ސިޔާސީ މަސައްކަތުން ދުރުގައި ތިބޭ ކުރީގެ ރައީސުންނަށް އިނާޔަތް ދިނުން ކިހިނެތްވާނެބާ؟

ރައީސްކަން ކޮށްފައިވާ ކޮންމެ މީހަކަށް ދައުލަތުގެ ބަޖެޓުން މަހަކަށް 100000 ރުފިޔާ، އަހަރަކަށް 1200000 ރުފިޔާ ހޭދަކުރެއެވެ. މިވަގުތު ރާއްޖޭގައި ކުރީގެ 4 ރައީސުން އެބަ ތިއްބެވެ. މައުމޫނާއި، ނަޝީދާއި ޔާމީން އަދި ވަހީދަށް އިނާޔަތް ދިނުމަށާއި އޮފީސް ހިންގުމަށްދޭ ޖުމްލަ ހަރަދުގެ ގޮތުގައި މިއަހަރުގެ ބަޖެޓުން 173.9 މިލިއަން ރުފިޔާ ހަރަދުކުރުމަށް ނިންމާފައިވެ އެވެ.  

ރާއްޖޭގައި ކުރީގެ ރައީސުންގެ އިންތިޒާމުތައް ހަމަޖައްސަނީ ރައީސުލްޖުމްހޫރިއްޔާ ކަން ކޮށްފައިވާ މީހަކަށް ދޭން ޖެހޭ ރައްކާތެރިކަމާއި އިނާޔަތްތަކާ ބެހޭ ގާނޫނުގެ ދަށުންނެވެ. އެ ގާނޫނަށް އަމަލުކުރަން ފެށީ 2009 ވަނަ އަހަރު އެވެ.

advertisement

ކުރީގެ ރައީސުންނަށް ރައްޔިތުންގެ ފައިސާއިން ކުރާ ހޭދަ

މި ގާނޫނުގެ ދަށުން މާލީ އިނާޔަތެއްގެ ގޮތުގައި ކުރީގެ ރައީސުންނަށް ކޮންމެ މަހަކު 50،000 ރުފިޔާ، (ރައީސުލްޖުމްހޫރިއްޔާ ކަން އެއް ދައުރަށް ވުރެ ގިނަ ދައުރު ކޮށްފައިވާ މީހަކަށް ކޮންމެ މަހަކު 75،000 ރުފިޔާ) ދައުލަތުން ފޯރުކޮށްދޭން ޖެހެއެވެ.

މީގެ އިތުރުން ކުރީގެ ރައީސުން ދިރިއުޅުއްވާ ތަނުގެ ހަރަދަށް މަހަކު 50،000 ރުފިޔާ، އަދި “މުޖުތަމައުއަށް ފައިދާހުރި އިޖުތިމާއީ މަސައްކަތްތައް ކުރުމަށްޓަކައި” އެމީހަކު ބޭނުންވެއްޖެ ހިނދެއްގައި، މަސައްކަތް ކުރާނެ އޮފީހަކާއި، މުވައްޒަފުންނާއި، އެހެނިހެން ކަންތައްތައް ހަމަޖެއްސުމަށްޓަކައި، މަހަކު 175،000 ރުފިޔާއާ ހަމައަށް ދައުލަތުން ފައިސާ ހަމަޖައްސައިދޭންޖެހެއެވެ. ދުނިޔޭގެ ކޮންމެ ގައުމަކުން ވެސް 700،000 (ހަތް ލައްކަ) ރުފިޔާ އަށް ވުރެ ބޮޑު ނުވާ ގޮތަށް ސިއްހީ ފަރުވާގެ ހަރަދުތައް ވެސް ދައުލަތުން ކުރީގެ ރައީސުންނަށް ފޯރުކޮށްދޭން ޖެހެއެވެ.

އެހެންކަމުން ކުރީގެ ރައީސުންނަށް، ދިރިއުޅޭތަނުގެ ހަރަދަށާއި، އިނާޔަތުގެ ގޮތުގައި މަހަކަށް އެއް ލައްކަ ރުފިޔާ ލިބެއެވެ. އޮފީސް ހިންގުމަށް އެއްލައްކަ ހަތްދިހަ ފަސް ހާސް ރުފިޔާ އާއި އެކު ޖުމުލަ ކޮންމެ މަހަކު ޖުމުލަ ދެލައްކަ ހަތްދިހަ ފަސްހާސް ނަގުދު ފައިސާ ލިބެއެވެ.

ސިޔާސީ ކަންކަމާއި ދުރުގައި ތިއްބަވާ ކުރީގެ ރައީސުންނަށް އިނާޔަތް ދިނުން ކިހިނެތް؟

ކުރީގެ ރައީސުންނަށް ލިބޭ އިނާޔަތްތައް ނަންގަވައިގެން ކުރީގެ 4 ރައީސުން ވެސް އަދިވެސް އުޅުއްވަނީ ސިޔާސީ ކަންކަމުގެ ތެރޭގައެވެ. މައުމޫނަކީ އެމް.އާރް.އެމްގެ ލީޑަރެވެ. އަދި މިހާރުގެ ސަރުކާރުގެ ކޯލިޝަން ބައިވެރިއެއްވެސް މެއެވެ. ކުރީގެ ރައީސް ނަޝީދަކީ އެމްޑީޕީގެ އިސް ފަރާތެކެވެ. ރައްޔިތުންގެ މަޖިލީހުގެ މައްޗަންގޮޅީ އުތުރު ދާއިރާ މެމްބަރެވެ. ރައްޔިތުންގެ މަޖިލީހުގެ ރައީސްވެސް މެއެވެ.

ކުރީގެ ރައީސް ޔާމީނަކީ ޕީއެންސީގެ އިސް ލީޑަރެވެ. މިހާރުގެ އިދިކޮޅު ޕާޓީގެ އިސް ލީޑަރެވެ. މުޖުތަމައަށް ފައިދާ ހުރި މަސައްކަތެއް މިބޭފުޅުން ކުރައްވާ ކަމަށް ރައްޔިތުން ގަބޫލުކުރޭތޯ އެއީ ސުވާލެކެވެ. ކުރީގެ ރައީސުން ސިޔާސީ މަސައްކަތުން އެކަހެރިވެ ތިބޭނަމަ އިނާޔަތާއި ސަލާމަތީ ރައްކާތެރިކަން ފޯރުކޮށްދިނުމަށް ފާސްކުރުން ކިހިނެތްވާނެ ތޯއެވެ؟ އޭރުން ފަހަރުގައި ރައްޔިތުންގެ ފައިސާއިން އަހަރަކަށް 200 މިލިޔަނާއި ގާތް ކުރާ އަދަދަކަށް ފައިސާ ސަލާމަތް ކުރެވިވެސް ދާނެއެވެ.