ތާރީހުގެ ތެރެއިން: ރާއްޖެތެރޭ މީހުން މާލެއަށް ކުރަންޖެހުނު މަޖުބޫރީ ހިޖުރަ

ގަބޫލުކުރަންޖެހޭ ހަގީގަތަކީ، މާލެ ތޮއް ޖެހުނީ އިއްތިފާގަކުން ނޫންކަމެވެ. ބޭސްފަރުވާގެ ހިދުމަތާއި، ތައުލީމާއި، ވިޔަފާރީގެ ކަންކަން ހަމަ އެކަނި މާލޭގައި ތަރައްގީ ކުރެވެމުން ދިޔުމުގެ ނަތީޖާ އަކީ އަތޮޅުތެރެއިން ގިނަ އަދަދެއްގެ މީހުން މަޖުބޫރީ ގޮތުނެ މާލެއަށް ބަދަލު ވާން ޖެހުމެވެ.

ގިނައަދަދެއްގެ ދިވެހިން އިޤްތިސާދީ އަޅުވެތިކަމެއްގެތެރޭގައި ތިއްބުމަށްޓަކައި، ސަރުކާރުގެ ވަޒީފާ ނޫން އެހެން އާމްދަނީ ލިބޭނެ ގިނަ ދޮރުތަށް ބަންދުކުރެވުނެވެ. މިގޮތުން 1984 ގައި ލޯކަލް ޓޫރިޒަމް މަނާކުރުން ވެގެންދިޔައީ ރަށު ޢިޤްތިސާދު މުޅިން ބަންދުކޮށްލެވުނު ދޮރަކަށެވެ.

advertisement

އުތުރުރާއި ދެކުނުގެ ތަރައްޤީ ހުއްޓާލައި، މާލެ ސަރައްހައްދަށް އެންމެން ޖަމާކުރުމުގެ ޜޫހެއް އުފެދިގެން ގޮސް، އައްޑޫ ސަރަހައްދުގެ އިޤްތިސާދީ ހުރިހާ ހަރާކާތެއް ހުއްޓާލެވުނެވެ. ދައުލަތުގެ ބަޖެޓުގެ ބޮޑުބައެއް މާލެއަަށް ހަރަދުކޮށް ރައްޔިތުން މާލެ ހިޖުރަކުރަން މަޖުބޫރުކުރެވުނު ހާލަތެއް އުފަންވެގެން ދިޔައެވެ.

ކުޑަ ސިޓީ އާއި ވާރު ޓެކްސް ދައްކައިގެން ރާއްޖެތެރޭގެ ރައްޔިތުން މާލެ އަންނަންޖެހުނީ މާކުރީ ޒަމާނަކު ނޫނެވެ.

އޭގެ ކުރިން މާލެ އާދެވެނީ ކުޑަ ސިޓީއަކުން ހުއްދަ ނަގައިގެންނެވެ. އޭރު ވެސް އެކި ބޭނުންތަކުގައި މާލެ ނައިސް އުޅެން ދައްޗެވެ. މާލެ ނައިސް ބޭނުންތައް ފުއްދަމުން ދިޔަ ދެކުނުގެ ބައެއް ރަށްތަކަށް ޖެއްސި ހާލު ތާރީހުގެ ފަތްފުށްތައް ހާވާލީމާ ފެންނާނެއެވެ.

އެންމެ ކުޑަމިނުން މުސާރަގަނޑު ބަލައި ވެސް ކޮންމެ މަހަކު ދަތުރު ހަދާފައި އަންނަންޖެހެނީ މާލެއެވެ. އެ ދުވަސްތައް މާޒީވެ، ދިޔަ ނަމަވެސް ބައެއް ކަންކަމުގައި ހާލަތު އަދިވެސް އޮތީ ހަމަ އެ ގޮތަށެވެ.