އެކި އުމުރުފުރާގެ ކުޑަކުދިންނަށް ނިދި ބޭނުންވާ މިންވަރުތައް

ނިންޖަކީ ކުޑަކުދިންނަށް ވަރަށް ބޭނުންތެރި އެއްޗެކެވެ. ބޮޑުވަމުން އަންނަ ކުދިންނަށް ހެދިބޮޑުވުމަށް ހަމަ ނިދި ކޮންމެހެންވެސް ބޭނުންވެއެވެ. ރޭގަނޑު ހަމަނިދި ނުލިބޭ ކުދިންނަށް ދުވާލުގެ ވަގުތުތަކުގައި ކަންކަން ކުރުމަށް ހުރަސްތަކާއި ކުރިމަތިވެއެވެ.

ކުޑަކުދިންނަށް ބޭނުންވަނީ ކިހާ ނިންޖެއް؟

ބެލެނިވެރިން އެންމެ ބޮޑަށް ހިތައްއަރާނެ ސުވާލަކީ ތިމާގެ ދަރިފުޅަށް ނިދި ބޭނުންވަނީ ކިހާ މިންވަރަކަށްތޯއެވެ. ހަނދާނުގައި ބަހައްޓަންވީ ކޮންމެ ކުއްޖަކީ ތަފާތު ކުއްޖެއްކަމެވެ. އެހެންކަމުން ކޮންމެ 2 ކުއްޖެެއްގެ ނިދުމުގެ ޝެޑިއުލްއާއި ނިދާ ވަގުތު ތަފާތުވާނެއެވެ.

advertisement

ބައެއް ކުދިންނަކީ ގިނައިން ނިދާ ކުދިންނެވެ. އަނެއްބައި ކުދިންނަކީ މަދުން ނިދާ ކުދިންނެވެ. ނަމަވެސް އާންމުގޮތެއްގައި އުމުރާއި ގުޅޭގޮތުން ނިދި ލިބެންޖެހޭ ވަކި އަދަދެއްހުރެއެވެ. އެއީ ރޭގަނޑު ނިދާ ވަގުތާއި އަދި ދުވާލު ނަގާ ނެޕް ހިމަނައިގެންނެވެ.

• 4 މަހާއި 12 މަސް – މި އުމުރުގެ ކުދިންނަށް ދުވާލެއްގެ މައްޗަށް ބޭނުންވާނީ 12 ނުވަތަ 16 ގަޑިއިރުގެ ނިންޖެވެ.
• 1 އަހަރާއި 2 އަހަރު – 11 ނުވަތަ 14 ގަޑިއިރުގެ ނިދި
• 3 އަހަރާއި 5 އަހަރު – 10 ނުވަތަ 13 ގަޑިއިރުގެ ނިދި
• 6 އަހަރާއި 12 އަހަރު – 9 ނުވަތަ 12 ގަޑިއިރުގެ ނިދި
• 13 އަހަރާއި 18 އަހަރު – 8 ނުވަތަ 10 ގަޑިއިރުގެ ނިދި

ޑޮކްޓަރަކަށް ދައްކަންވީ ކިހާހިސާބަކުން؟

• ދަރިފުޅުގެ ނިދި ހުންނަގޮތައް ބަލައި ބައެއް ފަހަރު ޑޮކްޓަރެއްގެ އިރުޝާދު ހޯދަންޖެހޭ ފަހަރުތައްވެސް އައިސްދާނެއެވެ. އޭގެތެރޭގައި:
• މާގަދަޔަށް ގުގުރިދެމުން
• ދަރިފުޅު ނިދީގައި މާގަދައަށް ގުގުރި ދަމާނަމަ ޑޮކްޓަރަކަށް ދައްކަންވާނެއެވެ.
• ނިދީގައި ހިނގުން

ނިދީގައި ހިނގުމަކީ ނިދި ޖެހި އެއްކޮށް ނުހޭލެވި ހުންނައިރު ދިމާވާ ކަމެކެވެ. ނިދީގައި ހިގާއިރު އެނދުގައި އިނދެ ހަރަކާތްކޮށްފާނެއެވެ. މިސާލަކަށް ލޯކެހުން ފަދަ ކަންކަން ކޮށްފާނެއެވެ. އަދި އެނދުން ތެދުވެ ހިނގާފާނެއެވެ. ދަރިފުޅާށް ވާހަކަދެއްކިނަމަވެސް ޖަވާބެއް ނުދޭނެއެވެ. ނިދީގައި ދަރިފުޅު މިފަދަ ކަންކަން ކުރާނަމަ ހޭލައްވައިނުލާ އަލުން ނިދަން ބާއްވާށެވެ. ނަމަވެސް މާގިނައިން މިކަން ތަކުރާރުވާނަމަ ޑޮކްޓަރަކަށް ދައްކާށެވެ.

ނައިޓް ޓެރާސް

މިއީ ނައިޓްމެއާރސްއާއި ތަފާތު ކަމެކެވެ. މިކަން ދިމާވާއިރު ކުއްޖާ ފުންކޮށް ނޭވާލާ އަދި ހޭލާ އޮތްހެން ހީވާނެއެވެ. އަދި ހޭލައްވާލާއިފި ނަމަ ވީގޮތެއް ނޭންގި ވަރަށް ބޮޑަށްވެސް އޮޅުންއަރާނެއެވެ. އަދި އަލުން ހަމަޖެހި ނިދަން ދިއުމަށް އުނދަގޫވާނެއެވެ. މިކަން އާންމުގޮތެއްގައި ދިމާވަނީ އުމުރުން 4 އަހަރާއި 12 އަހަރުގެ ކުދިންނަށެވެ. ނަމަވެސް 18 މަހުގެ ކުދިންނަށްވެސް މިކަން ދިމާވެއެވެ.

ކުޑަކުދިންނަށް ނިދަން އުނދަގޫވަނީ ކީތްވެ؟

ބައެއް ކުދިންނަށް ނިދަން އުނދަގޫވުމަކީ އެއްވެސް ސަބަބަކާއި ނުލާ ދިމާވާ ކަމެކެވެ. ނަމަވެސް ގިނަފަހަރު ކުޑަކުދިން ނިދަން އުނދަގޫވުމުގައި ސަބަބުތަކެއް ވަނީ ގުޅިފައެވެ. އޭގެތެރޭގައި ނިދަން ކައިރިކޮށްފައި މާގިނައިން ސްކްރީނަށް ބެލުމާއި، ކެފެއިން އެކުލެވޭ ބުއިންތައް ނުވަތަ އެހެނިހެންވެސް ސޯޑާ ފަދަ ބުއިންތައް ބުއިން ހިމެނެއެވެ.

އެހެންކަމުން ކުދިންނަށް ސްކްރީންގައި ހޭދަކުރާ ވަގުތު ލިމިޓްކުރާށެވެ. ވަކިން ޙާއްސަކޮށް ނިދަން ކައިރިކޮށްފައި މަދުކުރުވާށެވެ. އަދި ކެފެއިން ހުންނަ ތަކެތި ނުދޭށެވެ. އަދި ކުއްޖާއަށް ނިދުމަށް މަގުފަހިކުރުވުމަށްޓަކައި ނިދަން ކައިރިކޮށްފައި ފޮތެއް ކިޔާލުން، މަޑުމައިތިރި މިއުޒިކެއް އަޑުއަހާލުން ނުވަތަ ކުއްޖާގެ ދުވަސް ދިޔަގޮތާއި ބެހޭގޮތުންވެސް ބެލެނިވެރިޔާއަށް ވާހަކަދަައްކާލެވިދާނެއެވެ.