އެއްބައިކުދިން އައު ޔުނީފޯމްގައި، އަނެއްބައި ކުދިން ބައު ޔުނީފޯމްގައި — ހާލަތު ބަދަލުކޮށްދީ!

މިދުވަސްވަރަކީ ސްކޫލް ބަންދު ދުވަސްވަރެވެ. ސްކޫލް ބަންދަށްފަހު އަނެއްކާވެސް ދަރިވަރުން ކުރިމަތިލާނީ ދިރާސީ އައު އަހަރާއެވެ. އައު އަހަރު އައު ޔުނިފޯމާއި، އައު ބޫޓާއި އައު ދަބަސްތައް ހިފައިގެން ސްކޫލަށް ދާހިތުން ބައެއް ކުދިން ތިބެނީ ކެތްމަދުވެފައެވެ. ނަމަވެސް ހިތާމައަކީ މިކަމުން މަހުރޫމުވެފައިވާ ކުދިންތަކެއްވެސް އަޅުގަނޑުމެންގެ މި މުޖްތަމައުގައި ތިބީތީއެވެ. އެކުދިންނަކީވެސް އެހެން ކުދިންނެކޭ އެއްފަދައިން އައު ޔުނިފޯމާއި އައު ދަބަސް ހިފައިގެން ސްކޫލަށް ދާން ބޭނުންވާނެ ކުދިންތަކެކެވެ. ނަމަވެސް މާލީ ފުދުންތެރިން ނެތުމުގެ ސަބަބުން އެ ކުދިން ވަނީ މިކަމުން މަހުރޫމް ވެފައެވެ. އެހެންކަމުން އެންމެންގެ އެހީތެރިންކަން އެކުދިންނަށް ބޭނުންވެއެވެ.

މިފަދަ އާއިލާތަކަށް އެހީތެރިވުމަށް މަސައްކަތް ކުރާ ޖަމިއްޔާއެއްކަމަށްވާ މަންމްސް އެންޖީއޯއިން އަބަދުވެސް އަންނަނީ މުޖްތަމައުގައި މިގޮތައް ހާލުގައި އުޅޭ އާއިލާތަކުގެ ވާހަކަ ތިލަކޮށް އާންމުންނާއި ހަމައަށް ގެނެސްދެމުންނެވެ. މަމްސް އެންޖީއޯއިން މިފަހުންވެސް ވަނީ މާލީ ފުދުންތެރިންކަން ނެތުމުގެ ސަބަބުން ސްކޫލަށް ދާނެ ތަކެތި ނުހޯދިފައިތިބި 2 އާއިލާއެއްގެ ވާހަކަ ގެނެސްދީފައެވެ.

މީގެތެރެއިން އެއް އާއިލާއަކީ ބައްޕައަކާއިނުލައި 4 ދަރިން ގޮވައިގެން ދިރިއުޅެމުންދާ ނިއުމާގެ އާއިލާއެވެ. ކުދިން ގޮވައިގެން ކޮއްކޮއެއްގެ ގޭގައި ދިރިއުޅެމުންދާ ނިއުމާއަށް ކުދިންނަށް އައު ޔުނިފޯމެއް ފަހާދެވުނު ދުވަހެއް ހަނދާނެއް ނެތެވެ. ކްލާސް ކުދިން އައު ބޫޓަށް އަރައިގެންދާއިރު ނިއުމާގެ ކުދިންނަށް ލާންޖެހެނީ ފާއިތުވި 2 އަހަރުވެސްލީ ބޫޓެވެ. ގިނަ ދުވަސް ވުމުގެ ސަބަބުން ބޫޓު ހުރީ ވަރަށް ބޮޑަށްވެސް ހަލާކުވެފައެވެ.

“އެއް ބޫޓެއް ބޭނުންކުރާތާ މިވީ 3 އަހަރު. ފަޅައިގެން ދިޔައީމަ އެތަން ތަތްކޮށްގެން އެ ކުދިން އަރަނީ. ވަރަށް ދެރަވޭ އެކުދިންނަށް ބޭނުންވާ އެއްޗެހި ހޯދާނުދެވޭތީ.” ނިއުމާ ބުންޏެވެ.

އެކަނިވެރި މައިންނަށް ލިބޭ ފައިސާ ފިޔަވައި މި އާއިލާއަށް ފައިސާ ލިބޭނެ އިތުރު މަގެއްނެތެވެ. ދިރިއުޅެމުންދަނީ 7 މެންބަރުންގެ އާއިލާއަކާއިއެކު ކަމުން އާއިލާގެ ފަރާތުންވެސް މާބޮޑު އެހީތެރިކަމެއް ފޯރުކޮށް ނުދެވޭކަމަށް ނިއުމާ ބުންޏެވެ.

