ކައިވެނި ރޫޅުމަށްފަހު ދަރިންނަށް އަޅާނުލާ ބަފައިން، ރާއްޖޭގައި ބޮޑުވެއްޖެ މައްސަލައެއް!

ރާއްޖެއަކީ  އާބާދީގެ ނިސްބަތުން ބަލާއިރު ވަރީގެ އަދަދު އެންމެ ގިނަ ޤައުމެކެވެ. މިއީ ރާއްޖޭގައި އޮތް އެކަމަކު އަހަރެމެން ބޭނުންނުވާ ދުނިޔޭގެ ރެކޯޑެކެވެ.

އެންމެ ވަރި ގިނަ ގައުމުގެ ރެކޯޑު 2014 ވަނަ އަހަރުން ފެށިގެން އޮތީ ދިވެހިރައްޖޭގައެވެ. ދުނިޔޭގެ ރެކޯޑު ފޮތުގައި ވަނީ، ރާއްޖޭގައި ކޮންމެ 1000 ރައްޔިތަކަށް އަހަރަކު 10.97 އިންސައްތަ ވަރި، ނިސްބަތުން ބަލާނަމަ ކުރާ ކަމަށެވެ. ރާއްޖެ ފިޔަވާ ދެވަނައަށް އެންމެ ވަރި ގިނަ ގައުމަކީ ބެލަރޫސް އެވެ. އެ ގައުމުގެ ވަރީގެ ރޭޓަކީ ކޮންމެ 1000 މީހަކަށް އަހަރަކު 4.63 ވަރި އެވެ.

advertisement

ރާއްޖޭގައި ކޮންމެ އަހަރަކުވެސް ވަރީގެ ނިސްބަތް އުޅޭނީ ވަރަށް މަތީގައެވެ. 2018 ވަނަ އަހަރަށް ވުރެ 2019 ވަނަ އަހަރު ރާއްޖޭގައި ކުރެވުނު ވަރީގެ ނިސްބަތް 60 އިންސައްތަ ވަނީ އިތުރުވެފައެވެ. ޑީޖޭއޭއިން އާންމުކުރި ތަފާސް ހިސާބުތަކުން ދައްކާގޮތުން، 2019 ވަނަ އަހަރު ކޮށްފައި ވަނީ 5117 ވަރިއެވެ. އެއީ ނިސްބަތުން ދުވާލަކު 14 ވަރިއެވެ. 2018 ވަނަ އަހަރު ރާއްޖޭގައި ކޮށްފައި ވަނީ 3166 ވަރިއެވެ. އެހެންކަމުން 2018 ވަނަ އަހަރާ އަޅާބަލާއިރު 2019 ވަނަ އަހަރު ކުރި ވަރީގެ އަދަދު ވަނީ 61.6 ޕަސެންޓު އިތުރުވެފަ އެވެ.

މިދިޔަ 2021 ވަނަ އަހަރަށް ބަލާއިރުވެސް ރާއްޖޭގައި ވަރީގެ ނިސްބަތް އުޅެނީ ވަރަށް މަތީގައެވެ. މިދިޔަ އަހަރު 2399 ކައިވެނި ފެމެލީ ކޯޓުން ކޮށްދީފައިވާއިރު އޭގެ ދެބައިކުޅަ އެއްބަޔާ ގާތަށް ވަރިކޮށްފައިވާ ކަމަށް އެ ކޯޓުގެ ތަފާސްހިސާބުތަކުން ދައްކައެވެ. އެއީ 1192 ވަރިއެވެ.

ކައިވެންޏަށްފަހު ދެމީހުންނަށް ދިރިއުޅުން ކުރިއަށްނުގެންދެވިއްޖެނަމަ ވަރިއަކީ ކުރުން ހުއްދަވެގެންވާ ކަމެކެވެ. ނަމަވެސް ވަރިއާއި ހަމައަށް ނުގޮސް ވޭތޯ މަސައްކަތްކުރަންޖެހެއެވެ. ރާއްޖޭގައި ގިނަފަހަރު ވަރިއާއި ހިސާބަށް ދާއިރު ކައިވެންޏަށް ދަރިންވެސް ތިބެނީ ލިބިފައެވެ. އެހެންކަމުން ވަރިއަކީ ކުދިންނަށްވެސް މީގެ ސަބަބުން ނޭދެވޭ ގިނަ އަސަރުތަކެއް ކުރުވާ ކަމެކެވެ.

