އެ ސްކޫލްގައި ޖިންސީ ގޯނާކުރުމުގެ ހާދިސާގައި ސްކޫލުގެ ގިނަ އިހުމާލުތަކެއް ހުރިކަމަށް އެ ކުއްޖާގެ މައިންބަފައިން ތުހުމަތުކޮށްފިއެވެ.

މި ކުއްޖާއަށް ޖިންސީ ގޯނާގެ މި އަމަލު ހިނގާފައިވަނީ 13 އޮކްޓޯބަރ 2021 ގައެވެ. 12 މޭ 2022 ގައި މިކަމާއި ގުޅޭގޮތުން ސްކޫލުން ވަނީ ނޫސްބަޔާނެއް ނެރެފައެވެ. މި ނޫސްބަޔާން ނެރެފައިވަނީ ކަމުގެ ހަޤީގަތާއި ހިލާފު މައުލޫމާތުތަކެއް ހިމަނައިގެންކަމަށާއި މި ހާދިސާގައި ކަން ހިނގާފައިވާ ގޮތް އޮޅޭގޮތައްކަމަށް ކުއްޖާގެ ބެލެނިވެރިން ވަނީ ބުނެފައެވެ. ކުއްޖާގެ ބެލެނިވެރިންވެސް ވަނީ މިކަމާއި ގުޅޭގޮތުން ނޫސްބަޔާނެއް ނެރެފައެވެ. މި ނޫސްބަޔާނުގައި ބުނެފައިވާ ކަންކަން:

advertisement

ސްކޫލުން ނެރުނު ނޫސްބަޔާނުގައި މި ހާދިސާއާއި ގުޅިގެން ސްކޫލްގެ ފަރާތުން އަވަސް ފިޔަވަޅުތަކެއް އަޅާފައިވާނެކަމަށާއި މިކަމުގައި އެންމެ އިސްކަމެއް ދީފައިވާނީ ދަރިވަރުންގެ ސަލާމަތާއި ރައްކާތެރިކަން ކަށަވަރުކުރުމަށްކަމަށް ބަޔާންކޮށްފައިވާތީ ކުއްޖާގެ މައިންބަފައިން ފާހަގަކޮށްފައިވާ ކަންތައްތައް:

ކުއްޖާއަށް ޖިންސީގޯނާ ކޮށްފައިވާކަން ކުއްޖާގެ މައިންބަފައިންނަށް އެނގިފައިވަނީ 12 އޮކްޓޯބަރ 2021 ގައި ސްކޫލުން ގެއަށް އައުމަށްފަހު ސްކޫލްގެ މުވައްޒަފަކު ޖިންސީ ގޯނާކޮށްފައިވާކަމަށް ކުއްޖާގެ މަންމަ ގާތުގައި ބުނުމުންނެވެ. މި ހާދިސާގެ މައުލޫމާތު ކުއްޖާގެ ކުއްޖާގެ މައިންބަފައިންނަށް ލިބުމާއިއެކު ވަގުތުން އެކަން ސްކޫލްގެ ސަމާލުކަމަށް ގެނެސްފައިވާކަމަށް ވަނީ ބުނެފައެވެ.

މި ހާދިސާއާއި ގުޅިގެން އެކަށޭނެ އަވަސް މިނެއްގައި ސްކޫލްގެ ފަރާތުން ފިޔަވަޅެއް އަޅާފައިވާކަން އެނގެން ނެތްކަމަށް ކުއްޖާގެ މައިންބަފައިން ވަނީ ބުނެފައެވެ. ހާދިސާ ހިނގައިދިޔަގޮތް ބަލައި މައްސަލައަށް ހައްލެއް ގެނައުމަށްޓަކައި ސްކޫލްގެ ފަރާތުން ފިޔަވަޅެއް އަޅާފައިވަނީ ކަން ހިނގައިދިޔަގޮތް ބެލުމުގައި އިންތިހާއަށް ލަސްވަމުންދާތީ އެކި ފަރާތްތަކުން އެކަމުގެ ކަންބޮޑުވުން މީޑިއާގައި ފާޅުކުރުމުންކަމަށް ކުއްޖާގެ ބެލެނިވެރިން ތުހުމަތުކުރެއެވެ.

ޖިންސީ ގޯނާގެ ތުހުމަތުކުރެވޭ މުވައްޒަފު ހޯދައި ސްކޫލްގެ އެހެން ދަރިވަރުން އެ މުވައްޒަފުގެ ޝިކާރައަކަށްވުމުން ސަލާމަތްކުރުމަށް މަސައްކަތް ކުރުމުގެ ބަދަލުގައި ސްކޫލުން މަސައްކަތް ކޮށްފައިވަނީ ސްކޫލްގެ ވަކި މުވައްޒަފުންތަކެއް މިކަމުން ބަރީއަތްވެގެންވާކަން ހާމަކުރުމަށްކަމަށް ވަނީ މި ބަޔާނުގައި ބުނެފައެވެ.

މިފަދަ ބަޔާނެއް ނެރުމަށް ކުއްޖާގެ މައިންބަފައިންނަށް މަޖުބޫރުވީ މިއީ އެތައް ކުދިންނެއްގެ ރައްކާތެރިކަމާއި ގުޅިފައިވާ މައްސަލައަކަށްވެފައި ސްކޫލްގެ މުވައްޒަފަކާއިމެދު ކަންބޮޑުވުމެއް ނެތްކަމަށް ގަލޮޅު ސްކޫލުން ބުނުމުންކަމަށް ވަނީ ބުނެފައެވެ. ތުއްތު ކުއްޖަކަށް ސްކޫލްގައި މިފަދަ އަނިޔާއެއް ލިބިފައިވާއިރު މި ހާދިސާގައި ޝާމިލްވާ އެއްވެސް މުވައްޒަފަކާއިމެދު ކަންބޮޑުވުމެއް ނެތް ކަމަށް ބެލުމަކީ އެ މުވައްޒަފުން ސްކޫލްގެ މާހައުލަށް ނެރެ މިފަދަ ހާދިސާއެއް ތަކުރާރުވުމުގެ ފުރުސަތު ބޮޑުވާނެކަމެއްކަމަށް ވަނީ ބުނެފައެވެ.

ކުއްޖާގެ ބެލެނިވެރިން ބުނެފައިވަނީ ހާދިސާއާއި ގުޅިގެން ކުއްޖާއަށް ނަފްސާނީ ގޮތުންނާއި ޖިސްމާނީގޮތުން އަނިޔާ ލިބިފައިވާކަމަށެވެ. ކުއްޖާއަށް ލިބުނު ޖިސްމާނީ އަދި ނަފްސާނީ އަނިޔާތަކަށް ވަނީ ފަރުވާ ހޯދާފައެވެ. ނަމަވެސް މިއީ މުޅި އުމުރުދުވަހަށް އެކަމުގެ ލަކުނު ހުންނާނެ ކަމެއްކަމަށް ކުއްޖާގެ ބެލެނިވެރިން ވަނީ ބުނެފައެވެ.