ކުޑަކުދިންނަށް ޖިންސީ އަނިޔާ ކުރަނީ ގިނައިން ދަންނަ، އިތުބާރު ކުރާ މީހުން — އެމީހެއް ކިބައިން ފެނިދާނެ އަލާމާތްތައް

މިއަދުގެ މުޖްތަމައުގައި ޖިންސީ ގޯނާގެ ޝިކާރައަކަށްވާ ކުޑަކުދިންގެ އަދަދު އިތުރެވެ. ކުއްޖާގެ އެންމެ ގާތުގައިވާ މީހުންނާއި އަދި މުޖްތަމައުގެ ތެރެއިންވެސް މިފަދަ ގޯނާތަކާއި ތުއްތު ކުދިން ކުރިމަތިލާންޖެހެއެވެ. މިފަދަ ކަންކަން ކުރާމީހުން މިކަންކަން ކުރަނީ ދުރާލާ ވަރަށް ބޮޑަށް ވިސްނައިގެން ކުއްޖާއަށް އެކަން މާބޮޑަށް އިޙްސާސް ނުވާނެފަދަ ގޮތަކަށެވެ.

މައިންބަފައިން ވަރަށް ބޮޑަށްވެސް ސަމާލުވާންޖެހެއެވެ. ކުއްޖާއާއި އެންމެ ގާތުގައި އުޅޭ މީހުންގެ ފުށުންވެސް ކުއްޖާއަށް ޖިންސީ ގޯނާގެ އަމަލެއް މެދުވެރިވެދާނެއެވެ. އެހެންކަމުން ކުއްޖާގެ ކައިރީގައި އުޅޭ މީހުންގެ އުޅުމާއި އަމަލުތައް ހުންނަގޮތައް ބެލެނިވެރިން ވަރަށް ބޮޑަށްވެސް ސަމާލުވާންޖެހެއެވެ. މިފަދަ މީހުން ކުއްޖާއަށް ލޯތްބާއި އަޅާލާކަން ދެއެްކުމަށް މަޑުމަޑުން ކައިރިވަމުންދާނެއެވެ. އެފަދަ މީހުންގެ ކިބައިން ފެނިދާނެ ބައެއް އަލާމާތްތަކުގެ ތެރޭގައި:

advertisement

ކުއްޖާއަށް ޓާގެޓްކުރުން

މިފަދަ މީހުން ކުއްޖާގެ ފިޒިކަލް އަދި އެމޯޝަނަލް ހާލަތު އެންމެ ފުރަތަމަ ދެނެގަންނާނެއެވެ. ކުއްޖާގެ ބެލެނިވެރިޔާއާއި ދުރުގައި ގިނަވަގުތު ހެދަކުރާ ކުދިންނަށް ޓާކެޓްކުރަން މިފަދަ މީހުންނަށް ފަސޭހަވާނެއެވެ.

ކުއްޖާގެ އިތުބާރު ހޯދުން

ކުޑަކުދިންނާއި ޖިންސީގޮތުން ގޯނާކުރާ މީހުން އެކަން ކުރުމުގެ ކުރިން ކުއްޖާގެ އިތުބާރާއި ޔަޤީންކަން އެމީހަކާއި ދޭތެރޭ ހޯދާނެއެވެ. މީގެތެރޭގައި ކުއްޖާ ބޭނުންވާ ކަންކަމާއި ކުރާހިތްވާ ކަންކަން ހޯދާ ބަލާނެއެވެ.

ކުއްޖާ ބޭނުންވާ ކޮންމެވެސް ކަމެއް ކޮށްދިނުން

ކުއްޖާ ބޭނުންވާ ކޮންމެވެސް ކަމެއް ކޮށްދިނުމުގެ ސަބަބުން އެމީހަކު ބޮޑަށް ފާހަގަވެގެންދާނެއެވެ. އަދި އެއީ ކުއްޖާގެ ދިރިއުޅުމުގައި މުހިންމު މީހެއްކަމަށް ބެލެވޭނެއެވެ. ކުއްޖާ ބޭނުންވާ ކަމެއް ކޮށްދިނުމުގެ ތެރޭގައި ހަދިޔާ ދިނުމާއި، ކުއްޖާއަށް އެޓެންޝަން ދިނުން ހިމެނެއެވެ.

