ޖިންސަށް ނިސްބަތްކޮށް މަސައްކަތާއި ސިފަތައް ގިންތިކުރުން އަދިވެސް ކުރިއަށް

ފުރާވަރުގެ ދުވަސްވަރަކީ މީހާ ބާލިޣުވެ ތަޞައްރަފު ފުދި، ބޮޑުމީހަކަށްވުމާއި ދޭތެރޭ ކޮންމެ މީހަކާއިވެސް ކުރިމަތިވާ ޢުމުރުގެ ދައުރެކެވެ. ވިސްނުމަށާއި މިޒާޖަށް އަވަސް ބަދަލުތަކެއް އައިސް ޢާއިލީ އިންތަކުން ބޭރުވެ، ދިރިއުޅުމުގެ ކޮންޓްރޯލް އަމިއްލައަށް ނަގަން ބޭނުންވާ ހިސާބަކީވެސް މިއެވެ.

ފުރާވަރުގައި އަންނަ ނަފްސާނީ އަދި ޖިސްމާނީ ބަދަލުތަކާއިއެކު އެހެންމީހުން ދެކޭގޮތާއި އެހެންމީހުންގެ ވިސްނުމާއި އުޅުމާއިމެދު ވިސްނުން އިތުރުވެއެވެ. އަޅާކިޔުމުގެ ފިކުރީ ތުރާތަކެއްގެ ސަބަބުން ހިތްތަކަށް ނުތަނަވަސްކަން ގެނުވައެވެ. ކިތަންމެ ވިސްނައިގެން ބަލައި ބޮޑު ކޮށްފައި ހުންނަ ކުއްޖަކަށްވެސް ޖައްސާނެ ލައްކަ މައްސަލަ ފެންނާނެއެވެ.

advertisement

ފުރާވަރުގެ ދުވަސްވަރު ކޮންމެ ކުއްޖަކުވެސް އެކުއްޖަކީ ކާކުކަން ދެނެގަނެ އެކުއްޖެއްގެ އަމިއްލަގޮތް ކަނޑައެޅުމަށް މަސައްކަތްކުރެއެވެ. އެހެންގޮތަކަށް ބުނާނަމަ އަމިއްލަ ‘އައިޑެންޓިޓީއެއް’ ޤާއިމްކުރަން ބޭނުންވެއެވެ. މިހެން މިވަނީ އިންސާނާއަށް އަންނަ ނިއުރޯޑިވެލޮޕްމެންޓަލް އަދި ހޯމޯނަލް ބަދަލުތަކެއްގެ ސަބަބުންކަމަށް ދިރާސާވެރީން ބުނެއެވެ.

މުޖްތަމަޢުއިން ނަގައިދެނީ ކޮންފިލާވަޅުތަކެއްތަ؟

ފުރާވަރަށް އެޅުމުގެ ކުރިން ކޮށްއުޅުނު ބައެއް ކަންކަން ފުރާވަރަށް އެޅުމުން ކުދިން ހުއްޓައިލާކަން ފާހަގަކުރެވޭ ހެއްޔެވެ؟ މިސާލަކަށް އަމިއްލައަށް ސައިތައްޓެއް ހަދާލަން ނުވަތަ އޮފީހަށް ދާން ހެދުން އިސްތިރިކޮށްލުން ފިރިހެން ކުއްޖަކަށް އުނދަގޫވާ ހިސާބަށް އައިސްދާނެއެވެ. ޢާއިލީ ބައްދަލުވުންތަކުގައި ޚިޔާލުފާޅުކޮށް ވާހަކަދެއްކުން އަންހެން ކުއްޖަކަށް ދަތިވާތަން ފެނިދާނެއެވެ. މިއީ ކިހިނެތްވާކަމެއް ހެއްޔެވެ؟

އަންހެން ކުއްޖަކަށް ވީތީ ޚިޔާލެއް ހުށަހަޅާލުން ނުވަތަ ފިރިހެން ކުއްޖަކަށްވީތީ އެއްޗެއް އިސްތިރިކޮށްލުން އެއީ މައްސަލައެއް ހެއްޔެވެ؟ މިއީ 21 ވަނަ ގަރުނުގައިވެސް ދިވެހިންގެ ތެރޭގައި ބޮޑު މައްސަލައެކެވެ. ކުދި ބަދަލުތައް ފާހަގަކުރެވުނު ނަމަވެސް ‘ޖެންޑަރ ސްޓީރިއޯޓައިޕިން’ ދިވެހިންގެ ތެރެއަކުން ފިލައިނުދެއެވެ.

މިކަން ބަލައިލާނަމޭ ހިތާ ރަޙްމަތްތެރިއަކަށް ގުޅާލީމެވެ. ވާހަކަ ދައްކަމުންގޮސް ވަރަށް އަންހެންވަންތަ ސިފަތަކެއް ކިޔާލަބަލާށޭ ރަޙްމަތްތެރިޔާ ކައިރިން އަހާލީމެވެ. ލިސްޓް ދިގަސް ހީކޮށްގެން ހުރި ގޮތާއި ވަރަށް އެއްގޮތް ސިފަތަކެއް ރަޙްމަތްތެރިޔާ ކިޔާލިއެވެ. މަޑުމައިތިރިކަމާއި، ހިތްހެޔޮކަމާއި، ލަދުވެތިކަމާއި، ވަފާތެރިކަމާއި، ރަކިކަމާއި، ގެވެހިކަމާއި، ކެތްތެރިކަމާއި އޯގާތެރިކަމަކީ ރަޙްމަތްތެރިޔާ އަށް ޤަބޫލުކުރެވުނު އަންހެންވަންތަ ސިފަތަކެވެ.

