ކުޑަކުދިން ހިޔާލީ ރައްޓެހިން ގެންގުޅުން: ފައިދާ ކުރާކަމެއްތަ ނޫނީ ގެއްލުމެއްތަ؟

އިމޭޖިނަރީ ރަހުމަތްތެރިން ނުވަތަ ހިޔާލީ ރަހުމަތްތެރިއެއް ގެންގުޅުމަކީ ނޯމަލް ނުވަތަ ކުއްޖާގެ ޅަދުވަސްތަކަށް އޭގެއިން ފައިދާ ކުރާ ކަމެކެވެ. މިކަމާއި ގުޅޭގޮތުން ހޯދުންތައް ހަދާތާ ވަނީ ވަރަށް ގިނަ ދުވަސްވެފައެވެ. ޑޮކްޓަރުންނާއި އަދި ބެލެނިވެރިންވެސް މިކަމާއި މެދު ދަނީ ސުވާލު އުފައްދަމުންނެވެ. އެއީ ރަނގަޅު ކަމެއްތޯއެވެ.

ގިނަ ހޯދުންތަކުން ދައްކާގޮތުގައި ކުޑައިރު ކުއްޖާގެ އިމޭޖިނަރީ ރަހުމަތްތެރިއެއް ހުންނަނަމަ އެއީ ވަރަށްވެސް އާދައިގެ ކަމެެއްކަމަށެވެ. އަދި މިކަމުގައި ކުއްޖާއަށް އެއްވެސް ގެއްލުމެއް ނެތް ކަމަށެވެ. ހޯދުންތަކުން ދައްކާގޮތުގައި 7 އަހަރުން ދަށުގެ ކުދިންގެ %65 ކުދިންގެ އިމޭޖިނަރީ ރަހުމަތްތެރިއެއް ހުރެއެވެ.

advertisement

މީގެ މާނައަކީ ކޮބާ؟

އިމޭޖިނަރީ ނުވަތަ ހިޔާލީ ރަހުމަތްތެރިއަކު ގެންގުޅުމަކީ ކުއްޖާއާއިއެކު ކުޅޭނެ އަދި ކަންކަން ޝާމިލް ކުރާނެ ރަހުމަތްތެރިއަކު ގެންގުޅުމެވެ. ހިޔާލީ ރަހުމަތްތެރިއެއްގެ ގޮތުގައި ކުއްޖާ ނުފެންނަ ރަހުމަތްތެރިއެއް، ނުވަތަ ކުޅޭން ގެންގުޅޭ ކޮންމެވެސް ޖަނަވާރެއް ނުވަތަ އެނޫންވެސް އެއްޗެއް ގެންގުޅެދާނެއެވެ.

ހޯދުންތަކުން ދައްކާގޮތުގައި ކުއްޖާ ކުޅޭއިރު ހިޔާލީ ރަހުމަތްތެރިއެއް ގެންގުޅޭނަމަ އޭގެ ސަބަބުން ކުއްޖާއަށް ފައިދާވެއެވެ. އޭގެތެރޭގައި:

• ސޯސިއަބިލިޓީ އިތުރުވުން
• ކްރިއޭޓިވިޓީ އިތުރުވުން
• އެމޯޝަނަލް އަންޑަސްޓޭންޑިން ރަނގަޅުވުން

ހިޔާލީ ރަހުމަތްތެރިއަކު ގެންގުޅެންވީ ބައެއް ސަބަބު:

• މައްސަލަތައް ހައްލުވެ ކުއްޖާގެ އިހްސާސްތައް މެނޭޖްކުރަން ދަސްވުން
• ހިޔާލުތައް ތަނަވަސްވުން
• ކުޅޭއިރު ބައިވެރިއަކު ހުރުން
• އެކަނިވެރިކަން ފިލުން
• ގުޅުންތައް ބަދަހިކޮށް އެކަމަށް ކުއްޖާއަށް ވިސްނަން ފުރުސަތު ލިބުން

ފަހުގެ ހޯދުންތަކުން ދައްކާގޮތުގައި އުމުރުން 5 އަހަރާއި 12 އަހަރުގެ %28 ކުދިންގެވެސް ހިޔާލީ ރަހުމަތްތެރިން ހުރެއެވެ. އަދި ފިރެހެން ކުދިންނަށްވުރެ ގިނައިން އަންހެން ކުދިންގެ މިފަދަ ރަހުމަތްތެރިން ގިނައެވެ.

މިކަމަށް ބެލެނިވެރިން އަމަލުކުރަންވީ ކިހިނެތް؟

ދަރިފުޅުގެ ހިޔާލީ ރަހުމަތްތެރިއަކު ހުރެ އެވާހަކަ ބެލެނިވެރިޔާގެ ގާތުގައި ދައްކާނަމަ ކަނުލާ އަޑުއަހާށެވެ. އެއިރުން ދަރިފުޅާއި ގުޅޭގޮތުން ގިނަ މައުލޫމާތުތަކެއް އިނގި، ދަރިފުޅުގެ ޝައުގުވެރިކަން ހުރީ ކޮންކަމަކަށްތޯ އަދި ހިޔާލީ ރަހުމަތްތެރިޔާ ކުރާ ކަންތައްތައް އިނގިގެންދާނެއެވެ.

ހިޔާލީ ރަހުމަތްތެރިޔާ ހުންނަން ޖެހޭނީ ކުއްޖާގެ އުމުރުން ކިހާ އުމުރަކަށް ދާންދެން؟

އާންމުކޮށް ކުއްޖާގެ އުމުރުން މާ ދޮށި ވާއިރުވެސް ހިޔާލީ ރަހުމަތްތެރިން ތިބޭނަމަ ބެލެނިވެރިން ކަންބޮޑުވެއެވެ. ނަމަވެސް އުމުރުން 7 އަހަރަށް ދާއިރުވެސް ބައެއް ކުދިން އަދި އަނެއްބައި ކުދިން އުމުރުން 12 އަހަރަށް ދާއިރުވެސް ހިޔާލީ ރަހުމަތްތެރިން ގެންގުޅެއެވެ. މިއީ މައްސަލައެއް ނޫނެވެ. ނަމަވެސް ބެލެނިވެރިން މިކަމާއި ގުޅިގެން މާބޮޑަށް ކަންބޮޑުވާނަމަ މެންޓަލް ހެލްތް ޕްރޮފެޝަނަލްއެއްގެ އެހީތެރިކަން ހޯދިދާނެއެވެ.