ގޭތެރޭގައި ގެންގުޅޭ ގަހަށް ބަލި ޖެހޭނަމަ މިހެން ހަދާ

ގޭތެރޭގައި ގަސް ހެއްދުމަކީ މިހާރަކަށް އައިސް ވަރަށް ގިނަ މީހުން ކުރަމުން އަންނަ ކަމެކެވެ. މިއީ ވަރަށް ލޯބިން ބައެއް މީހުން ކުރާކަމެއްވެސްމެއެވެ. ވަރަށް އަގުބޮޑުކޮށް ގަނެގެން ގެންނަ ގަހަށް ބަލިތައް ޖެހި އެ ގަސްމަރުވުމަކީ ބޭނުންވާނެ ގޮތެއްނޫނެވެ. ގޭތެރޭގައި ގަސް ހެއްދިޔަސް އެގަހަށް  ތަފާތު އެކި ބާވަތްތަކުގެ ބަލިތައް ޖެހެއެވެ. އެހެންކަމުން ޖަހުގެ ދުޅަހެޔޮކަން އިތުރުކުރުމަށް ގަހަށް ޖެހޭ ބަލިތައް ދެނެގަނެ ގަހަށް ބޭނުންވާ ފަރުވާ ދިނުމަކީ ވަރަށް މުހިންމު ކަމެކެވެ.

ގޭތެރޭގައި ހައްދާ ގަސްތަކަށް އެންމެ އާންމުގޮތެއްގައި ޖެހޭ ބައްޔަކީ އެ ގަހުގައި ކުދިކުދި ފަންޏާއި އުދުހޭ ސޫފިތައް އަށަގަތުމެވެ. މިތަކެތި ގަހުގެ ފަތާއި ތަނޑުތަކުން ފެށިގެން މުލަށް ދާންދެން ކައި ހުސްކޮށްލަ އެވެ. މީގެ ބައެއް އެއްޗެހި ފަތުގައި ނުވަތަ ގަސް އިންދާފައި ހުންނަ ވެލީގައި ފިރުކެމުން އުޅެ އެވެ. އަނެއްބައި އެއްޗެހި އެއްގޮތަކަށް ވެސް ކުރިއަށް ނުގޮސް އޮންނަ އެއްތަނެއްގައި އޮވެ އެވެ. މިބާވަތުގެ ސޫފި ބޮޑަށް ވައްތަރުވާނީ ފަންގަސް އާއެވެ.

advertisement

ގޭތެރޭގައި ހުންނަ ގަހުގައި ބަލިއަޅަނީ ކީއްވެ؟

ގޭތެރޭގައި ބަލި އަޅާ އެންމެ ބޮޑު ސަބަބަކީ ބޭރުތެރޭގައި ދިރިއުޅޭ ފަދަ ދިރޭތަކެތީގެ އުދަނގޫ އެތެރޭގައި ނުޖެހުމެވެ. ބޭރުގައި ނަމަ އެފަދަ ކޮންމެ ވެސް ދިރޭ އެއްޗެއްގެ ޝިކާރައަކަށް މިސޫފިތައް ވެ އެވެ. އަދި ބޭރުތެރެއިން ލިބޭ ފަދަ ސާފު ވައި ނުލިބުމަކީ ވެސް އަނެއް ސަބަބެވެ.

ހޫނުގަދަ މޫސުމަށް ވުރެ ފިނީގައި މިތަކެތީގެ އުދަނގޫ ބޮޑުވެ އެވެ. އެއީ ފިނީގައި ގަސްގަހާގެހީގެ ހެދިބޮޑުވުމުގެ މަރުހަލާ އަށް ލަސްކަމެއް އަންނާތީ އެވެ.

ގަހުގައި އާންމު ބައެއް ސޫފާސޫފި ނުވަތަ ބަލިތައް އުޅޭކަން އިނގޭނީ ގަހުގައި މަކުނުވާ ހުރުން ނުވަތަ ކުދިކުދި މަކުނުތައް އުޅުން، ފަތްތަކުގައި އުޅޭ ކުދި ކުދި އުދުހޭ ހުދު ސޫފިތަކެއް، ކުދި އަދި ހިމަކޮށް ހުންނަ ކަޅާއި މުށި އަދި ފެހި ސޫފިތަކެއް އުޅޭނަމައެވެ. މީގެއިތުރުން ހަރުކޮށް އަދި އުފުލިފައި ހުންނަ މުށި ތަންކޮޅުކޮޅު ފަތާއި ތަނޑުގަނޑުގައި ހުރުން، ގަސް އިންދާފައި ހުން ފަހުގައި އުޅޭ ކުދި ދިރޭ އެއްޗެހިތަކެއް، ފަތްތަކުގެ ބުޑުގަ އާއި ތަނޑުގައި ހުންނަ ހުދުކުލައިގެ ކަފަހެން ފުފިފައި ހުންނަ އެތިކޮޅުތަކެއް ހުންނަނަމަ އެއީވެސް އާންމު ބަލިތަކެވެ.

ގަހުން ބަލި ފެނުމާ އެކު އަވަހަށް ނައްތައިލަން މަސައްކަތް ކުރުމަކީ މުހިންމު ކަމެކެވެ. އެންމެ ފުރަތަމަ ކުރަންވީ ކަމަކީ އިތުރު ގަސްތަކަށް ފެތުރުނަ ނުދީ ހުއްޓުވުމެވެ. މިހެންވެ އެހެން ގަސްތަކާއި ބަލިޖެހިފައި ހުންނަ ގަސް ދުރުކުރާށެވެ. އަދި ދެތިން ހަފުތާ ވަންދެން ގަސް ކުރިން ހުރި ސަރަހައްދު ރަނގަޅަށް ބަލާށެވެ.

ބައެއް ސޫފިތައް ގަހާއި ވަކިވުމަށް ފަހު ވެސް ފިލައިގެން ގިނަ ދުވަސްތަކެއް ވަންދެން ދިރިއުޅެ އެވެ. މިހެންކަމުން ގަސް ހުރި ސަރަހައްދު ރަނގަޅަށް ސައިބޯނިކަހަލަ އެއްޗެއް ބޭނުންކޮށްގެން ދޮވެ ސާފުކޮށްލާށެވެ. އަދި ހަމަ މިގޮތަށް ގަސްވެސް މިފަދަ އެއްޗެއް ބޭނުންކޮށްގެން ފެނުން ދޮވެލާށެވެ. އެކަމަކު ބައެއް ނާޒުކް ގަސްތަކަށް ސައިބޯނިފަދަ އެއްޗެއް ބޭނުން ކުރުމުގައި ގެއްލުމެއް ވެދާނެތޯ ވިސްނާށެވެ. މިހެންވެ ހުރިހާ ފަތެއް ދޮވުމުގެ ކުރިން ފުރަތަމަ ޓެސްޓްކޮށްލާށެވެ.

ގަސް އިންދާފައި ހުރި ޕޮޓް ވެސް ރަނގަޅަށް ދޮންނަން ވާނެ އެވެ. ބައެއްފަހަރު އޭގެ ފުލުގަ އާއި އަރިމަތިން ވަދެ ފިލާ އޮވެވޭނެ ތަންކޮޅެއް އޮތިއްޔާ އެތަނެއްގައިވެސް ސޫފިތައް ފިލާ އޮވެދާނެ އެވެ.