ދަރިފުޅު ޑިޕްރެޝަންގައި އުޅޭނަމަ ދެނެގަންނާނީ ކިހިނެތް؟

އަމިއްލަ މީހާ ޑިޕްރެޝަންގައި އުޅޭނަމަ މީހާއަށް އަންނަ ބަދަލުތަކުގެ ސަބަބުން ވަރަށް އަވަހަށް މިކަން ދެނެގަނެވެއެވެ. ނަމަވެސް ކުޑަކުއްޖަކު ޑިޕްރެޝަންގައި އުޅޭނަމަ ދެނެގަތުމަކީ ބައެއް ފަހަރު އުނދަގޫކަމަކަށް ވެދާނެއެވެ.

ކުޑަކުއްޖަކު ޑިޕްރެޝަންގައި އުޅުން

ބޮޑެތިމީހުންނާއި ހިލާފަށް ޑިޕްރެޝަންއަށް ދިއުމުން ކުޑަކުދިންނަށް އެވާހަކަ ހިއްސާކުރުމަކީ އުނދަގޫކަމެކެވެ. އެމީހުންގެ އިހްސާސްތައް ބުނެދޭކަށެއް ނޭންގޭނެއެވެ. އެހެންކަމުން ކުޑަކުއްޖަކު ޑިޕްރެޝަންއަށް ދާކަން ދެނެގަތުމަށް ބޮޑެތި މީހުންނަށް މުހިންމު ދައުރެއް އަދާކުރެވިދާނެއެވެ. ކުއްޖާއަށް އަންނަ ބަދަލުތަކަށް ބަލައިގެން ދެނެގަނެވިދާނެއެވެ.

advertisement

ކުޑަކުއްޖަކު ޑިޕްރެޝަންއަށް ދިއުމުގެ އަލާމާތްތައް:

ކުޑަކުއްޖަކު ޑިޕްރެޝަންއަށް ދިއުމުން އާންމުގޮތެއްގައި ފެންނާނެ އަލާމާތްތަކުގެ ތެރޭގައި މިކަންކަން ހިމެނެއެވެ.

• ކެއުމަށް ބަދަލުއައުން. މާގިނައިން ކެއުން ނުވަތަ ބަނޑުހައި ނޫންކަމަށްބުނެ އެއްގޮތަކަށްވެސް ނުކެއުން.
• އުޅުމަށް ބަދަލުއައުން. މީގެތެރޭގައި ކަންކަމާއި މެދު ނެގެޓިވްކޮށް ދެކުމާއި، މާއަވަހަށް ރުޅިއައުމާއި، އަވަސްއަވަހަށް ދެރަވުން ހިމެނެއެވެ.
• އާއިލާއާއި ރަހުމަތްތެރިންނާއިއެކު ކުރިން ކުރާހިތްވި ކަންކަން ކުރުމާއި ދުރުވުން. ނުވަތަ ޝައުގުވެރިކަމެއް ނެތުން.
• ގައިގައި ކަންކަން ކުރުމަށް ވަރު ނެތުން. ނެގިމަޑުވެފައި އިނުން. ކަންކަން ކުރުން ލަސްވުން
• ނިދުމުގެ ވައްޓަފާޅިއަށް ބަދަލުއައުން. މާމަދުން ނިދުން ނުވަތަ ނިދަން އުނދަގޫވުން.
• ކަންކަމަށް ސަމާލުކަންދޭން އުނދަގޫވުން.
• ބަނޑަށް ނުވަތަ ބޮލަށް ތަދުވާކަމަށްބުނެ ކޮންޕްލެއިންކުރުން.

ތިމާގެ ދަރިފުޅުގެ މި އަލާމާތްތައް ފެންނަނަމަ ގާތީ ޑިޕްރެޝަންއަށް ދަރިފުޅު ގޮސްފައިވުމާއެވެ. ޑިޕްރެޝަންއަށް ގޮސްފައިވާ ކުޑަ ކުއްޖަކަށް އެހީވުމަށް ކުރެވިދާނެ ކަންތައްތައްވެސް އެބަހުއްޓެވެ. އޭގެތެރޭގައި:

ސިއްހީ އެހީ ހޯދުން

އެންމެ ފުރަތަމަ ސިއްހީ އެހީހޯދުމަކީ ވަރަށް މުހިންމު ކަމެކެވެ. ކުއްޖާގެ އަސްލުވެސް ހުރީ ޑިޕްރެޝަންތޯ ޔަޤީންކުރާށެވެ. އެއަށްފަހު ފަރުވާ ބޭނުންވާނަމަ ފަރުވާ ދެވިދާނެއެވެ.

ދިރިއުޅުމަށް ބަދަލުގެނައުން

ކުއްޖާގެ ދިރިއުޅުމަށް ބަދަލުތަކެއް ގެނައުމަކީ ކުރެވިދާނެ ވަރަށް މުހިންމު ކަމެކެވެ. އެގޮތުން ކުރެވިދާނެ ކަންތައްތަކުގެ ތެރޭގައި.

• އެކްޓިވްވުމަށް އަދި ކަސްރަތުކުރުމަށް ދަރިފުޅަށް ބާރުއެޅުން
• ނިދުމުގެ ޝެޑިއުލްއަށް ބަދަލުގެނައުމަށް ދަރިފުޅަށް އެހީތެރިވުން
• ބޭރަށް ދަރިފުޅު ގެންގޮސް ދަރިފުޅު ހިތްހަމަޖެހޭ ކަމެއް ކޮށްލުން
• ދަރިފުޅު ގަޔާވާ ކަންތައްތައް އޭނާ ލައްވައި ކުރުވުން
• ދަދިފުޅު ސްޓްރެސްވާ ކަންކަމާއި ދުރުކުރުން
• ރިލެކްސް ވުމަށް ދަރިފުޅަށް ބާރުއެޅައި އެހީތެރިވުން
• ސިއްހަތައް ފައިދާހުރި ކާނާ ކެއުމަށް ބާރުއެޅުން