ދަރިވަރުން އެސައިންމަންޓު ގަންނަނީ ކީއްވެ؟

ރާއްޖޭގައި ތިބެގެން ޑިގްރީ އާއި މާސްޓާސް ހެދުމުގެ ފުރުސަތު ދަރިވަރުންނަށް ލިބުމަކީ ނަސީބެކެވެ. ހާއްސަކޮށް، ކުއްޔާއި ދިރިއުޅުމުގެ އެހެން ހަރަދުތައް ކުރުމަށް ފަހު ކިޔަވާނެހާ މިންވަރު ނެތިފައި ތިބި މީހުންނަށް ހިލޭ ޑިގްރީ ޕްރޮގްރާމަކީ އަދި ވަކިން ބޮޑު ނަސީބެކެވެ. އޮންލައިންކޮށް ގޭގައި ތިބެ ނުވަތަ ރަށުގައި ތިބެވެސް މިހާރު ކިޔެވެއެވެ.

ނަމަވެސް މިދެވޭ ތައުލީމުގެ ފެންވަރާއި މެދު ސުވާލުތައް އެބަހުއްޓެވެ. އަދި އެދޭ ތައުލީމުން ދަރިވަރުންނަށް އުނގެނި ދަސްވާ މިންވަރާއި މެދު ސުވާލު އުފެދޭ ކަންކަން އެބަހުއްޓެވެ. ދަރިވަރުންނަށް ކިޔަވަން ވަގުތު ލިބޭ މިންވަރާއި، ކިޔެވުމަށް ބޭނުންވާ ޖާގަ އާއި ހިމޭންކަން ލިބެނީ ކޮން މިންވަރަކަށް ތޯ މިއީ ވެސް އުފެދޭ ސުވާލެކެވެ.

advertisement

ޑިގްރީ ހަދަން ބޭނުންވާ ދަރިވަރުންގެ ކޯސް ފީ ދައުލަތުން ދިން ނަމަވެސް، ގިނަ ދަރިވަރުންނަކީ ފުލްޓައިމް ވަޒީފާ އަދާކުރާ މީހުންނެވެ. އާއިލާ އެއް ބަލަހައްޓަމުން ދާ މީހުންނެވެ. އެހެން ކަމުން، މާލޭގެ ހާސްކަމާއި ފިކުރު ބޮޑު މާހައުލުގައި ކިޔެވުމަށް ހުސްވެ ތިބެވޭކަށް ނޯވެއެވެ. ދެން އޮންނަ ގޮތަކީ އެހެން މީހަކަށް ފައިސާ ދީގެން އެސައިންމެންޓުތައް ހެދުވުމެވެ.

ހަޔާ އެޑިއުކެޝަން މިނިސްޓްރީ އާއި މޯލްޑިވްސް ކޮލިފިކޭޝަން އޮތޯރިޓީ އިން މިހާރު ވަނީ މިގޮތަށް ފައިސާ އަށް އެސައިންމަންޓު ހަދައިދޭ ފަރާތްތަކާއި މެދު ފިޔަވަޅު އަޅަން ނިންމާފައެވެ. މިކަމާއި މެދު ފިޔަވަޅު އެޅުމަށް ބޭނުންވާ ގާނޫނީ ބާރު މިނިސްޓްރީ އަށް ލިބުމުން މިކަން ހައްލުވާނެ ކަމަށް ހަޔާ އެޑިއުކޭޝަން މިނިސްޓްރީ އިން ދެކެއެވެ. އެހެން ކަމުން، ސަރުކާރުން ވަނީ އެކަޑެމިކް ޕްލެޖެރިޒަމް އަކީ ގާނޫނީ ކުށަކަށް ހެދުމަށް މަޖިލިހަށް ގާނޫނެއް ހުށަހަޅާފައެވެ.

