ތާޑްހޭންޑް ސްމޯކިންގ ގެ ނުރައްކާ ހީނުކުރާ ވަރަށްވުރެ ބޮޑު

ތާރޑްހޭންޑް ސްމޯކްއަކީ ގޭގައި ސިނގިރޭޓުގެ ދުން ނުވަތަ ސިނގިރޭޓުގެ އެކިއެކި މާއްދާތައް ހަރުލާފައި ހުރުމެވެ. އެގޮތުން ތަޅުންމައްޗާއި، ފާރުތަކާއި، ފަރުނީޗަރުތަކުގައިވެސް ސިނގިރޭޓުގެ އަސަރު ހުރެއެވެ. ސާފުކުރިނަމަވެސް މުޅިއަކުން ސިނގިރޭޓުގެ އަސަރު ފިލައިގެނެއް ނުދެއެވެ.

ގޭގައި ސިނގިރޭޓުބޯ މީހަކު އުޅޭނަމަ ގޭގެ މާހައުލުގައި ސިނގިރޭޓުގެ އެކިއެކި މާއްދާތައް ހަރުލާފައި ގިނަ ދުވަހު ހުރެއެވެ. އަދި މިގޮތައް މި މާއްދާތައް މަސްދުވަސް ނުވަތަ އަހަރުތަކަށްވެސް ހުންނަކަމަށް ހޯދުންތަކުން ދައްކައެވެ. މިކަމާއި ގުޅޭގޮތުން ޔޫއެސް ޑިޕާޓްމަންޓް އޮފް އެނަރޖީ ލޯރެންސް ބާރކްލީ ނޭޝަނަލް ލެބޯރޭޓަރީއިން ވަނީ ދިރާސާއެއްކޮށްފައެވެ. މި ދިރާސާއިން ދައްކާގޮތުގައި ސިނގިރޭޓު ނުބޯމީހުންނަށްވެސް ތާރޑްހޭންޑް ސްމޯކްގެ ސަބަބުން ގެއްލުން ލިބެއެވެ.

advertisement

ތާރޑް ހޭންޑް ސްމޯކްގެ ސަބަބުން މީހާއަށް ކެންސަރު ޖެހުމާއި، މި ވިހަ މާއްސާތައް ނޭވާލާ ނިޒާމުން ނުވަތަ ހަންގަނޑުން ގޮސް އިތުރު ބަލިތައް ޖެހުމަށްވެސް މަގުފަހިވެއެވެ.

ތާރޑްހޭންޑް ސްމޯކްއިން ސަލާމަތް ވުމަށް ކުރެވިދާނެ ކަންތައްތައްވެސް އެބަހުއްޓެވެ. އެގޮތުން ކުޑަދޮރުތައް ހުޅުވައި ތާޒާވައި ލިބޭގޮތައް އަބަދުވެސް ބެހެއްޓުމަކީ ވަރަށް މުހިންމު ކަމެކެވެ. އަދި އަބަދުވެސް ތަންތަން ސާފުކުރުމަކީ ކުރެވޭނެ އެންމެ މުހިންމު ކަމެވެ. އަދި އެޗްއީޕީއޭ ފިލްޓަރއިން ގިނަގިނައިން ގޭތެރެ ވެކިއުމް ކުރުމަކީ ވަރަށް މުހިންމު ކަމެކެވެ. މިގޮތައް އަމަލުކުރުމުން ތާރޑްހޭންޑް ސްމޯކްއިން މުޅިން ރައްކާތެރި ނުވިނަމަވެސް ކޮންމެވެސް ވަރެއްގެ ހައްލެއް ލިބޭނެއެވެ.

އީސިނގިރޭޓުންވެސް ކޮންމެވެސް ވަރަކަށް ތާރޑްހޭންޑް ސްމޯކް މާހައުލަށް ބޭރުވެއެވެ. ނަމަވެސް އާންމު ސިނގިރޭޓާއި އަޅާބަލާއިރު ތާރޑްހޭންޑް ސްމޯކް ބޭރުވާ މިންވަރު ދަށެވެ. ސަބަބަކީ އީ ސިނގިރޭޓުގައި މިފަދަ ސްމޯކް ބޭރުވަނީ ހަމައެކަނި ދުން ބޭރުކުރުމުންނެވެ. ނަމަވެސް ސިނގިރޭޓުގައި ދުން ބޭރުކުރިއަސް ނުކުރިއަސް މިފަދަ ސްމޯކް ބޭރުވެއެވެ.