ތާރީހުގެ ތެރެއިން: ކުރީގެ ރައީސް މައުމޫން ދިރިއުޅުނު ތީމުގެ ދިވެހިންނަށް ދައްކާލުން

ތީމުގެ އަކީ ކުރީގެ ރިޔާސީ ގަނޑުވަރެވެ. އެ އިމާރާތް މިހާރު ހުރި ގޮތަށް ބަދަލުގެނެސް އަލުން އިމާރާތް ކޮށްފައިވަނީ ރައީސުލްޖުމުހޫރިއްޔާ މައުމޫނު އަބްދުލްގައްޔޫމުގެ ވެރިކަމުގައި 1994 ވަނަ އަހަރުގައެވެ.

އެމަސައްކަތް އޭރު މައުމޫނު ހަވާލުކުރީ އަލްމަރްހޫމް އަލީ އުމަރު މަނިކު (ކޮލި އަލި މަނިކު) އާއިއެވެ.

advertisement

ތީމުގެއަށް އާއްމުންނަށް އެންމެ ފުރަތަމަ ވަނުމުގެ ފުރުސަތު ލިބުނީ އިބްރާހިމް ނާސިރުގެ މޫނު ދެއްކުން އެގޭގައި ހަމަޖެއްސުމާއި އެކު އެދުވަހުއެވެ. އެއީ 2008 ވަނަ އަހަރުގެ ނޮވެމްބަރު މަހުގައެވެ. އޭގެ ފަހުން، 2009 ވަނަ އަހަރުގެ އެޕްރީލް މަހު، އޭރުގެ ރައީސް މުހައްމަދު ނަޝީދު ވަނީ އެގެ އާއްމުންނަށް ދެއްކުމަށްޓަކައި ހުޅުވާލާފައެވެ.

އެދުވަހު އާއްމުންގެ ގިނަ ބަޔަކު އެގެ ބެލުމަށްޓަކައި އެގެއަށް ގޮސްފައިވެއެވެ. މިހާރު ތީމުގޭގައި ހިންގަނީ ދިވެހިރާއްޖޭގެ ސުޕްރީމް ކޯޓެވެ.

އަލި މަނިކުގެ ލިޔުއްވާފައިވާ ފޮތެއް ކަމުގައިވާ “އަޅުގަނޑުގެ ދުވަހު ފޮތް” ގައި ތީމުގެއަށް ދިޔަ ޙަރަދު ކަމުގައި ބަޔާންކޮށްފައި ވަނީ 12 މިލިއަން ޑޮލަރެވެ. އެއީ މިހާރު އަގު ކުރާނަމަ 22 މިލިއަން ޑޮލަރެވެ. ގާތް ގަނޑަކަށް 339 މިލިއަން ރުފިޔާއެވެ. އޭރު ދިވެހިރާއްޖޭގައި ބޮލަކަށް ޖެހޭ އާމްދަނީ އަކީ ގާތްގަނޑަކަށް 1200 ޑޮލަރެވެ.

ފަތްތޫރައިގެ 234 ވަނަ ޢަދަދު ގައި އަލްފާޟިލް އިސްމާޢީލް ވަޙީދު ލިޔުއްވާފައިވާ ގޮތުގައި ތީމުގެ އަކީ ކުރީ ޒަމާނުގައި ޙުސައިން މާފަތް ތަކުރުފާނު (1837 މ. ން 1910 މ. ށް) ގެ ގެއެކެވެ.

ޙުސައިން މާފަތް ތަކުރުފާނަކީ، ދިއްފުށީ ޙުސައިން ހަނދޭގިރި ތަކުރުފާނުގެ، މާކޮށާރު ޢަލީ މަނިކުގެ، މާކޮށާރު އިބްރާހީމް މަނިކުގެ ޙުސައިން މަނިކެވެ. ފަހުން އަލްވަޒީރު ޙުސައިން މާފަތްތަކުރުފާނެވެ.

ކުރީގެ ރައީސް ދިރިއުޅުއްވާ ގެކޮޅު، ތީމުގެއަކީ މިހާރުގެ ސުޕްރީމް ކޯޓެވެ.