ތާރީހުގެ ތެރެއިން: އިންޑިއާ ސަރުކާރާއި ރާއްޖެއާ އޮތް ގުޅުން

މީގެ 7 އަހަރު ކުރިން، ރައީސް އަބްދުﷲ ޔާމީނުގެ ވެރިކަމުގައި، އެމަނިކުފާނު އިންޑިޔާ ސަރުކާރަށް ތައުރީފުކޮށް ސަނާ ކިޔަމުން ވިދާޅުވެފައިވަނީ މިދިޔަ 50 އަހަރުގެ ތެރޭގައި އިންޑިއާއިން ރާއްޖެއަށް ބޮޑެތި އެހީތަކެއް ނުވި ނަމަ، ރާއްޖޭގެ މިނިވަންކަން އޮތީހީ ގެއްލިފައި ކަމަށެވެ.

 2015 ވަނަ އަހަރުގެ ސެޕްޓެމްބަރު ދެ ވަނަ ދުވަހު ނ. ލަންދޫ އިންޖީނުގެ ހުޅުވުމުގެ ރަސްމިއްޔާތުގައި، ޔާމީނު ވިދާޅުވެފައިވަނީ ރާއްޖެ އާއި އިންޑިއާޔާ ދެމެދު އޮތީ ދުރުނުވެވޭ ވަރުގެ ވަރުގަދަ ގުޅުމެއް ކަމަށާއި ޖީއެމްއާރަށް އެއާޕޯޓް ކުއްޔަށް ދިނުމުގައި އެ ކުންފުންޏާ ރާއްޖެއާ ދެމެދު މައްސަލަތަކެއް ދިމާވި ނަމަވެސް އެއީ އިންޑިއާ ސަރުކާރާ ރާއްޖެއާ ދެމެދު އޮންނަ ގުޅުމަށް ބުރޫއެރިކަމެއް ނޫން ކަމަށެވެ.

advertisement

“ރައްޔިތުންނަށް އެނގިވަޑައިގަންނަވާނެ އެންމެ އަސާސީ ކަންތައްތަކުން ފެށިގެން އިންޑިއާއިން ރާއްޖެއަށް ވަނީ އެހީތެރިވެފައި. ބައްލަވާ، ރާއްޖެއަށް ދިމާވި އެންމެ ނާޒުގު ދަނޑިވަޅު 1988 ގެ އުދުވާނީ ހަމަލާގައި އިންޑިއާއިން އެ ދެއްވި އެހާމެ އަވަސް މުހިންމު އެހީ. އެހެން ނޫން ނަމަ އަޅުގަނޑު ދަންނަވާނީ މިވީ 50 އަހަރުގެ ތެރޭގައި ރާއްޖޭގެ މިނިވަންކަން ގެއްލުނީހޭ،” ރައީސް ވިދާޅުވި އެވެ.

އެމަނިކުފާނު އިތުރަށް ވިދާޅުވެފައި ވަނީ އިންޑިއާޔާ ގުޅުން ބަދަހި ކުރުމުގެ މަސައްކަތްތައް އެމަނިކުފާނުގެ ސަރުކާރުން ވެސް ކުރަމުން ގެންދިޔަ ކަމަށެވެ. އަދި އިންޑިއާ އިން ވެސް ކޮންމެ ސަރުކާރެއް އޮތް ނަމަވެސް ރާއްޖެއަށް އެހީތެރިކަން ދެމުން އަންނަ ގޮތަށް އެކަން ކުރަނީ އެގޮތަށް ކަމަށެވެ. ރައީސް ޔާމީނު އެދުވަހު ވިދާޅުވި ގޮތުގައި، އިންޑިއާގެ ވިޔަފާރިތަކަށް ރާއްޖެއިން އޮތީ މަރުހަބާ ކިޔަން ފުރުސަތު ހުޅުވާލައިގެންނެވެ. އަދި އެ ގައުމާ ގުޅުން ބަދަހި ކުރަން ކުރަން ޖެހޭ މަސައްކަތްތައް ކުރާނެ ކަމުގެ ޔަގީންކަންވެސް އެދުވަހު ދެއްވި އެވެ.

“ބައެއް ފަހަރަށް މިހެން ދެއްކޭ ވާހަކަތައް އެބަވޭ ދެ ގައުމުގެ ހައްސާސީ މައްސަލަތަކަށް. އެހެންވެ އަޅުގަނޑު ބައެއް ކަންކަން މި އޮޅުންފިލުވައިދިނީ،” ރައީސް ވިދާޅުވި އެވެ. “މި ސަރުކާރުން އިހުލާސްތެރި ކަމާ އެކު އިންޑިއާގެ ވިޔަފާރިތަކަށް މަރުހަބާ ކިޔާނަން،” އެދުވަހު ރައީސް އަބްދުﷲ ޔާމީނު ވިދާޅުވެފައިވެއެވެ. މިހާރު ރާއްޖޭގައި ހިންގަމުން އަންނަ “އިންޑިޔާ އައުޓް” ކެމްޕެއިނަކީ ރައީސް ޔާމީނު އިސްވެ ހުންނަވައިގެން ކުރިއަށް ގެންދާ ސިޔާސީ ކެމްޕެއިނެކެވެ.