އެސައިންމަންޓް ގަނެ ވިއްކުމަކީ ކުށެއް، މިކަން ދަރިވަރުން ކުރަނީ ކީއްވެ؟

ދަރިވަރުން އެސައިންމެންޓު ގަންނަ ސަބަބުތައް ގިނައެވެ. އާއިލީ ޒިންމާތައް ނަގަމުން، ކާރޫބާރޫ ބޮޑު މާލޭގެ ހާސްކަމު ތެރޭގައި ދިރިއުޅޭ ފުލްޓައިމް މަސައްކަތްތެރިއަކަށް ފުލް ޓައިމް ސްޓޫޑެންޓެއްގެ ޒިންމާ ނެގުމަކީ ކުޅަދާނަ ކަމަކަށް ވާނެ ބާއެވެ؟

ކްލާހަށް ތައްޔާރުވުމަށްޓަކައި ވަގުތު ނުލިބުމާއި، ގޭގައި ކިޔަވަން ވަގުތާއި ޖާގަ ނުލިބުމަކީ އެންމެ ބޮޑު އެއް މައްސަލައެވެ. މިއީ ނިޒާމީ މައްސަލައެކެވެ. މިއީ މީހުންގެ ދިރިއުޅުން ރޭވިފައިވާ ގޮތުގެ ސަބަބުން ނިކުންނަ މައްސަލަތަކެވެ.

ކޮންމެ ހާލެއްގައި އުޅުނު ނަމަވެސް، ދިރިއުޅުމުގެ އެންމެ މުހިންމު ކަމަކީ ވަޒީފާއަދާ ކުރުމާއި، ވަޒީފާ އާއި މުސާރައިގެ ކުރިއެރުން ހޯދުން ކަމަށް ގަބޫލުކުރެވިފައި އޮންނަ އޮތުމުގެ ސަބަބުން، އަދި އެކަމާއި ނުލައި ތިމާގެ ދިރިއުޅުމުގެ ފެންވަރު ރަނގަޅު ކުރެވޭނެ އެހެން ގޮތެއް ނެތަތީވެ، ކޮންމެ މީހަކަށް ވެސް ޑިގްރީ އެއް ނުވަތަ މާސްޓާސް ސެޓްފިކެޓެއް ވަރަށް މުހިންމެވެ.

އެސައިންމަންޓް ގަނެ ވިއްކުމަކީ ހުއްޓުވޭނެ ކަމެއް ނޫން

ސެޓްފިކެޓުގެ ފެންވަރު ބަލައި އެކްރެޑިޓް ކުރާ އިދާރާ އަކަށް އެ ސެޓިފިކެޓަކީ ކޮން މިންވަރަކަށް ކިޔަވައިގެން ހޯދި ސެޓްފިކެޓެއްތޯ ކަށަވަރު ނުކުރެވޭނެއެވެ. އަދި އެސައިންމެންޓު ހެދީ އަމިއްލައަށް ތޯ ބެލޭނެ ގޮތެއް ނޯންނާނެއެވެ. މިއީ ގާނޫނަކުން ބަދަލު ކުރެވޭނެ ކަމެއް ނޫނެވެ. މިފަދަ ކަންކަން ހުއްޓުވުމަށްޓަކައި ހަދާފައިވާ ގާނޫނުތަކުން މިހާތަނަށް އެއްވެސް ނަތީޖާއެއް ފެނިފައި ނެތެވެ.

ކަޅު ބާޒާރުގައި ޑޮލަރު ގަނެ ވިއްކުމަކީ ވެސް ގާނޫނަކުން މަނާކޮށްފައިވާ ކަމެކެވެ. އާއްމު ތަންތަނުގައި ދުންފަތުގެ އިސްތިއުމާލު ކުރުމަކީ ވެސް މަނާ ކަމެކެވެ. ނަމަވެސް، މިއިން އެއްވެސް ކަމެއް ހުއްޓުވިފައެއް ނެތެވެ. ސަބަބަކީ މައްސަލައިގެ މުގުލުގައި ހުރި ސަބަބުތައް ނައްތާނުލެވޭތީ އެވެ.

