އަޖުމަ ބަލައިލަން މަސްތުވާތަކެތި ނަގާ ޒުވާނުން ގިނަ

ނަވާރަ ސަތޭކައިގެ ތެރޭގައި ގަނޑުވަރުތެރޭ ބޮޑެތި ބޭފުޅުން ގެންގުޅުއްވި އަފިހުން އިން ފެށި ތަޢާރަފްވެގެން އައިސްފައިވާ މަސްތުވާތަކެތީގެ ވަބާއަކީ މިމުޖްތަމަޢުގެ އެންމެ ބޮޑު އެއް އިޖްތިމާޢީ މައްސަލައަށް މިވަނީ ވެފައެވެ.

މިހާރު ބޭނުންކުރެވޭ މަސްތުވާ ތަކެތީގެ ތެރޭގައި ހެރޮއިން، ކޮކެއިން، ވީޑް، ހޭޝް އޮއިލް، ހޭޝް، ކްރިސްޓަލް މެތް، ބަގުރާ، ރާއްޖޭގައި ކައްކާ ރާ (ބޮގަރު)ގެ އިތުރުން ތަފާތު އެތައް ވައްތަރުގެ ކެމިކަލް އަދި  ފާމަސޫޓިކަލްސްވެސް ހިމެނެއެވެ. މިފަހަކަށް އައިސް މަސްތުވާތަކެތި ބޭނުންކުރުމާއި ގެންގުޅުމުގައި ރާއްޖެވެސް ވަރަށް އެޑްވާންސްވެއްޖެއެވެ. މިއީ މިހާރު ޒަމާނީ ފެޝަނެކެވެ.

advertisement

ބަނގުރަލާއި ހޭޝް އޮއިލް އަދި ހެރޮއިންގެ ޓްރެންޑަކަށް ފަހު މިހާރު މިފަހަކަށް އައިސް ރާއްޖޭގައިވެސް އެންމެ މަޤުބޫލީ ޕާޓީ ޑްރަގްސްއެވެ. 18 އަހަރުން ދަށުގެ ކިތަންމެ ކުދިންނެއް މިވަބާގައި ޖެހިގެން މިދަނީ މިއީ މޮޅުކަމަށް ވެގެން ކޫލްވެގެންނެވެ. ޕާޓީކުރަނިކޮށް ޒުވާނަކު ކުއްލިއަކަށް މަރުވާ ވާހަކައަކީ މިހާރު އަހަރެމެންނަށް އެހާ އާ ވާހަކައަކަށް ނުވާނެއެވެ.

މަސްތުވާތަކެއްޗާ ކައިރިވާ ގިނަ ކުދިންނަށް ހީވެފައި އޮންނަނީ އަދި އެހެން ކުޑަކޮށް ބޭނުންކޮށްލިޔަސް މިއަކަށް އެޑިކްޓް ނުވާނެކަމަށެވެ. އޭގެ ގޮތް ބަލާލުމުގެ ބޭނުމުގައި ނުވަތަ ރައްޓެހިންނަށް ތިމާ މީހާގެ މޮޅުކަން ދައްކާލުމަށްވެސް މަސްތުވާ ތަކެތި އިޚުތިޔާރުކޮށްފައި އެބަހުއްޓެވެ. ރައްޓެހިންގެ އިންފްލުއެންސް ބޮޑުވެ އެމީހުންގެ ބާރުގައި ޕާޓީކޮށްލެވޭ ފަހަރު މިއަންނަނީ މަދަކުންނެއް ނޫނެވެ. އެހެންނަމަވެސް ކޮންމެ ކުއްޖަކުވެސް ދެނެގަންނަން ޖެހޭ އެއްކަމަކީ މަސްތުވާ ކޮންމެ އެއްޗަކީ އެޔަށް އިންސާނާ ދެވިހިފާ އެއްޗެއް ކަމެވެ.

ޓްރައި ކޮށްފިއްޔާ ސަލާމަތްނުވެވި މުޅި ޢުމުރު!

