ވަކިވަކި ފަރުދުންނަށް އިގްތިސާދީ މިނިވަންކަން ނުލިބެނީސް އިޖުތިމާއީ މައްސަލަތަކަށް ހައްލެއް ނުހޯދޭނެ

ފަގީރު ކަމާއި ނުތަނަވަސް ކަމުގައި ދިރިއުޅެން ޖެހުމަކީ މުޖުތަމައުގެ އެކި މީހުންގެ ފަރާތުން ތިމާއަށް ލަދުވެތިކަމާއި ނިކަމެތިކަން އިތުރަށް އިހުސާސް ކުރުވައިދޭ ކަމެކެވެ. އަހަރެމެންގެ މުޖުތަމައުތަކުގައި ގިނަ ބަޔަކު ނިކަމެތިކަމާއި ހާސްކަމާއި ނުތަނަވަސް ކަމުގައި ދުވަހަކަށް ފަހު ދުވަހެއް ހޭދަކުރަމުން އެބަދެއެވެ. ލިބޭ ފައިސާ ކޮޅުން ކިރިޔާ ކައިގެން ދިރިހުރެވޭވަރު ވާ މީހާއަށް ކޮންމެ ދުވަހަކު ކުރިމަތިވާ ލަދުވެތިކަމުގެ ވާހަކައަކީ އެންމެންނަށް އެނގެން ޖެހޭ ކަމެކެވެ.

ސްކޫލަށް ދާ ދަރިން ތިބި ނަމަ، ހަފްތާއަކު ދެތިން ދުވަހު ސްކޫލަށް ފޮނުވަން ޖެހޭ ތަކެތީގެ ލިސްޓެވެ. އެތަކެތި ގަނެވޭހާ ފައިސާ ނެތުމެވެ. ދަރިންގެ އެކްޓިވިޓީ ޔުނިފޯމު ހަލާކުވާލެއް އަވަސް ކަމުން އަވަސް އަވަހަށް އާ ޔުނިފޯމު ހޯދެން ނެތުމެވެ. އާ އަހަރަށް އާ ދަބަހާއި ބޫޓު ހޯދައި ނުދެވޭތީވެ ވާ ދެރައެވެ.

advertisement

ފުދޭމީހާ އޭނާގެ ދަރިއަށް އާ ރިވެތި ތަކެތި ހޯދައި ދިނުމަށް ފަހު، ނުލިބޭ ފަގީރު ކުއްޖާއަށް މަލާމާތް ނުކުރުމަށް ކިޔައި ނުދެއެވެ. ހަނދާނެއް ނުހުރެއެވެ. ބައްޔެއް ވެގެން ޑޮކްޓަރަކަށް ދައްކަން ދިގު ކިއު އެއްގައި ޖެހިގެން ހުރެވޭވަރު ނުވެގެން އަމިއްލަ ކްލިނިކަކަށް ނުވަތަ ހޮސްޕިޓަލަކަށް ދައްކަން ޖެހިއްޖެ ނަމަ ކުރިމަތިވާ ހާސް ކަމެވެ. ފައިސާ ނެތީމައެވެ.

ދަރިންނަށް ރަނގަޅު ކާނާ ހޯދައި ނުދެވޭތީވެ ވާ ދެރައެވެ. އޮފީސް ނިމޭއިރަށް ގެއަށް ދާން ހިނގައިގަތުމުން އެހެން މީހުން ކުރާ މަލާމާތެވެ. އަބަދު ގޭގައި އޮންނާތީވެ ކުރާ މަލާމާތެވެ. އޮފީހުން ބާއްވާ ސަޔަކަށް ނުވަތަ އެއްވުމަކަށް ދާން ޖެހިއްޖެ ނަމަ ލާނެ ރީތި ހެދުމެއް ނެތިގެން ހިތްދަތިވާ ދަތިވުމެވެ. މޫނުމަތި ކުރަކި ވުމުން އެވާ ދެރައެވެ. ގަންނަ ލަދެވެ. ހައްތަހާ ވެސް ފައިސާއިން ހައްލުކުރެވޭނެ ކަންކަމެވެ. ފައިސާ ހުރި ނަމަ ކުރިމަތި ނުވާނެ ހިތްދަތިކަމެވެ.

