ކުއްޖާގެ ސްކްރީން ވަގުތު މަދުކުރަން ކުރެވޭނެ ކަންކަން

މިހާރުގެ ކުޑަކުދިންނަކީ ސްކްރީނަށް ދެވިހިފާފައިވާ ކުދިންތަކެކޭ ބުނުމަކީ ދޮގަކަށް ނުވާނެއެވެ. ދިރިއުޅުމުގެ ވައްޓަފާޅި ހުންނަގޮތުން ކުދިންނަށް ދެވޭ ސްކްރީން ވަގުތުވެސް ބައެއް ފަހަރު އިތުރުވަނީއެވެ. ބެލެނިވެރިޔާ ވަޒީފާގައި ނުވަތަ ދިރިއުޅުމުގެ އެހެން ކަމެއްގައި ބިޒީކޮށް އުޅެން ޖެހުމުގެ ސަބަބުން ކުދިންނަށް ކްރީން ވަގުތު ދޭންޖެހެނީއެވެ. ނަމަވެސް ސްކްރީންގައި ކުދިން ހޭދަކުރާ ވަގުތު ލިމިޓް ކުރުމަކީ ވަރަށް މުހިންމު ކަމެކެވެ.

ކުދިން ސްކްރީނާ ދުރުކޮށް، “އިންޓަރެކްޓިވް” ހަރަކާތްތަކުގައި ޝާމިލް ކުރުމަކީ އެ ކުދިންގެ ސިކުނޑީގެ ކުރިއެރުމަށް އެންމެ ފައިދާ ހުރި ގޮތެެވެ. އެތައް އިރެއް ވަންދެން ކުއްޖާގެ ސަމާލުކަން ސްކްރީނަކަށް ދީގެން އިނުމުގެ ބަދަލުގައި، ސިކުނޑި ހިންގައިގެން ކަންކަން ކުރަން ޖެހޭ ނަމަ ކުއްޖާއަށް ގިނަ އެއްޗިސްތަކެއް ދަސްވެގެން ދާނެ އެވެ.

advertisement

މި އާޓިކަލްގައި މި ހިމަނާލަނީ “ސްކްރީން ޓައިމް” މަދުކޮށް ކުދިންގެ ފޫހިފިލާނެ ގޮތަށް ބެލެނިވެރިންނަށް ގޭގައި ހިންގިދާނެ ބައެއް ހަރަކާތްތަކެވެ.

ގޭމް ބޮކްސްއެއް ތައްޔާރުކުރެވިދާނެ

ގޭމް ބޮކްސްއަކީ ކުއްޖާއަށް ކުޅެވިދާނެ އެކި ކަހަލަ ކުޅިވަރުތަކާއި، ގޭމްތަކާއި، ޕަޒްލްތައް ފަސޭހައިން އެއް ތަނަކުން ފެނި “އެކްސެސް” ވެވޭނެ ގޮތަށް ބަހައްޓާ ފޮއްޓެކެވެ.

މިފަދަ ގޭމްސް ބޮކްސެއްގެ ތެރޭގައި ކުލަ ޖައްސާ ފޮތާއި، އުނޯ ފަދަ ކާޑް ގޭމްސްތަކާއި، ޕަޒްލް ހިމެނި ދާނެ އެވެ. ދަރިފުޅު ފޫހިވެގެން އުޅޭހެން ހީވާ ނަމަ ގޭމްސް ބޮކްސް މަތިން ހަނދާންކޮށްދޭށެވެ. އޭރުން ޓީވީއާ ދިމާލަށް ނުވަތަ ޕްލޭސްޓޭޝަނާ ދިމާލަށް ދިޔުމުގެ ބަދަލުގައި ގޭމް ބޮކްސްގެ އެކި ކުޅިވަރުތަކަށް ވަގުތު ހުސްކުރަން އާދަ ވާނެ އެވެ.

ގޭތެރޭގެ ކަންކަމުގައި ދަރިފުޅު ބައިވެރިކުރުވުން

ކުޑަ ކުދިންނަކީ އަބަދު ވެސް އާ ކަންކަން ދަސްކޮށް، އާ ތަޖުރިބާތައް ކުރާ ހިތްވާ ބައެކެވެ. މިކަން ސިކުނޑީގައި ބަހައްޓައިގެން ގޭ ތެރޭގައި ކުރާ މަސައްކަތްތަކުގައި ދަރިފުޅު ބައިވެރި ކުރާށެވެ. ކައްކާ ގަޑީގައި ދަރިފުޅުގެ އުމުރާ ގުޅޭ ގޮތަށް ކަންކަން ކުރަން ދޭށެވެ.

އޭގެ އިތުރުން ކައްކައި ނިމިގެން ތަށިތައް ދޮވުމުގައި ބައިވެރިކޮށް، ކާ ގަޑިއަށް މޭޒުމަތި ތައްޔާރު ކުރުމުގައި ވެސް ބައިވެރި ކުރެވިދާނެ އެވެ.

ޓްރެޝަރ ހަންޓް ގޭމް ކުޅުން

ގޭގެ ކޮންމެ ވެސް ތަނެއްގައި ދަރިފުޅު ޝައުގުވެރިވާ އެއްޗެއް ނުވަތަ އެއްޗެހިތަކެއް ފޮރުވާށެވެ. އަދި ވަކި ވަގުތެއްގެ ތެރޭގައި އެ ހޯދުމަށް ބުނެވިދާނެއެވެ. މިގޮތައް ފޮރުވާއިރު ޗޮކުލެޓު ފަދަ ކުއްޖާ ކާހިތްވާ ކަހަލަ އެއްޗެއް ފޮރުވިދާނެއެވެ. އެއިރުން އެ އެއްޗެއް ހޯދުމަށް ދަރިފުޅުގެ ޝައުގުވެރިކަން އިތުރުވާނެއެވެ.