އަމީނީ މަގު ތަރައްޤީކުރުމުގެ މަސައްކަތުގެ ދަށުން ހެންވޭރުން ބައެއް ބަންދުކޮށްފި

އަމީނީ މަގު ތަރައްޤީކުރުމުގެ މަސައްކަތަށް، އެމަގުގެ ހެންވޭރާވީ ސަރަޙައްދުން ބައެއް ބަންދުކޮށް މަގުގެ މަސައްކަތް ފަށައިފއެވެ.

އަމީނީ މަގުގައި ތާރު އަޅައިގެން ތަރައްޤީކުރުމުގެ މަސައްކަތް ކުރިއަށްގެންދާނީ އެ މަގު 13 ބަޔަށް ބަހާލައިގެންނެވެ.

advertisement

މާލޭގެ އަމީނީ މަގު ތަރައްޤީކުރުމުގެ ޢަމަލީ މަސައްކަތް ހަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އާއެވެ.

މި މަޝްރޫޢު ރަސްމީކޮށް އިފްތިތާޙުކޮށްފައިވަނީ ނިމުނު އޮގަސްޓްމަހުގެ 30ވަނަ ދުވަހުއެވެ.

މަގުގެ ސެގްމަންޓް 1ގެ ޢަމަލީ މަސައްކަތް ފެށުމަށް އިއްޔެ މަގުގެ ބައެއްވަނީ ބަންދުކޮށްފައެވެ.

ސެގްމަންޓް 1ގައި ހިނެނީ އަމީނީމަގުން ހެންވޭރުން ބައެކެވެ.

މި މަސައްކަތަށް ފުރަތަމަ ބަންދުކުރާނީ ބޮޑުތަކުރުފާނު މަގު އަމީނީ މަގާ ގުޅޭ ހިސާބުން ފެށިގެން، ބޮޑުތަކުރުފާނު މަގާއި އިރުދޭމާ ހިނގުން ގުޅޭ ހިސާބަށެވެ.

އެއީ ގާތްގަނަޑަކަށް 100މީޓަރުގެ ސަރަޙައްދެކެވެ. މަގުގެ މަސައްކަތް ކުރިއަށްގެންދާނީ މުޅި އެ ސަރަޙައްދު ބަންދުކޮށްގެންނެވެ.

އެންމެ ފުރަތަމަ ކުރިއަށްދާނީ މަގުގެ ގާތަށް ނެގުމުގެ މަސައްކަތެވެ.

މުޅި މިމަޝްރޫޢުގައި 1.79 ކިލޯމީޓަރުގެ މަގު ހިމެނެއެވެ.

މަގު ހަދާއިރު ކޭބަލް ޖަންކްޝަންތައް ހެދުމާއި، އެކަށީގެންވާ ފެންހިންދާ ނިޒާމު ޤާއިމުކުރުމާއި ތާރު އެޅުން ހިމެނެއެވެ.

އާރްޑީސީއާ މަސައްކަތް ހަވާލުކޮށްފައިވަނީ 7 މަސް ދުވަހުން ނިންމާ ގޮތަށެވެ.