ޑްރަގް އެޑިކްޝަނާއި ތައުލީމު

ފަގީރު މީހާގެ ދަރި ހަކުރުން ސަލާމަތް ނުވެވިގެން މަގުމަތިވެ، ނިދި ޖެހިފައި ހުއްޓާ ފެނިއްޖެ ނަމަ އޮތީ އޭނާ އަށް ގޯނާ ކުރުމެވެ. އޭނާގެ ފޮޓޯ ނަގައި ފޭސްބުކަށް ލައި މަލާމާތް ކުރުމެވެ. ފުދޭ މީހާ އޭނާގެ ދަރި ހުންނާނެ ގެދޮރު ހޯދައި ދެއެވެ. މަސްތުވީމާ ފަރުވާ އަށް ބޭރުގައުމުތަކަށް ފޮނުވައެވެ. އަހަރެމެންގެ ދަރި އަށް އޮތީ ތާކުން ތާކު ނުޖެހޭ ރީހެބެކެވެ. އަންހެން ކުދިންނަށް ޖާގަ އެއް ނެތެވެ. ކޮންމެ ދުވަހަކު އޮންނަނީ ކުޑަކަމުދާ ތަކެތި ނެގުމެވެ. ބަލަނީ ގަމީހުގެ ގިރުވާނު ހުރިތޯ އާއި ސޯޓު ކަކުލާ ހަމައަށް އާދޭތޯއެވެ. ފަރުވާ އަކަށް ދެނީ އެންމެނަށް އެއް ޕްރޮގްރާމެކެވެ. ހަމަހަށް ހަކުރު ބުއި މީހާ އަށް ވެސް ދެ ދުވަހު ތެޔޮ ބޮޑި ބުއި މީހާއަށް ވެސް އެއް ފަރުވާއެކެވެ.

ފަގީރު ކުއްޖާ ފާސް ނުވުމުން އޭނާގެ ކަން އެ ނިމުނީއެވެ. ދައުލަތުން އެތައް ހޭދައެއް ކޮށްގެން ބޮޑު ހަފްލާ ބާއްވައި ތަރުހީބު ދެނީ ޓޮޕް ޓެން ދަރިވަރުންނަށެވެ. ފައިސާ ހުރިމީހާ އަށް އޮތީ ދިހަ ބާރަ ޓީޗަރުންނަށް ފައިސާ ދީގެން ދަރިންގެ ޓެސްޓު ޕޭޕަރަށް ދަރި ތައްޔާރު ކުރުވުމެވެ.

ފުދޭ މީހާގެ ދަރި ކިޔަވާ ހިތް ނުވާ ނަމަ އޭނާ ކުރާ ހިތްވާ އެހެން ކަންކަމުގެ ތެރެއަށް އޭނާ ވައްދައެވެ. ލަވަ ކިޔުމެވެ. ފެހުމެވެ. ކެއްކުމެވެ. ކުރެހުމެވެ. ކުޅިވަރެވެ. ފެތުމެވެ. މުބާރާތްތަކަށް ދިޔުމެވެ. ހައްތަހާ ވެސް މާލެއިން ކުރެވޭ ކަންކަމެވެ. ފަގީރު މީހާގެ ދަރި ކުރާ ހިތްވާ ކަމެއް ދަސްކުރެވޭނެ މަގެއް ނެތެވެ. މާލެ ދިޔަޔަސް މަރެވެ. ރަށުގަ އޮތަސް މަރެވެ.

އެންމެ ފަސޭހައިން ލިބެނީ މަސްތުވާނެ ހަކުރެވެ. ދެން ވަދެވެނީ ގޭންގުތަކަށެވެ. ދެން ޖަލެވެ. ފަގީރު މީހާ އަށް ކޮށައި ދިން މަގެއް، އިންތިހާ ފަގީރުކަމަށް ވެއްޓިގެން ދާއިރު ހިފި ސެކިއުރިޓީ ނެޓެއް ދައުލަތަކުން ފޯރުކޮށް ނުދެއެވެ. މަހު މުސާރައިގެ ހަ ޕަސަންޓު ފަގީރުމީހާ ވެސް ދެނީ ދައުލަތަށެވެ.

