އިންސިއުލިން ގެންގުޅެނީ ގޭގެ ފްރިޖްގަތަ؟ ރައްކާތެރިއެއް ނޫން!

ހަކުރު ބައްޔަކީ މިހާރު ވަރަށް ގިނަ މީހުން ތަހައްމަލްކުރަމުންދާ ބައްޔެކެވެ. އެކިއެކި ސަބަބުތަކަކާއިހުރެ ހަކުރު ބަލި ޖެހޭ މީހުންގެ އަދަދު ދަނީ އިތުރުވަމުންނެވެ.

ހަކުރު ބަލީގެ ސަބަބުން ގަވައިދުން އިންސިއުލިން ޖަހަންޖެހެއެވެ. އާންމުގޮތެއްގައި އިންސިއުލިން ރައްކާކޮށްފައި ހުންނަނީ ގޭގައި އާންމުކޮށް ބޭނުންކުރާ އައިސްއަލަމާރީގައެވެ. ނަމަވެސް ހަކުރު ބަލި ހުންނަ މީހުން ބޭނުންކުރަންޖެހޭ އިންސިއުލިން ގޭގެ އައިސްއަލަމާރީގައި ބެހެއްޓުން ބުއްދިވެރި ނޫން ކަމަށް ދިރާސާއަކުން ވަނީ ދައްކާފައެވެ.

advertisement

އިންސިއުލިން އަކީ ވަކި ފިނިހޫނުމިނެއްގައި ބަހައްޓަންޖެހޭ އެއްޗަކަށް ވާއިރު ގޭގެ ފްރިޖުގައި އެ ބަހައްޓައިގެން އުޅޭއިރު ފިނިހޫނުމިނަށް އަންނަ ބަދަލެއް އަދި އެކަމުގެ ސަބަބުން އިންސިއުލިންގެ މަސައްކަތަށް ބަދަލުތަކެއް އަންނަކަމެއް ގިނަ މީހުންނަކަށް ނޭނގެ އެވެ.

އިންސިއުލިން ފިނިކޮށްފައި ނަމަ ބަހައްޓަން ޖެހޭނީ 2-8 ޑިގްރީ ސެލްސިއަސްއާ ދެމެދުގަ އެވެ. އަދި އާންމުކޮށް ބޭނުންކުރުމަށް ވަޔަލް ގައި ނުވަތަ ޕެން ގައި ގެންގުޅޭ ނަމަ ފިނިހޫނުމިން ބަހައްޓަން ޖެހޭނީ 2-30 ޑިގްރީސެލްސިއަސްއާ ދެމެދުގަ އެވެ.

ހަކުރު ބަލި ހުންނަ މީހުން ގޭގެ ފްރިޖުގައި އެތައް މަހެއް ވަންދެން އިންސިއުލިން ގެންގުޅެ އެވެ. އަދި މިކަމުގެ ސަބަބުން އިންސިއުލިން އަށް ކޮށްފާނެ ނޭދެވޭ އަސަރާ މެދު މާބޮޑަށް ނުވިސްނާ ކަމަށް ވެސް ދިރާސާގައި ބުނެފައިވެ އެވެ.

އެމެރިކާ އާއި ޔޫރަޕްގައި އުޅޭ، ހަކުރު ބަލި ހުންނަ 388 މީހަކު އިންސިއުލިން ގެންގުޅޭ ފިނިހޫނުމިން ދުވާލަކު 480 އަށް ވުރެ ގިނަ ފަހަރު، 49 ވަންދެން ބަލައިގެން ކުރި ދިރާސާއިން އެނގުނު ގޮތުގައި 79 ޕަސެންޓް، ފިނިހޫނުމިން ހުންނަންޖެހޭ މިންގަނޑުން ބޭރުވެފައިވެ އެވެ.

މި ދިރާސާގައި ބުނެފައި ވަނީ ގޭގައި އިންސިއުލިން ގެންގުޅޭ ނަމަ އިންސިއުލިން ބަހައްޓާ ފްރިޖެއްގައި ވަކި ތާމޮމީޓަރެއް ހަރުކޮށް، ފިނިހޫނުމިން ރަނގަޅަށް ބެހެއްޓޭކަން ކަށަވަރުކުރަން ޖެހޭ ކަމަށެވެ.