ވަޒީފާ ދޫކޮށްލަންވީ ކިހާހިސާބަކުން؟

އަދާކުރާ ވަޒީފާ ދޫކޮށްލުމަކީ ގިނަ ބަޔަކަށް ފަސޭހަކަމަކަށް ނުވާނެއެވެ. ވަކިން ޙާއްސަކޮށް އެ އަދާކުރާ ވަޒީފާއަކީ ތިމާ ލޯބިވާ ކުރާހިތްވާ އަދި ގިނަ ދުވަސްވެފައިވާ ވަޒީފާއެއްނަމަ މިއީ ވަރަށް އުނދަގޫ ކަމެކެވެ. ނަމަވެސް އޮފީހުގައި ދިމާވާ އެކިއެކި ކަންކަމާއިހެދި ވަރަށް ގިނަ ފަހަރު ވަޒީފާ ދޫކޮށްލަން ގިނަ ބަޔަކު ހިތައްއަރައެވެ. އެހެން ވިޔަސް ބައެއް މީހުންނަކީ ކުރިމަތިވާ ޕްރެޝަރުތަކާއެކު އެކު ވެސް ވަޒީފާއެއް ދޫކޮށްލަން ފަސްޖެހޭ މީހުންނެވެ.

ވޯކްސްޕްލޭސްގެ ތަޖުރިބާކާރެއް ކަމަށްވާ އަދި ހާވާޑް ބިޒްނަސް ރިވިއުގެ ކޮންޓްރިބިއުޓިން އެޑިޓަރު އެމީ ގެލޯ ވިދާޅުވި ގޮތުގައި ވަޒީފާއެއް ދޫކޮށްލަން ވާނީ ވަރަށް ސީރިއަސްކޮށް ވިސްނުމަށް ފަހު އެވެ. ސަބަބަކީ ކޮންމެ ދުވަހަކީ އެންމެ ހިތްހަމަޖެހޭ ކަހަލަ ދުވަހަކަށް ނުވާނެތީ އެވެ. އަދި އެކީގައި މަސައްކަތްކުރާ މީހުންނާއި ވެރިންގެ ފަރާތުން ބޭނުންވާ މިންވަރަށް ރުހުން ނުލިބުމަކީ ވެސް ވެދާނެ ގޮތެކެވެ.

advertisement

އެކަމަކު އަދާކުރާ ވަޒީފާ ދޫކޮށްލުމާ ގުޅޭ ގޮތުން މިކަންކަމަކަށް ބެލިދާނެ ކަމަށް ތަޖުރިބާކާރުން ވިދާޅުވެ އެވެ. އެއީ:

ކުރިއެރުން ނުލިބުން

ވަޒީފާއާ ދޭތެރޭ ފޫހިވެދާނެ އެއް ސަބަބަކީ ވަޒީފާގެ ކުރިއެރުން ނުލިބުމެވެ. ހާއްސަ އެއް މަގާމެއްގައި ދެމިހުންނަތާ އެތައް ދުވަހެއް ނުވަތަ އެތައް އަހަރެއްވީ ވިޔަސް މަގާމުގެ ކުރިއެރުމެއް، ނުވަތަ ކުރިއެރުމެއް ލިބިދާނެކަމުގެ އެއްވެސް ސިގްނަލެއް ނުލިބޭ ނަމަ އެ ވަޒީފާއެއް ދޫކޮށްލުމާ ދޭތެރޭ ވިސްނަން ޖެހިދާނެ އެވެ.

ވެރިޔާގެ ނުފޫޒު ފޯރުވުން

އަބަދު ވެރިމީހާގެ ނުފޫޒުގެ ދަށުގައި، އޭނާ ހެދިހާ ގޮތެއް ހެދިގެން ކިޔާހާ އެއްޗަކަށް ރުހިގެން ހުންނަން ޖެހުމަކީ ވަޒީފާ މަތިން ފޫހިވާނެ ކަމެކެވެ. ވަކިން ހާއްސަކޮށް ކުރާ މަސައްކަތުގެ އަގު ވަޒަންނުކޮށް އަބަދު ފާޑުކިޔާ ނަމަ ވަޒީފާގައި ދެމިހުރުމާ މެދު ދެވަނަ ވިސްނުމަކަށް ދެވިދާނެ އެވެ.

