ބަރަހަނާ މަންޒަރު ބެލުމަކީ ދެވިހިފާ ކަމެއް، ހުއްޓާނީ ކިހިނެތް؟

ދިރާސާއެއްގައި ޅައުމުރުގެ ކުދިންގެ ކައިރީގައި އެކުދިން ޕޯން ނުވަތަ އޮރިޔާން ފިލްމް ބަލަނީ ކިހާ ވަރަކަށްތޯ ސުވާލުކުރިއެވެ. އެކުދިންގެ ޖަވާބަކަށްވީ ވަރަށް ގިނައިން ބަލާކަމަށެވެ. އަދި އެކުދިންގެ ފޯނުން ނުވަތަ ލެޕްޓޮފް ފަދަ އާލާތްތަކުން އެކުދިން ބަލަނީ ކޯއްޗެއްތޯ ބެލެނިވެރިން ބަލާތޯ ސުވާލުރިއެވެ. އަދި ގިނަކުދިން ބުނެފައިވަނީ އެކުދިން ކުރާކަމެއް ބެލެނިވެރިން ނުބަލާކަމަށެވެ. ސަބަބެއްކަމަށް ބުނެފައިވަނީ ބެލެނިވެރިން އެކުދިންނަށް އިތުބާރުކުރުމެވެ. އެހެންނަމަވެސް ބެލެނިވެރިންނަށް އެމީހުންގެ ދަރިން ބަލަނީ ކޯއްޗެއްކަމެއް އެއްގޮތަކަށްވެސް ނޭންގޭކަން ދިރާސާގައި ވަނީ ހާމަވެފައެވެ. ދިރާސާއިން އެނގުނުގޮތުގައި އާންމުގޮތެއްގައި ކުދިން ޕޯން ބަލަން ފަށާ އުމުރަކީ 11 އަހަރެވެ. ނަމަވެސް ބައެެއް ކުދިން މީގެ ކުރިންވެސް ޕޯން ފިލްމް ބަލަންފަށައެވެ.

ދިރާސާގައި ވަނީ ޕޯން ބެލުމަކީ މީހާގެ ދިރިއުޅުމާއި އަދި ސިކުނޑިއަށްވެސް އޭގެ ނޭދެވޭ އަސަރުކުރާކަމެއްކަން ހާމަވެފައެވެ. ބައެއްފަހަރު ބެލެނިވެރިންނަށް މިކަން އެނގިހުރެވެސް ނުހުއްޓުވޭ ސަބަބަކީ ބެލެނިވެރިންވެސް ތިބެނީ ޕޯން ބެލުމަށް ދެވިހިފާފައިކަމަށް ވުން އެކަށީގެންވެއެވެ. ނަމަވެސް މިއީ އަމިއްލައަށް މަސައްކަތް ކޮށްގެން ހުއްޓުވޭނެކަމެކެވެ. އެގޮތުން މި އާޓިކަލްގައި މި ބަލާލަނީ ޕޯން ބެލުމަށް ދެވިހިފާފައިވާ މީހަކު އެކަން ހުއްޓުވުމަށް ކުރެވިދާނެ ކަންކަމަށެވެ.

advertisement

ތިމާގެ މައްސަލައެއް ހުރިކަން ގަބޫލުކުރޭ

އަހަރެމެންގެ މުޖްތަމައުގައި އަމިއްލަ މީހާގެ މައްސަލައެއް ހުރިކަން ގަބޫލުކުރަން ބޭނުންވާ މީހުން ވަރަށް މަދެވެ. ނަަމަވެސް ޕޯން ބެލުން ހުއްޓާލަން ބޭނުންވެފައިވާ މީހެއްނަމަ އަމިއްލަ މީހާގެ މައްސަލައެއް ހުރިކަން އެންމެ ފުރަތަމަވެސް ގަބޫލުކުރާށެވެ.

ގާތް ރަހުމަތްތެރިންގެ ފަރާތުން އެހީ ހޯދުން

މިކަން ހުއްޓާލަން ބޭނުންވާނަމަ ގާތް ރަހުމަތްތެރިއަކާއި މި ވާހަކަ ހިއްސާ ކުރެވިދާނެއެވެ. އަދި ހުއްޓުމަށް އޭނާގެ ފަރާތުން އެހީއަކަށް އެދެވިދާނެއެވެ.

އޮންލައިންކޮށް ބަލާ ތަކެތި މޮނިޓަރކުރުން

އޮންލައިންކޮށް ތިމާ ބަލާ ތަކެތި މޮނިޓަރ ކުރުމަކީ މިކަން ހުއްޓުވުމަށް އެޅޭނެ އެންމެ މުހިންމު އެއް ފިޔަވަޅެވެ. އެއިރުން ހަފްތާއެއްގެ ތެރޭގައި އޮންލައިންކޮށް ބަލާފައި ހުރި ތަކެތީގެ މައުލޫމާތު ލިބޭނެއެވެ. އަދި ހުއްޓާލަން އެހީއަކަށް ވާނެއެވެ.

ފޯނު ބޭނުންކުރާ މިންވަރު މަދުކުރުން

ފޯނު ބޭނުންކުރާ މިންވަރު މަދުކުރުމަކީވެސް ޕޯން ބެލުމަށް ދެވިހިފާފައިވާ މީހަކަށް އެކަން ހުއްޓާލުމަށް ކުރެވިދާނެ ވަރަށް މުހިންމު ކަމެކެވެ.

ގޭގައި މިފަދަ ތަކެތި ހުރިނަމަ ނައްތާލުން

ބައެއް މީހުން ފޯނުން ނޫނަސް އެފަދަ މެގަޒިންތަކާއި ސީޑީތައް ގޭގައި ފޮރުވައިގެން ގެންގުޅެއެވެ. އެހެންކަމުން މިފަދަ ވީޑިއޯ ބެލުން ހުއްޓާލަން ބޭނުންވާނަމަ އެތަކެތި އުކާލާށެވެ.

ކައިވެނި ކޮށްގެން އުޅޭނަމަ ކައިވެންޏާއިމެދު ވިސްނާލުން

ކައިވެންޏެެއް ކޮށްގެން އުޅޭނަމަ އަމިއްލަ ނަފްސާ ބައެއް ސުވާލުކޮށްލާށެވެ. ތިޔަ ކައިވެނީގައި ތިޔައުޅެނީ ހިތްހަމަޖެހިގެން ސެޓިސްފައި ވެގެން އުފަލުގައި ހެއްޔެވެ؟ ކައިވެނީގައި މަދުވަނީ ކޮންކަމެއް ހެއްޔެވެ؟ ކައިވެނީގައި އަނބިފިރި ކަމުގެ ގުޅުމާއިމެދު ހިތްހަމަޖެހޭ ހެއްޔެވެ؟ މިފަދަ ސުވާލުތައް އަމިއްލަ ނަފްސާއި ކުރުމުން އެޑިކްޓް ވެފައިވަނީ ކީތްވެގެންކަން އަމިއްލައަށް ދެނެގަނެވިދާނެއެވެ. އަދި އެކަންކަން ރަނގަޅުކުރުމަށް މަސައްކަތް ކުރެވިދާނެއެވެ.