މިއަދުގެ ފާހަގަކޮށްލެވޭ ހަބަރުތައް ކުރުކޮށް

ޙައްޖުގެ އަޅުކަން އަދާކުރެއްވުމަށް ރައީސްގެ ދެ ކަނބަލުން މިއަދު ފުރާވަޑައިގަންނަވައިފި

މިއަހަރުގެ ޙައްޖުގެ އަޅުކަން އަދާކުރެއްވުމަށް ސަޢޫދީ ޢަރަބިއްޔާއަށް ކުރައްވާ ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އާއި އެމަނިކުފާނުގެ އަނބިކަނބަލުން ފަޒްނާ އަޙްމަދު މިއަދު ފުރާވަޑައިގެންފިއެވެ.

ރައީސުލްޖުމްހޫރިއްޔާގެ ދެ ކަނބަލުން މި ދަތުރުފުޅުގައި ފުރާވަޑައިގެންނެވީ މިއަދު ހެނދުނެވެ.

advertisement

“އެދުރުންގެ ފަންނު:ގޮންޖެހުންތަކާއި ހުށަހެޅުންތައް” ޝާއިޢު ކޮށްފި

ތަޢުލީމީ ދާއިރާއަށް ފެންވަރު ރަނގަޅު ޓީޗަރުން ލިބުން ދަތިވާ ސަބަބުތައް ދެނެގަތުމަށްޓަކައި ދިރާސާ ކުރެއްވުމަށްޓަކައި އުފެއްދެވި ރިސަރޗް ގްރޫޕުން އެކުލަވާލެއްވި ރިޕޯޓު “އެދުރުންގެ ފަންނު:ގޮންޖެހުންތަކާއި ހުށަހެޅުންތައް” ޝާއިޢު ކޮށްފިއެވެ.

މި ރިޕޯޓް ރައީސުލްޖުމްހުރިއްޔާގެ އޮފީހުގެ ވެބްސައިޓްhttps://presidency.gov.mv ފެނިވަޑައިގަންނަވާނެއެވެ.

ށ. ފޯކައިދޫ ބަނދަރު މަޝްރޫޢުގެ 87 ޕަސެންޓް ނިމިއްޖެ

ށ. ފޯކައިދޫ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ 87 ޕަސެންޓް ނިމިއްޖެ ކަމަށް އެމްޓީސީސީން ވިދާޅުވެއްޖެ އެވެ. އަދި އެއްގަމުތޮށި ލުމުގެ މަަސައްކަތް ވަނީ ނިމިފައި ކަމަށްވެސް މައުލޫމާތުދެއްވި އެވެ.

މި މަޝްރޫޢުގެ ދަށުން، 45،795 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 464 މީޓަރުގެ ސަރަޙައްދެއްގައި އެއްގަމުތޮށި ލުމާއި، 100 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 507 މީޓަރުގެ ސަރަޙައްދެއްގައި ބޭރުތޮށި ލުމާއި، 2320 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުމާއި، މަގުބައްތި ހަރުކުރުމާއި ނެރުބައްތި ހަރުކުރުމުގެ މަސައްކަތް ހިމެނެ އެވެ. މި މަޝްރޫޢަކީ 64.6 މިލިއަން ރުފިޔާގެ މަޝްރޫޢެކެވެ.

ފޭސް 2ގައި ޕޮލިސް ސްޓޭޝަނެއް ގާއިމްކޮށްފި

ހުޅުމާލެ ހިޔާ ސަރަހައްދުގައި ޕޮލިސް ސްޓޭޝަން ހުޅުވުމުގެ ރަސްމީއްޔާތު ވަނީ ބޭއްވިފައެވެ. މި ޕޮލިސް ސްޓޭޝަން ހުޅުވިފައިވަނީ ހިޔާގެ H4 ވަނަ ޓަވަރުގައެވެ.

ތަރައްގީކުރި ފުޓުބޯޅަ ދަނޑުތަކަށް ބޭނުންވާ ޑްރޭގް ބްރަސް މެޝިން ގެނެސްފި

ޔޫތު މިނިސްޓްރީ އިން ތަރައްގީކޮށްފައިވާ 25 ފުޓުބޯޅަ ދަނޑަކަށް ބޭނުންވާ ޑްރޭގް ބްރަސް މެޝިން މިއަދު ވަނީ ހަވާލުކުރެވިފައިކަމަށް މިނިސްޓަރ މަހުލޫފް ވިދާޅުވެއްޖެ އެވެ. މީގެ ކުރިން 13 ރަށަކަށް ވަނީ މި މެޝިންތައް ފޮނުވިފައި ކަމަށްވެސް ހާމަކުރެއްވި އެވެ. ދަނޑު ތަރައްގީ ކުރަމުންދާ އެހެން ރަށްރަށަށް ބޭނުންވާ މެޝިންވެސް ގެނައުމުގެ މަސައްކަތް ދަނީ ކުރަމުން ކަމަށްވެސް ވިދާޅުވި އެވެ.