ރާއްޖޭގެ ކޮލެޖުތަކުގެ ފެންވަރާމެދުވެސް ސުވާލު އުފެދޭ

ރާއްޖޭގެ ކޮލެޖުތަކުން ހެދެން ހުރި ކޯސްތަކުގެ ފެންވަރާ މެދު ވެސް ސުވާލު އުފެދެއެވެ. ކޮލެޖުތަކުގައި ކިޔަވައިދޭ ލެކްޗަރާއިންގެ ފެންވަރާއި، އެކަމަށް އެ މީހުން އެކަށިގެންވާ ވަގުތު ނުދޭ ވާހަކަ އަކީ ވެސް ދަރިވަރުންގެ ޝަކުވާއެކެވެ. އެކި ކްލިނިކުތަކާއި ހޮސްޕިޓަލުތަކުގައި ގިނަ ބަލިމީހުން ބަލާ ޑޮކްޓަރުން ގިނަވެ، ދެވޭ ސިއްހީ ފަރުވާގެ ފެންވަރު ދަށްވާ ފަދައިން، ދުވާލަކު އެތަކެއް ދަރިވަރުންނަށް ކިޔަވައިދޭން ޖެހުމުން ލެކްޗަރާއިންގެ އައުޓްޕުޓްގެ ފެންވަރު ދަށްވެއެވެ.

ލެކްޗަރާއިންގެ ތެރޭގައި ވެސް، ވީހާވެސް ބުރަކޮށް މަސައްކަތްކޮށްގެން ގިނަ އާމްދަނީ ހޯދަން މަސައްކަތް ކުރާ މީހުން ގިނައެވެ. ދިރިއުޅުމުގެ ފެންވަރު ރަނގަޅު ކުރަން އެދޭ ނަމަ އެމީހަކަށް އޮތީ އެމީހަކަށް ކުރެވޭ މަސައްކަތެއް، މީހާ ހުސްވެ އަވަދި ވަންދެން ކުރުމެވެ.

އެސައިންމަންޓު ގަނެވިއްކުމަކީ ގާނޫނީ ކުށެއްކަމަށް ކަނޑައަޅައިގެން، ދަރިވަރުން އަމިއްލައަށް އެސައިންމަންޓު ހަދަން ފަށާނެކަމަށް ހީވުމަކީ މޮޔަކަމެކެވެ. މިއީ ކަންބޮޑުވާން ޖެހޭ ކަމެކެވެ. ކިތަންމެ ރަނގަޅު ކޯހެއް ނަމަވެސް، ދަރިވަރުން ކިޔަވަނީ އަވަދިނެތި ދަތި ހާލުގައި ކަމުގައި ވާނަމަ ކޯސް ހިންގުމުގެ ފައިދާ ލިބޭނީ ހަމަ އެކަނި ކޯސް ހިންގާ ކޮލެޖަށެވެ.

އުނގެނުމަކާއި ނުލައި ސަނަދުތައް ހިފައިގެން ތިބޭ ޒުވާނުން ގިނަވެއްޖެ ނަމަ އެއީ އެކަމުން އެތަކެއް އެހެން މައްސަލަތައް ނިކުންނާނެ ކަމެކެވެ. ނަމަވެސް ގޭގައި ނެތް ޖާގައެއްގައި ހުރެ ނުކިޔެވޭނެއެވެ. ނެތް ހިމޭން ކަމެއް ނުހޯދޭނެއެވެ. ނެތް ވަގުތެއް ނުލިބޭނެއެވެ. ވީމާ، ދަރިވަރުންނަށް ލިބޭ ތައުލީމުގެ ރާހަތު އެކުދިންގެ ބުއްދި އަށާއި ހަޔާތައް ކުރާނީ ތައުލީމު އުނގެނުމަށްޓަކައި ހޭދަކުރަންޖެހޭ ވަގުތާއި ތަނަވަސް ޖާގަ އެކުދިންނަށް ލިއްބައިދީގެންނެވެ. މިކަން ބަދަލު ނުވާހާ ހިނދަކު އެސައިންމަންޓު ގަނެވިއްކުން ނުހުއްޓުވޭނެއެވެ. ބަދަލުވާން ޖެހެނީ މުޅި ނިޒާމެވެ.