“ސްކޫލަށް ބޭނުންވާ ތަކެތި ހަމަކުރަން އެންމެ ދަތިވަނީ. މިހާރުވެސް ދެން ފިހާރައެއްގައި ޖައްސާފައި ނަގައިފިން. ދެން ލާރިކޮޅު ލިބުނީމަ ދެއްކުނު ވަރަކަށް ދައްކަނީ.” ނިއުމާ ބުންޏެވެ.

ސަމީރުގެ އާއިލާއަކީވެސް މި ހާލުގައި ދިރިއުޅެމުން އަންނަ އާއިލާއެކެވެ. ސަމީރުގެ ކައިވެންޏަށް 3 ދަރިން ލިބުނުއިރު ކައިވެނީގެ މިސްރާބު ބަދަލުވާން ފަށައިފިއެވެ. 3 ކުދިން ސަމީރުއާއި ހަވާލުކުރުމަށްފަހުގައި އެކުދިންގެ މަންމަ އާދިރިއުޅުމެއް ފެށިއެވެ. ދަރިންގެ ހައްޤުގައި ކޮންމެފަދަ ގުރުބާނީއެއްވާންވެސް އޭނާ އެދުވަހު އަޒުމު ކަނޑައެޅިއެވެ. 

ޙާއްސަ އެހީއަށް ބޭނުންވާ ކުއްޖަކާއި އިތުރު 2 ދަރިން ގޮވައިގެން އަދި އެކުދިން ބަލާނެ މީހަކު ނެތުމުން ވަޒީފާއަށް ދިއުން އޭނާއަށް ވެފައިވަނީ ދަތިކަމަކަށެވެ.

ސަމީރުގެ އާއިލާއަކީވެސް ފުދިގެން އުޅޭ އާއިލާއަކަށް ނުވާތީ އޭނާއަށް އެމީހުންގެ ފަރާތުން އެހީތެރިކަމެއް ނުލިބެއެވެ. ކިރިޔާވެސް އާމްދަނީއެއް ލިބެނީ ސަމީރުއަށް ރަށުތެރެއިން ލިބޭ ކުދިކުދި މަސައްކަތުން ލިބޭ އެއްޗަކުންނެވެ. ކަންތައްތައް މިހެން ހުރުމުގެ ސަބަބުން ދަރިންނަށް ބޭނުންވާ ތަކެތި ހޯދުމާއި ސްކޫލަށް ބޭނުންވާ ތަކެތި ހޯދުމަށް ސަމީރު ވަނީ ނުކުޅެދިފައެވެ.

“ކޮންމެ އަހަރަކުވެސް ސްކޫލަށް ދާން ކުދިން ލައްވަނީ އެހެންކުދިން ބޭނުންކޮށްފައި ހުންނަ ޔުނީފޯމް. ގިނަ ފަހަރު މީހުންދޭ ޔުނީފޯމް ބާވެފައި ހުއްޓަސް، ކުދިންނަށް ހެޔޮވަރު ނުވިއަސް ލައްވަންޖެހޭ. ކުދިންނަށް ބޭނުންވާ އެއްޗެހި ހޯދާނުދެވޭކަން އަހަރެންނަށްވެސް އެނގޭ. ސްކޫލަށް ބޭނުންވާ އެއްޗެހި ވެސް ނެތި ސްކޫލަށް ފޮނުވަމުން މިއަންނަނީ.” އިސްޖަހާލަމުން ސަމީރު ބުންޏެވެ.

މިފަދަ އެތައް އާއިލާއެއް އަޅުގަނޑުމެންގެ ދީލާތި އެހީތެރިކަމަށް މއަދު މިދަނީ އެދެމުންނެވެ. މި ކުދިންގެ މޫނުމަތިން އުޖާލާކަން ގެނުވައި މި ކުދިންގެ އުއްމީދު ތައް ހަޤީގަތަށް ހެދުމަށް އަޅުގަނޑުމެންނަށް އެހީތެރިކަމުގެ އަތެއް ފޯރުކޮށްދެވިދާނެއެވެ. ކިތަންނެ ކުޑަކުޑަ އެހީއަކުންވެސް މިކުދިންގެ މޫނުމައްޗަށް އުފާވެރިކަން ނެގެސްދެވިދާނެއެވެ. އެހެންކަމުން މި އާއިލާތަކަށް އެހީތެރިކަން ފޯރުކޮށްދެއްވާށެވެ.

މި އާއިލާއަށް އެހީތެރިވުމުގެ ފުރުސަތު މަންމްސް އެންޖީއޯއިން މިވަނީ ހުޅުވާލާފައެވެ. މި ކުދިންނަށް ސުކޫލްއަށް ދިއުމަށް ކޮންމެހެން ބޭނުންވާ ތަކެތި ގަތުމަށް އެހީތެރިކަން ފޯރުކޮށްދެވިދާނެއެވެ.

 އެހީތެރިކަން ފޯރުކޮށް ދިނުމަށް: އެކައުންޓް ނަންބަރ : 7730000294482