ސައިންސްވެރިން ބުނާގޮތުގައި ހަށިގަނޑަށް ޕްރޮޓީން ބޭނުންވާ 4 ސަބަބު

އިންސާނާގެ ހަށިގަނޑު އެންމެ ފުރިހަމަ ގޮތުގައި ހިނގުމަށް އެތައް މާއްދާއެއް ހަށިގަނޑަށް ބޭނުންވެ އެވެ. އެގޮތުން އެންމެ ފާހަގަކޮށްލެވޭ އެކައްޗަކަށް ޕްރޮޓީންވާނެ އެވެ.

ހަށިގަނޑަށް ބޭނުންވާ މުހިންމު މާއްދާތަކުގެ ތެރޭގައި ހިމެނޭ ޕްރޮޓީންއަކީ އިންސާނާގެ ހެދިބޮޑުވުމަށާއި މަސްތައް ވަރުގަދަކުރުމަށްޓަކައި ވެސް ބޭނުންތެރި މާއްދާއެކެވެ. މީގެ އިތުރުން އައު ސެލްތަށް އުފެއްދުމަށާއި ހަށިގަނޑުގައިވާ އެންޒައިމްތަކާއި ހޯމޯންތައް އެއްވަރެއްގައި ބެހެއްޓުމަށްޓަކައި ޕްރޮޓީން ބޮޑު ރޯލެއް އަދާ ކުރެއެވެ.

advertisement

މީގެ އިތުރުން އެންޒައިމް އާއި ހޯރމޯންގެ ގޮތުގައި އުފެދިފައިވާ ޕްރޮޓީންތައް ހަށިގަނޑުގެ އެކި ގުނަވަންތައް ހިންގުމުގެ މަސައްކަތުގައި ހަށިގަނޑުގެ ހުރިހާ ދިމާއެއްގައި ހަރަކާތްތެރިވަމުންގެންދާއިރު މިއީ ހަށިގަނޑަށް ބޭނުންވާ އެންމެ މުހިއްމު ބަޔަށް ވެގެން އެބަދެ އެވެ. އަދި މިއީ ފުދޭ ވަރަށް ކާނާގައި ކޮންމެހެން ހިމަނަންޖެހޭ ބައެކެވެ.

ހަށިގަނޑަށް ޕްރޮޓީން ބޭނުންވަނީ ކީތްވެ؟

އައު ސެލޯށިތަކާއި ދިޔަވަރުތައް އުފެއްދުމަށް: މިއީ ހާއްސަކޮށް ފުރާވަރަށް އަރަމުން އަންނަ ކުދިންނަށާއި، މާބަނޑު އަންހެނުންނާއި، ކިރުދޭ މައިންނަށް ވަރަށް ބޭނުންތެރި ކަމެކެވެ.

އުނިވާ އެމިނޯއެސިޑްތައް އަނބުރާ ލިބިގަތުމަށް: ހަށިގަނޑުގައި ހުންނަ ބައެއް ދިރުތައް މަރުވުމުން އެދިރުތަކުގައިވާ އެމިނޯއެސިޑް ތަކުން ބައެއް ކުޑަކަމުދާ ތަކެއްޗާއި އެކުވެގެން ހަށިގަނޑުން ބޭރުވެގެންދެ އެވެ. އަދި ބައެއް ބަލިޖެހުމުން ހަށިގަނޑުން އެމިނޯއެސިޑް ބޭނުންވާ މިންވަރު އިތުރުވެ އެވެ. މިހެން ކަމުން ކޮންމެ މީހަކުވެސް ހަށިގަނޑުން އުނިވާ އެމިނޯއެސިޑް އަނބުރާ ހޯދުމަށް އިތުރު ޕްރޮޓީން ކާންޖެހެ އެވެ.

ތަފާތު ބަލިތަކުން ހަށިގަނޑު ދިފާއުކުރުމަށް : އިންސާނާގެ ހަށިގަނޑަށް ވަންނަ އެކި އެކި ވައިރަސްތަކާއި، ބެކްޓީރިޔާ ނައްތާލުމަށް އުފައްދާ “ހަށިދަމަނަ”އަކީ އެކަމަށް ހާއްސަ ޕްރޮޓީން އެކެވެ.

ހަށިގަނޑަށް ބޭނުންވާ ހަކަތަ އުފެއްދުމަށް: ހަށިގަނޑަށް ބޭނުންވާ ހަކަތަ ފުރަތަމަ ހޯދަނީ ކާބޯސް އިންނެވެ. ދެން ފެޓް އިންނެވެ. މިދެބައި ކެއުމުގައި މަދުވެއްޖެނަމަ މަސްތަކުގައި ހުންނަ ޕްރޮޓީންތައް ވިރި ހަކަތައަށް ބަދަލުވެ އެވެ.

ޕްރޮޓީންއަކީ ކެލްސިއަމް ހަށިގަނޑަށް ނަގައިގަތުމަށާއި ކަށިތައް ވަރުގަދަ ކުރުމަށް މުހިންމު މާއްދާއެކެވެ. ހަށިގަނޑަށް ބޭނުންވާ މިންވަރަށް ޕްރޮޓީންސް ނުލިބޭނަމަ ކަށިތަށް ފީވެ ކަށިތަށް ބިންދައިގެން ދިޔުމުގެ ފުރުސަތު ބޮޑުވެގެންދެއެވެ. އަދި ޕްރޮޓީންސް މަދު މީހެއްގެ ކަށިތަށް ބިނދިއްޖެނަމަ ރަނގަޅުވާންވެސް ވަގުތު ނަގައެވެ. މީގެ އިތުރުން އާ ސެލްތަކާއި ޓިޝޫތައް އުފެއްދުމަށް ވެސް ޕްރޮޓީން ބޭނުންވެއެވެ.

ޕްރޮޓީން ލިއްބައިދޭ ބައެއް ކާނާ:

• އެއްގަމުމަހުގެ ބާވަތްތައް
• ކަނޑުމަހާއި ފަރުމަހުގެ ބާވަތްތައް
• ހިއްކާފައި ހުންނަ ތޮޅި، އޮށުގެ ބާވަތްތައް
• މަދުގެ ބާވަތްތައް
• ކުކުޅު ބިސް
• ކިރާއި ކިރުގެ އުފެއްދުންތައް
• ގޮވާމުގެ ބާވަތްތައް
• ބައެއް ބާވަތުގެ ތަރުކާރީ

ހަށިގަނޑުން ޕްރޮޓީންސް މަދުވާނަމަ ފޮނި ކެއުންތަށް ކާހިތްވާނެއެވެ. ސަބަބަކީ ޕްރޮޓީންއަކީ ލޭގައި ހަކުރުގެ މިންވަރު އެއްވަރެއްގައި ބެހެއްޓުމަށް އެހީތެރިވެދޭ މާއްދާއަކަށްވާތީއެވެ.