ކުއްޖާއާއިއެކު އެކަހެރިކޮށް ވަގުތު ހޭދަކުރުން

ޖިންސީގޮތުން ކުޑަކުއްޖަކަށް ގޯނާކުރަން ބޭނުންވާ މީހާ ކުއްޖާއަށް ގާތް ގުޅުމެއް އުފައްދައި ކުއްޖާއާއިއެކު އެކަހެރިކޮށް ވަގުތު ހޭދަކުރާނެއެވެ. އެކަހެރިކޮށް ހޭދަކުރާ ވަގުތުގައި ކުއްޖާއާއި ޚާއްސަ ގުޅުމެއް އުފެއްދުމަށް މަސައްކަތް ކުރާނެއެވެ. އެކަހެރިކޮށް ހޭދަކުރާ ވަގުތަކީ ބޭބީސިޓްކުރާ ވަގުތު، ކިޔަވައިދިނުމަށް ނުވަތަ ކޯޗްކޮށްދިނުން ފަދަ ކަމެއް ކުރުމަށްކަމަށްބުނެ ހޭދަކުރާ ވަގުތަކަށްވެސް ވެދާނެއެވެ.

ޖިންސީ ގޯނާކުރަން މަގުފަހިވާ ކަންކަންކުރުން

ޖިންސީ ގޯނާއަށް މަގުފަހިވާ ކަންކަންކަމަށްވާ އެފަދަ ވާހަކަތައް ދެއްކުމާއި، ފޮޓޯއާއި މަންޒަރު ކުޑަކުދިންނަށް އެފަދަ މީހުން ދައްކާނެއެވެ. އަދި ފަތަން ދިއުންފަދަ ހަށިގަނޑު ބޮޑަށް ފާޅުކުރެވޭ ކަންކަން ކުރަން ހިތްވަރުދޭނެއެވެ.

ކުއްޖާ އޭނާގެ ކޮންޓްރޯލްގެ ދަށުގައި ބެހެއްޓުން

ޖިންސީ ގޯނާގެ އަމަލަކީ ކުއްޖާގެ ހުރި ކޮންމެވެސް ކަމެއްގެ ސަބަބުންކަމަށްބުނެ ކުއްޖާ ކުއްވެރިކުރަން މަސައްކަތް ކުރާނެއެވެ. އަދި އެހެން މީހަކުކައިރީގައި ބުނެދާނެތީ ކުއްޖާއަށް ބިރުދައްކައި އޭނާގެ ބާރުގެ ދަށުގައި ކުއްޖާ ބެހެއްޓުމަށް މިފަދަ މީހުން މަސައްކަތްކުރާނެއެވެ.

ޖިންސީ ގޯނާގެ މައްސަލަތަކަކީ މިއަދު އަޅުގަނޑުމެންގެ މުޖްތަމައުގައިވެސް ހިނގާ ހިތާމަވެރި ކަންކަމެވެ. މިފަދަ ކަންކަން މަދުކުރުމަށް ބެލެނިވެރިން މިހާރަށްވުރެ ބޮޑަށް ސަމާލުކަންދޭންޖެހެއެވެ. އޭގެތެރޭގައި ކުއްޖާއާއި ކޮންމެ ދުވަހަކުވެސް ބައްދަލުވަނީ ކޮންކޮން ބައެއްކަމާއި އެމީހުންގެ އަމަލުތައް ކުއްޖާއާއި ދޭތެރޭގައި ހުންނަގޮތް ގާތުން ބެލުމަކީ މުހިންމު ކަމެކެވެ. އެންމެ ހީނުކުރާ މީހުންގެ ފުށުންވެސް ކުއްޖާއަށް މިފަދަ އަނިޔާއެއް ލިބިދާނެއެވެ.