އަޖުމަ ބަލައިގެން ދެވިހިފި މަސްތުވާތަކެތިން ސަލާމަތްނުވެވި މުޅި ޢުމުރު އެކަމުގެ ތެރޭގައި ގަނަތެޅިތެޅި އުޅެންޖެހިފައިވާ ކިތައް މީހުންގެ ވާހަކަ އަހަރެމެންނަށް އިވޭ ހެއްޔެވެ؟

ޢިމާރާތުގެ ތިރިއަށް ނިކުމެލިޔަސް މިކަހަލަ އެތައް ސްޓޯރީއެއް ހަމަ ލޮލަށް ފެނިގެންދާނެއެވެ. ސުވާލަކީ އަހަރެމެންގެ ނަފްސު އެފަދަ ހަލާކެއްގެ ތެރެއަށް އެއްލާލާފައި އަހަރެމެންނަށް އެޗީވްކުރެވޭނީ ކޮންކަމެއްތޯއެވެ؟ މިއީ ފަހަރެއްގައިވެސް މަސްތުވާތަކެތީގެ ބަލިމަޑުކަން ތަޙައްމަލުކުރާ ފަރާތަކަށް ބުނާ ކުޑައިމީސް ބަހެއް ނޫނެވެ.

މަސްތުވާތަކެތީގެ ސަބަބުން ދިރިއުޅުމެއް ނުފެށިފައި ނުވަތަ ފެށީ ދިރިއުޅުން ޤުރުބާންކުރަން ޖެހުނު ކިތަންމެ ކުދިންނެއް އެބައުޅެއެވެ. ދުނިޔޭގެ ކަންކޮޅުތަކަށް ދަތުރުކޮށް ތަޖުރިބާކޮށްލަން ބޭނުންވި ކިތަންމެ ކުދިންނަކަށް އެކަން ފުރިހަމަ ނުކުރެވި އެބަތިއްބެވެ. ކިޔަވައިގެން މޮޅު ކެރިއާއަކަށް އުންމީދުކުރި ކިތަންމެ ޒުވާނުންނެއް މަގުމަތިވެފައި އެބަތިއްބެވެ. އެކުގައި އުޅުނު ރައްޓެހިން ޗާލު ދިރިއުޅުމެއްގައި އަގުބޮޑު މުދަލާއި ސަކްސެސްފުލް ވިޔަފާރިތައް ހިންގައިގެން އުޅޭތަން ފެނުމުން ހިތަށް އަސަރުކުރާ ކިތަންމެ ކުދިންނެއް އަހަރެމެންގެ ތެރޭގައި އެބަތިއްބެވެ. މަސްތުވާތަކެތި ބޭނުންކުރާ ކުދިން އެއަށް އަޅުދާސްތުވުމުން އޭގެ ފައިދާ ނަގައި މަސްތުވާތަކެތީގެ ވިޔަފާރިކުރާ މީހުން އުޅޭ މޮޅު ދިރިއުޅުން ފެނި އެމީހުންގެ ހުރި ނޭއްގާނީކަމުގެ ވާހަކަ ދައްކާ ކިތަންމެ ކުދިންނެއްވެސް އެބައުޅެއެވެ. އެކަމަކު ބޭނުންކުރަން ފެށުމުން ދެން ހަމަ އެއްގޮތެއްވެސް ނޯވެއެވެ. އެޑިކްޓްވެ އެޑިކްޝަނުގެ ފަރުވާގެ އުންމީދެއްގައި އެހެން ނޫނިއްޔާ އެއްކޮށް އުންމީދު ކަނޑާލައި މަސްތުވުމުގައި ޢުމުރު ހުސްކޮށްލަނީއެވެ.

ހިތްވަރުކުރާށެވެ. ތިބާއަށް ވާނެއެވެ. އެނބުރި އަންނާށެވެ.