ވަރިވުމަށްފަހު އާންމުގޮތެއްގައި ދަރިފުޅު އުޅޭނީ މަންމަ ގާތުގައެވެ. ވަކި މީހެއްގެ ގާތުގައި ދަރިފުޅު ހުރިނަމަވެސް އެ ކުއްޖާއަށް މަންމައާއި ބައްޕަގެ ފަރާތުން ލިބެންޖެހޭ ލޯތްބާއި، އަޅާލުމާއި، އެކުއްޖާއަށް ކޮށްދޭންޖެހޭ ކަންތައްތައް ބަރާބަރަށް ކޮށްދޭންޖެހެއެވެ. ނަމަވެސް ގިނަފަހަރު ކަންތައްތައް ވެގެންދާތަން ފެންނަނީ މިގޮތަކަށްނޫނެވެ.

ވަރިއަށްފަހު ރާއްޖޭގައި ދަރިންނަށް އަޅާނުލާ ބަފައިން ވަރަށް ގިނައެވެ. މާލީގޮތުންވެސް ދަރިންނަށް ހަރަދު ނުކުރާ ބައްޕައިން ގިނައެވެ. ހަރަދު ނުދިނުމުގެ ސަބަބުން ދަރިފުޅަށް ކޮންމެ މަހަކު ދިނުމަށް ކޯޓުން އަމަރުކުރާ ފައިސާ ނުދޭ ބަފައިންވެސް ގިނަކަން ފާހަގަކުރެވެއެވެ.

ދަރިންނަށް ހަރަދުނުކޮށް ތިމާއާއި ގުޅުމެއްނެތް އެހެން މީހުންނަށް ހަރަދުކޮށް ބޭކާރުގޮތުގައި އެ ފައިސާ ބޭކާރުކުރާ ފިރެހެނުންވެސް އަހަރެމެންގެ މި މުޖްތަމައުން ފެނެއެވެ. ދަރިންނަށް ކޯޓުން ދޭން އަމުރުކޮށްފައިވާ ފައިސާ ނުދީ އެއަދަދު ބޮޑުވެ އެހެން ކައިވެންޏެއް ނުކުރެވިފައިތިބި މީހުންވެސް އެބައުޅެއެވެ. މިއީ ވަރަށް ހިތާމަހުރި ބޮޑުވެއްޖެ އިޖްތިމާއި މައްސަލައެކެވެ.

ދަރިން ހޯދަނީ ވަކި މީހަކު ބުނެގެނެއް ނޫނެވެ. އެހެންކަމުން ދަރިން ލިބޭ ހިސާބުން ފެށިގެން އެއީ ތިމާގެ ޒިންމާއެކެވެ. އެ ޒިންމާއަށް ރައްކާތެރިވާންޖެހެއެވެ. ދަރިފުޅަށް ބޭނުންވާ ހުރިހައި ކަމެއް ބައްޕައެއްގެ ހައިސިއްޔަތުންކޮށްދޭންޖެހެއެވެ. އެއީ އަދި ކައިވެނި ރޫޅުނުނަމަވެސްއެވެ.

ހަރަދު ނުދިނުމުގެ ވާހަކަ ބާއްވާފައި، އޭގެ އިތުރުން، ދަރީންނާއެކު ވަގުތު ހޭދަ ނުކުރާ ބައްޕައިންގެ ވާހަކައަކީވެސް ގިނަ މީހުން ދައްކާ، ދައްކާ ފޫހިވެފައިވާ ވާހަކަ އެކެވެ. މީގެ ތެރޭގައި ވަރި ނުވެ، ކައިވެނިކޮށްގެން އުޅޭ ބައްޕައިންގެ ވާހަކަވެސް ހިމެނެ އެވެ. މަންމަ އާއި ބައްޕަ ކައިވެނިކޮށްގެން އެކީގައި އުޅުނަސް، ބައްޕައިން ދަރީންނަށް ދޭންޖެހޭ އަޅާލުމާއި، ވަގުތާއި އެޓެންޝަން ނުލިބޭ ކުދިން ރާއްޖޭގައި ގިނަ އެވެ.

ކަންމިހެން އޮތްނަމަވެސް ކައިވެންޏަށް ފަހުގައިވެސް ދަރިންނަށް އަޅާލާ ބަރާބަރަށް ދަރިންގެ ކަންތައްތައް ބަލަހައްޓާ ބަފައިން އަހަރެމެންގެ މި މުޖްތަމައުގައި އުޅޭކަން އުފަލާއިއެކު ފާހަގަކުރަމެވެ. އެމީހުންނަކީ މިފަދަ ބައްޕައިންނަށް ހުރި ލާމަސީލު ނަމޫނާއެކެވެ.