ދަރިފުޅަށް ގާތުން ދިނުން މައިމީހާއަށްވެސް ގިނަ ފައިދާތަކެއް

ގާތުން ދަރިފުޅަށް ކިރުދިނުމަކީ އޭގެ ސަބަބުން ކުއްޖާއަށާއި އަދި މައިމީހާއަށް ނުހަނު ގިނަ ފައިދާތަކެއް ލިއްބައިދެއެވެ. އަދި ދެމައިންގެ ގުޅުންވެސް މީގެ ސަބަބުން ރަނގަޅުވެގެންދެއެވެ. ނަމަވެސް ބައެއް މީހުންނަށް މިކަން އެހާބޮޑަށް ނޭންގި އޮތުމަކީ އެކަށީގެންވާ ކަމެކެވެ. އެހެންކަމުން ބައެއް މީހުން ކުއްޖާގެ ވަރަށް ޅައުމުރުގައި ކުއްޖާއަށް ގާތުން ކިރިދިނުން ހުއްޓާލައެވެ.

ޑޮކްޓަރުން އަބަދު ވެސް ލަފާ ދެނީ އެންމެ މަދުވެގެން ވެސް ހަ މަސް ދުވަހަށް ދަރިފުޅަށް ގާތުން ދިނުމަށެވެ. މިކަމާއި ގުޅޭގޮތުން ހަދާފައިވާ ދިރާސާއެއްގައި ބުނެފައިވަނީ ގިނަ ދުވަހަށް ދަރިންނަށް ގާތުން ދޭ މައިންނަށް އޮތް އެންމެ ބޮޑު އެއް ފައިދާ އަކީ ހަކުރު ބަލިން ރައްކާތެރިކޮށް ދިނުމެވެ.

advertisement

ޖަމާ ޖާނަލްގައި ބުނެފައިވަނީ ދިގު މުއްދަތަކަށް ދަރިންނަށް ގާތުން ދިނުމަކީ މައި މީހާ ހަކުރު ބައްޔާ ވަރަށް ބޮޑަށް ދުރުކޮށް ދޭން ބާރު އަޅާ ކަމެކެވެ. އޭގައި ފާހަގަކޮށްފައިވާ ގޮތުގައި ދަރިންނަށް ހަ މަހަށް ވުރެ ގިނަ ދުވަހަށް ގާތުން ދޭ މައިން ޓައިޕް 2 ޑައިބެޓީޒުން ސަލާމަތްކޮށް ދިނުމުގެ ފުރުސަތު 47 ޕަސަންޓަށް އިތުރުކޮށްދެ އެވެ.

ދިރާސާގައި ބުނީ ގާތުން ގިނަ ދުވަހަށް ދިނުމުން ލޭގެ އިންސިއުލިން އާއި ލޭގައި ހަކުރު އެކުލެވޭ މިންވަރު ކޮންޓްރޯލްކޮށް ދިނުމުގެ ގޮތުން ޕެންކްރިއަސް ވަރުގަދަކޮށްދޭ ކަމަށެވެ. މީގެއިތުރުންވެސް ގާތުން ދިގުމުއްދަތަކަށް ކިރުދޭ މައިން އެކި ކަހަލަ ކެންސަރުތަކުން ވެސް ރައްކާތެރިކޮށް ދޭން ބާރަކަށްވުން ހިމެނެ އެވެ. އޭގެ ތެރޭގައި އުރަމަތީގެ ކެންސަރާއި ރަހިމުގެ ކެންސަރު ހިމެނެ އެވެ.