އަޒުމަކާއެކީ ހިތްވަރުކޮށްފިނަމަ ފަރުވާ ކާމިޔާބުވީ މީހުންގެ ވާހަކަވެސް މިފަދަ ފުރުޞަތުތަކުގައި ދައްކަން ޖެހެއެވެ. ނިސްބަތުން މަދު ނަމަވެސް ސަކްސެސް ސްޓޯރީސްވެސް މިފަހަކަށް އައިސް އިތުރުވާތަން އެބަ ފެނެއެވެ. މިހާރަކަށް އައިސް ރާއްޖޭގައި ފެންނަމުންދާ އުފާވެރި މަންޒަރަކީ މަސްތުވާ ތަކެތީގެ ވަބާގައި ޖެހިފައި ތިބޭ ކުދިން ރިކަވަރީ އެޑިކްޓުންގެ ގޮތުގައި މުޖްތަމަޢުތެރެއަށް ނެރުމަށް ޖަމްޢިއްޔާ ޖަމާޢަތްތަކާއި ދޭދޭ ފަރުދުންގެ އިތުރުން ސަރުކާރުވެސް ހިމެނޭގޮތަށް ކެނޑިނޭޅި ކުރަމުންދާ މަސައްކަތެވެ. އެންމެ ފުރިހަމައަށް ނުކުރެވުނަސް މިކަމުގައި ނަތީޖާތަކެއް ނެރެވޭނެކަމުގެ އުންމީދު އެބައޮތެވެ. 

ހިތާމަޔަކީ އަދިވެސް މަސްތުވާ ތަކެތި ޙިޔާރުކުރާ ކުދިން މިމުޖުތަމައުގައި އެކަހެރިކޮށް ބާކީ ކޮށްލާތީއެވެ. އެކުދިންނަށް ފަރުވާ ހޯދައިދީ މިމުޖުތަމައުގައި ބޭނުންތެރި ބަޔަކަށް ހެދުމަށް ގަދައަޅާ މަސައްކަތް ނުކުރެވޭތީއެވެ. މި ނުރައްކާތެރި ވަބާއަށް ކުއްޖާ ވަދެގެން ދާގޮތާއި ނުވަތަ ވަދެވިފައި ހުންނައިރު އެކުއްޖާއަށް އަންނަ ބަދަލުތަކާއި އެކުއްޖާ ދޭތެރޭ ކަންތައް ކުރަންވީ ގޮތުގެ މައުލޫމާތު އަދިވެސް ޢާންމުކޮށް ފެންނަސް އެބަ ޖެހެއެވެ. މިކަމުން ކުއްޖާ ސަލާމަތް ކުރުމަށް ރާއްޖޭގައި ހުޅުވިފައިވާ ފުރުޞަތުތަކާއި އޭގެ މަޢުލޫމާތު ކޮންމެ ފަރުދަކަށްވެސް އެނގެން ޖެހެއެވެ.

ވިސްނަންޖެހޭ އެހެންކަމެއް އޮވެއެވެ. މަސްތުވާތަކެތިން ސަލާމްތްވުމަށް ރީހެބިލިޓޭޓްވުމުން އެކަނި ނިމުނީކީ ނޫނެވެ. އެއަށްފަހު ރިލެޕްސްވުމުގެ ފުރުޞަތުވެސް ވަރަށް ބޮޑަށް އޮވެއެވެ. ރިލެޕްސްއަކީ ޕްރޮސެސްއެކެވެ. މަސްތުވާތަކެތި ބޭނުންކުރާ ކުދިންގެ ތެރޭގައި ރިލެޕްސްވާ ނިސްބަތް ބޮޑުތަނުން ބޮޑުވެސް ވާނެއެވެ. އެނބުރި އައުމުން އެކްސެޕްޓެންސާއި ކްލީންކޮށް ހުންނަން ބޭނުންވާ ސަޕޯޓާއި ފުރުޞަތުތައް ނުލިބުމުން އެ އަޅާ ވޭނާއި ހިތްދަތިކަމުން ސަލާމަތްވުމަށް ފަރުވާއެއް ކަމަށް ސިކުނޑި ވިސްނުވައިދެނީ ރިލެޕްސްވުމެވެ.