ފައިސާ ނެތި، ފަގީރު ހާލުގައި ދިރިއުޅެން ޖެހުނަސް އެވާހަކަ ދައްކަން މީހުން ލަދު ގަންނަނީ ކީއްވެބާއެވެ؟

ފަގީރު ކަމަކީ ކަންނެތް ކަމާއި ވިޔާނުދާ ކަމުން ކުރިމަތި ކުރުވާ ކަމެއް ކަމަށް ނިންމީ ކާކު ހެއްޔެވެ؟ ފަގީރު މީހުންނަށް ނިސްބަތް ކޮށް ދެރަބަސް ބުނެ މަލާމާތް ކުރުން އާއްމު ކަމަކަށް ވީ ކޮންއިރަކުބާއެވެ؟ ނިކަމެތި ހާލުގެ ވާހަކަ ދައްކަން މީހުން ލަދުގަންނަނީ މިހެންވެ އެވެ.

ކަންނެތް، އުޅުމެއް ނެތް، ވިޔާނުދާ މީހަކަށް ވާކަށް އެކަކުވެސް ބޭނުމެއް ނުވެއެވެ. އެހެން ކަމުން ކޮންމެ ދުވަހަކުވެސް ދިމާވާ “ލަދުވެތި” ކަންކަމުން ފިލަނީއެވެ. މީހުންނާއި ބައްދަލުވާން ބޭނުން ނުވަނީ އެވެ. ދެރަބަހެއް މަލާމާތުގެ ބަހެއް މަޖަލަކަށް ހަދާފައި ބުނެލާ އަޑު އަހަން ބޭނުން ނުވަނީއެވެ. ސްކޫލު ޓީޗަރުންގެ މޫނުމަތިން ފެންނަ ހިތްހަމަނުޖެހުމުގެ ކުލަވަރުތަކުން މަލާމާތުގެ ބަސްތައް ފާޅޫވާތީވެ ކޮންމެ ދުވަހަކުވެސް ހިތްފަޅައިގެން ދެއެވެ.

ތައުލީމީ ނިޒާމުގެ ތެރޭގައި ތިބި މިފަދަ ޓީޗަރުންނާއި ޕްރިންސިޕަލުން ކުދިންނަށް ހިތްތިރި ކަމާއި އޯގާވެރިކަމާއި ލޯބި ކިޔަވައިދޭނީ ކޮން ހިތަކުން ބާއެވެ؟

އުގެނި ފާސްވާ މީހުން މިހާ ގިނަ އިރުވެސް ހިތް ހެޔޮކަމާއި، އަޅާލުމާއި ހެޔޮބަސް ބުނުން އާއްމު ނުވަނީ ކީއްވެބާއެވެ؟ ފަގީރުންނަށް ކުރިމަތިވާ ހާލަތްތަކަކީ ސިޔާސަތުތަކުން އަހަރެމެން ބާކީ ކޮށްފައިވާތީ ކުރިމަތިވާ ކަންކަމެވެ. އެއީ އަހަރެމެންގެ ކަންނެތް ކަމެއް ނޫނެވެ.

ގަނަތެޅެން ދެން މަސައްކަތް ކުރުމުން ކިރިޔާ ކާލެވޭ ވަރުގެ އުޖޫރައެއް ދެނީ އެއީ އަހަރެމެން ބޭނުންވެގެން ރުހިގެން ހިނގާ ނާއިންސާފެއް ނޫނެވެ. ސްކޫލު ނިޒާމުގެތެރެއިން އަހަރެމެންނާއި އަހަރެމެންގެ ދަރިން ބާކީ ކުރަނީ އެއީ އަހަރެމެން އެދިގެނެއް ނޫނެވެ. ސެގްރެގޭޓް ކުރުން ނުވަތަ އެކަހެރިކޮށްލުން މިއީ ސިޔާސަތުތަކުގެ އަސާސެވެ. ބަދަލުވާންވީ އަހަރެމެން ހެއްޔެވެ؟ ނުވަތަ ސިޔާސަތު ހެއްޔެވެ؟