ވަގުތައް މަސައްކަތް ނުކުރެވުން

ވަޒީފާގައި އުޅެން ބޭނުންނުވެ މަސައްކަތްތައް ފަސްކުރެވުމަކީ ވަޒީފާ މަތިން ފޫހިވެފައިވާކަމުގެ ހެއްކެކެވެ. އެއާ އެކު ދުވަހުން ދުވަހަށް ތިމާ ނިންމަން ޖެހޭ މަސައްކަތްތައް ފަސްކެރުވުމާއި އެންމެ ފަހު ވަގުތާ ހަމައަށް މަސައްކަތްތަށް “ޕެންޑިން” ގައި ބެހެއްޓުމަކީ ދިމާވެދާނެ ގޮތެކެވެ.

މިކަން މިގޮތަށް ދިމާވާ ކަމަށް އަމިއްލަ ގަބޫލުރެވޭ ނަމަ އެ ހިސާބުން އެ ވަޒީފާއެއް ދޫކޮށްލުމާ ދޭތެރޭ ވިސްނުމަކީ އެއްވެސް މައްސަލައެއް ނޫނެވެ. ސަބަބަކީ އެގޮތަށް މެދުވެރިވާން ވަޒީފާގެ މާހައުލުގެ ތެރެއިން ދިމާވާ އެތައް ކަމެއްގެ ހިއްސާ އޮންނާނެތީ އެވެ.

ގުޅުން ކުޑަވުން

އޮފީސް މާހައުލުގައި މަސައްކަތްކުރާ މީހުންނާ އޮންނަ ގުޅުން ރަނގަޅުވުމާއި، އެ މީހުންގެ ފަރާތުން ތިމާ އަށް ލިބޭ އެހީ އާއި ސަޕޯޓަކީ މަސައްކަތްކުރަން ލިބޭ ވަރަށް ބޮޑު ހިވްވަރަކަށް ވާނެ އެވެ. އެކަމަކު އޭގެ ބަދަލުގައި އެތައް ދުވަހެއްވާ އިރު ވެސް ވަޒީފާގެ މާހައުލަށް މީހާ ނުހޭނުމައި އެހެން މީހުންނާ ގުޅުން ކުޑަވުމަކީ ވަޒީފާގެ މަތިން ފޫހިވާނެ ކަމެކެވެ.

މީހާގެ އެޓިޓިއުޑް ވެސް ރަނގަޅުކުރުން

މީހާގެ އެޓިއުޓަކީ ހަގީގަތުގައި ކޮންޓްރޯލެއްގެ ތެރޭގައި އޮންނަން ޖެހޭނެ ކަމެކެވެ. އެޓިޓިއުޑް ދެ ގޮތަކަށް މާނަ ކުރެވިދާނެ އެވެ. އެއީ ރަނގަޅު އަދި ގޯސްކޮށެވެ. މީހާގެ އެޓިޓިއުޑް ރަނގަޅު ނަމަ ކަންކަމާ ދޭތެރޭ ދެކޭނީ ވެސް ޕޮޒިޓިވްކޮށެވެ.

މިސާލަކަށް ވަޒީފާއާ ދޭތެރޭ ހިތްމަނުޖެހި، އެކަމުގެ ސަބަބުން މަސައްކަތުގެ މާހައުލުގައި މީހާގެ އީގޯ އާއި އެޓިޓިއުޑް ނުބައި މިސްރާބަކަށް އެނބުރި ދާނެ އެވެ. އަދި އެއާ އެކު ތިމާއާ ދޭތެރޭ އެހެން މީހުން ދެކޭ ގޮތް ބަދަލުވެ، އެކަމުގެ ސަބަބުން ވަޒީފާގެ މަސްއޫލިއްޔަތުތަށް ބުރޫއަރަން ފަށައިފާނެ އެވެ. މިސާލަށް، އެކި ބަހަނާތައް ދެއްކުން ފަދަ ކަންކަމެވެ. ނުވަތަ މީޓިން ފަދަ ކަންކަމަށް ހާޒިރުވާން ބޭނުން ނުވުން ކަހަލަ ކަންކަމެވެ.

އެކަހަލަ ހާލަތްތަކެއް މެދުވެރިވާ ނަމަ ވަޒީފާ ދޫކޮށްލުމާ ދޭތެރޭ ވިސްނުން ރަނގަޅު ކަމަކަށް ވެދާނެ ކަމަށް ތަޖުރިބާކާރުން ވިދާޅުވެ އެވެ.