ފިރިހެންވަންތަ ސިފަތަކެއް ކިޔަލާށޭ ބުނާއިއިރަށް ހަމަ އަނެއްކާވެސް ލިސްޓެއް ކިޔާލައިފިއެވެ. މިފަހަރު ލިސްޓުން ޖާގަލިބުނީ ކެރޭ، މުރާލި، ވަރުގަދަ، ޒިންމާދާރު އަދި ކަންކަމަށް އިސްނަގަން ފަސްނުޖެހުން ފަދަ ސިފަތަކަށެވެ. މިއީ ހަޤީޤަތުގައިވެސް އަހަރެމެންގެ ވިސްނުންތޯ އަހަރެން ހިތާހިތާ ސުވާލުކޮށްލީމެވެ.

ސަގާފަތް ބަދަލުކޮށް މުޖްތަމަޢަށް ބެލެންސެއް ގެނައުން

އަންހެނުންނާއި ފިރިހެނުން ދަރަޖަ ކުރުމާއި ސިފަކުރުމުގައި މުޖްތަމަޢުއިން މިގެންގުޅޭ ތަފާތުކުރުންތަކަކީ އޭގެ ޒާތުގައި އެއްވެސް ހަޤީޤަތެއްގެ މައްޗަށް ބިނާވެފައިވާ ތަފާތުތަކެއް ނޫނެވެ.

ޤުދުރަތީ ނިޒާމުން ދެޖިންސްގެ ދެމެދުގައި ލައްވާފައި ނުވާ އެތައް ސިފަތަކެއް މުޖްތަމަޢުއިން ދެޖިންސަށް ބަހާލައެވެ. ޖަނަވާރު ޝިކާރަކޮށް އުޅުނު ޒަމާނުގައި ޖާނުން ވަރުގަދަ ފިރިހެނުން ޝިކާރައަށް ދިޔުމާއި ގެންނަ ޖަނަވާރުން ކާނާ ތައްޔާރުކުރުން އޭރު އަންހެނުންނަށް ހާއްސަކުރީ ދެ ޖިންސަށް ހަމަހަމައަށް މަސައްކަތް ބެހުމަށޭ ބުނެވިދާނެއެވެ.

އެއީ އޭރަށް އޮތް އެންމެ އިންސާފުވެރިގޮތެވެ. އަންހެނުންނާއި ފިރިހެނުންގެ ހަމަހަމަ ކަމޭ ބުނާ ވާހަކައަކީ ބުއްދިއާއި ވިސްނުމުގެ ބާރުގެ ގޮތުން އަންހެނުން ވެސް ފިރިހެނުންވެސް ހަމަހަމަ ވާހަކައެވެ. އާމްދަނީ ހޯދަން މަސައްކަތް ކުރުމަށް ފުރުސަތު ފަހިކޮށްދިނުމުގައި ދެ ޖިންސު ހަމަހަމަ ކުރާ ވާހަކައެވެ. ދަރިން ބެލުމާއި ގޭތެރޭގެ މަސައްކަތުގައި ދެމީހުންގެ ހިއްސާ ހަމަހަމައަށް އޮންނަން ޖެހޭނެ ވާހަކައެވެ.

އަހަރެމެންގެ މުޖުތަމައުގައި އަދިވެސް މިންތީގެ ހަމަހަމަ ކަމަކީ ކޮބައިކަން ނޭނގޭ މީހުން ގިނައެވެ. ހަމަހަމަ ކަމޭ ބުނީމާ އެ ދައްކަނީ އަންހެނާ ފިރިހެނަކަށް ވާން ކުރާ މަސައްކަތް ކަމުގައި ދެކި މިންތީގެ ހަމަހަމަ ކަމުގެ ފަލްސަފާއަށް ހަޖޫ ޖަހާ މީހުން މި މިޖުތަމައުގައި އުޅެއެވެ.

އަދިވެސް ކެއްކުމަކީ އަންހެނުންގެ ޒިންމާއެއް ކަމަށް ދެކޭ ޒުވާނުންވެސް ގިނައެވެ. ކެއްކުމަކީ މީހާގެ ސަވައިވަލް އަށްޓަކައި ބޭނުންވާ ކާނާ ހޯދުމުގެ އެއްބައެވެ. އެއީ އިންސާނާގެ އަސާސީ ބޭނުމެކެވެ. މިހާ އަސާސީ ކަމަކަށް އެހެން މީހަކަށް ބަރޯސާ ވާ ނަމަ އެ މީހާ އެ ހުރީ ކައްކައިދޭ މީހާ ދަށުވެފައޭ ވެސް ބުނެވިދާނެ ނޫންހެއްޔެވެ؟ އަނބިދަށުވުމަކީ މިއީ ނޫންތޯއެވެ؟ އަނބިމީހާ ދިނިއްޔާ ނޫނީ ނުކެވި، ހެދުން ނުލެވި ހުންނަން ޖެހޭ މީހާ އެހުރީ ރަނގަޅަށް ދަށުވެގެން ނޫންހެއްޔެވެ؟ ތަހުޒީބީ މުޖުތަމައެއްގެ ގޮތުގައި ކުރިއެރުމަށްޓަކައި ޖިންސުގެ ތަފާތުކުރުންތައް ނައްތާލައި، މިންތީގެ ހަމަހަމަކަން ގާއިމުކުރުމަކީ އަސާސީ މުހިންމު ބަހާއެކެވެ.