ގޭތެރޭ މަސައްކަތް: އަންހެނުން އަދާ ކުރާ މުސާރަ ނުލިބޭ ވަޒީފާ

މީގެ އަަހަރުތަކެއް ކުރިއާއި އަޅާބަލާއިރު ގޭތެރޭގެ މަސައްކަތްތަކަކީ ހަމައެކަނި އަންހެނުންނަށް ޙާއްސަ ކުރެވިފައިވާ މަސައްކަތެއްކަމަށް ދެކެވުނެވެ. އެހެންނަމަވެސް މިހާރު މިކަން ކޮންމެވެސް ވަރަކަށް ވަނީ ބަދަލުވެފައެވެ. އެގޮތުން ގޭތެރޭގެ މަސައްކަތްތަކުގައި ކޮންމެވެސް ވަރަކަށް ފިރެހެނުންވެސް އަންނަނީ ހަރަކާތްތެރިވަމުންނެވެ.

ނަމަވެސް އަދިވެސް ގޭތެރޭގެ މަސައްކަތްތަކުގައި ގިނައިން މަސައްކަތް ކުރަނީ އަންހެނުންނެވެ. މިއީ އަންހެނުން އަދާކުރާ މުސާރަ ނުލިބޭ ވަޒީފާއެވެ.

advertisement

2021 ވަނަ އަހަރު ޔޫއެސް ބިއުރޯ އޮފް ސްޓެޓިސްޓިކްއިން މިކަމާއި ގުޅޭގޮތުން ވަނީ ދިރާސާއެއް ކޮށްފައެވެ. މި ދިރާސާގައި ބުނެފައިވަނީ ކައިވެނިކޮށްގެން އުޅޭ މީހުންގެ ތެރެއިން %46.8 ކައިވެނީގައި އަނބިމީހާ އަދި ފިރިމީހާވެސް ވަޒީފާއަށްދާކަމަށެވެ. އަދި މީގެތެރެއިން %59 ފަހަރު ގޭތެރޭގެ މަސައްކަތްތައް ފިރެހެނުންނަށްވުރެ ގިނައިން ކުރަނީ އަންހެނުންކަމަށެވެ.

އެހެން ދިރާސާއެއްގައި ބުނެފައިވަނީ 1970 ގެ އަހަރުތަކާއި އަޅާބަލާއިރު ގޭތެރޭގެ މަސައްކަތްތައް ފިރެހެނުން ކުރާ ނިސްބަތް މިހާރު 2 ގުނަ އިތުރުވެފައިވާކަމަށެވެ. އެގޮތުން 1976 ވަނަ އަހަރު ފިރެހެނުން ގޭތެރޭގެ މަސައްކަތުގައި އެވްރެޖްކޮށް ހަފްތާއެއްގެ ތެރޭގައި ހޭދަކުރަނީ 6 ގަޑިއިރެވެ. ނަމަވެސް 2005 ވަނަ އަހަރު ގޭތެރޭގެ މަސައްކަތްތަކުގައި ފިރެހެނުން އެވްރެޖްކޮށް ހަފްތާއެއްގެ ތެރޭގައި 12.5 ގަޑިއިރު ހޭދަކުރެއެވެ.

އޭރުވެސް މިހާރުވެސް ގޭތެރޭގެ މަސައްކަތްތަކުގައި އަންހެނުން ހޭދަކުރާ ވަގުތު އިތުރުކަމަށް މި ދިރާސާއިން ދައްކައެވެ. އެގޮތުން 1976 ވަނަ އަހަރު އަންހެނުން ގޭތެރޭގެ މަސައްކަތުގައި ހަފްތާއެއްގެ ތެރޭގައި 26 ގަޑިއިރު ހޭދަކުރާކަމަށް ވަނީ ދައްކާފައެވެ. އަދި 2005 ވަނަ އަހަރު މިއަދަދު އުޅެނީ ހަފްތާއެއްގެ މައްޗަށް 16.5 ގަޑިއިރުގައެވެ.

އެމެރިކާގައި މި ދިރާސާ ކުރި ނަމަވެސް ރާއްޖޭގެ ހާލަތަކީވެސް ހަމަ މިގޮތެވެ.

ވަޒީފާއަށް ދިއުމާއި ގޭތެރޭގެ މަސައްކަތްތަކުގައި ގިނަވަގުތު ހޭދަކުރަން ޖެހުމުގެ ސަބަބުން އަންހެނުންގެ ނަފްސާނީ ދުޅަހެޔޮކަމަށް އޭގެސަބަބުން އަސަރުކުރެއެވެ. މިކަމާއި ގުޅޭގޮތުން އިތުރަށް ޔުނިވަރސިޓީ އޮފް މެލްބަރންއިން ވަނީ ދިރާސާކޮށްފައެވެ. މި ދިރާސާގައި ބުނެފައިވަނީ ވަޒީފާއަށްދާ އަންހެނުން ގޭތެރޭގެ މަސައްކަތްތަކުގައި ގިނަ ވަގުތު ހޭދަކުރުމުގެ ސަބަބުން ނަފްސާނީ ދުޅަހެޔޮކަމަށް އަސަރުކުރާކަމަށެވެ. ނަމަވެސް ފިރެހެނުންނަށް މިކަން ދިމާނުވާކަމަށް ވަނީ ބުނެފައެވެ.

މި ދިރާސާކުރުމަށް 19 ދިރާސާއެއް ވަނީ ކޮށްފައެވެ. މި ދިރާސާތަކުގައި މުޅިޖުމްލަ 70،310 މީހުން ވަނީ ބައިވެރިކޮށްފައެވެ. އެގޮތުން ހޯދުމުން ދައްކާގޮތުގައި މީގެ ސަބަބުން އަންހެނުންނަށް ޑިޕްރެޝަންއާއި ސައިކޮލޮޖިކަލް ޑިސްޓްރެސް ދިމާވާކަމަށެވެ.