ރިޕޯޓު: ރެޒިޑެންޝަލް ސަރަހައްދެއްގައި އިންޑަސްޓްރިއަލް މަސައްކަތް ކުރުން — ހެޔޮވާ ވަރުގެ ކަމެއް ނޫން

އިރުމަތީ ފަރާތުން ހަދަމުންދާ ތިލަމާލެ ބްރިޖްގެ ޕުލެޓުފޯމެއް އެ ރަށުގެ ފަރުގައި ގިނަ ދުވަސްތަކެއްވަންދެން ތެޅުމަށް ފަހު މިހާރު ނެގިތާ ހަފްތާ އެއް ވަނީއެވެ. އެ ޕްލެޓްފޯމް ބިންދައިގެން ދިޔުމާއެކު ގިނަ މީހުން ސޯޝަލް މީޑިއާގައިވެސް ދިޔައީ އެ ޕްލެޓްފޯމް ނަގައި، އެ ތަނަށް ލިބިފައިވާ ގެއްލުން އަންދާޒާކުރުމަށް އެސެސްމަންޓް ހެދުމަށް ސަރުކާރަށް ޕްރެޝަރު ކުރަމުންނެވެ.

މިއީ ދާދި ފަހުން ދިމާވި ކަމެއް ނަމަވެސް، މި ހާދިސާއަކީ ވިލިމާލެއަށް ދިމާވި ހަމައެކަނި ތިމާވެށީގެ ކާރިސާއެއް ނޫނެވެ.

advertisement

މާލޭ ސަރަހައްދުގައި އަޅާ ދެވަނަ ބްރިޖުގެ މަސައްކަތް ހިނގަމުންދާތީވެ، ވިލިނގިލީ މޫދަށް އެރޭ ސަރަހައްދުގައި ދޯނި އެހެލާ ދޯނިފަހަރު މަރާމާތުކުރުމާއި ފައިބަރުގެ މަސައްކަތްތައް ކުރަމުންދިއުމާއި ގުޅިގެން އާއްމުންނާއި އެކި ޖަމިއްޔާ ޖަމާއަތްތަކުންވެސް އަންނަނީ ކަންބޮޑުވުން ފާޅުކުރަމުންނެވެ.

މިކަން ސިޓީ ކައުންސިލްގެ ސަމާލުކަމަށްވެސް އެއިރު ވަނީ ގެނެސްފައެވެ. ސިޓީ ކައުންސިލުން މިއަހަރުގެ ޖޫން މަހު ބުނެފައިވަނީ އެ ސަރަހައްދުގައި ފައިބަރ މަސައްކަތްކުރަމުންދިޔަ ފަރާތްތަކަށް ޖުލައި މަސް ނިމުމުގެ ކުރިން އެ ސަރަހައްދު ހުސްކުރަން އަންގާފައިވާކަމަށެވެ. ނަމަވެސް ޖުލައި ، އޮގަސްޓް ނިމިގެންގޮސް ސެޕްޓެމްބަރު މަސް ދެބައިވީ އިރުވެސް އަދިވެސް އެތަނުގައި ކުރަމުން އަންނަ މަސައްކަތްތައް ބަރާބަރަށް ކުރިއަށް ދެއެވެ. އެއްވެސް ފަރާތަކުން އެތަން ހުސްކޮށްފައެއް ނުވެއެވެ. 

ސޭވް ދަބީޗު މިކަން ކުރަނީ އެންމެންގެ ސިއްޙީ ރައްކަލަކަށް! 

މިނިސްޓްރީ އޮފް ހައުސިންގް އެންޑް އިންފްރާސްޓްރަކްޗަރުގެ ‘ލޭންޑް ޔޫޒް ޕްލޭން’ ރެގިޔުލޭޝަންގައިވާ ގޮތުގެ މަތިން ފައިބަރްގްލާސް މަސައްކަތް ކުރުމުގެ ހުއްދަ ދެވޭނީ ބަންދުކުރެވިފާ ހުރި، ރަނގަޅަށް ވެންޓިލޭޓް ކުރެވިފައިވާ އަދި މީހުންދިރިއުޅޭ ނުވަތަ އެއްވެ އުޅޭ ސަރަހައްދުތަކާއި މަދުވެގެން 350 ފޫޓު ދުރުގައިވާ ތަންތަނުގައެވެ.

ނަމަވެސް މިބޯޓްޔާޑުގައި މަސައްކަތްކުރަމުން އަންނަނީ އާއްމުންނާއި ހަމައަށް، ބޭރަށް ފައިބަރު ކުނޑި ބުރާ ގޮތަށެވެ. އަދި ރަނގަޅުގޮތުގައި ކުނި މެނޭޖުކުރުމާއި ނުރައްކާތެރި މެޓީރިއަލްތައް ނައްތާލުމުގެ އެއްވެސް އުސޫލެއް ނެތިއެވެ.

ފައިބަރަކީ އޭގެ ކުނޑީގެ ސަބަބުން އިންސާނުންގެ ނޭވާލުމުގެ ނިޒާމަށް ނޭދެވޭ އަސަރުކޮށް، ނޭވާލުމުގެ ނިޒާމުގައި މައްސަލަ ހުންނަ މީހުންގެ ހާލު އިތުރަށް ސީރިޔަސްވެ އަދި ފުރާނައަށް ނުރައްކާވާފަދަ ހާލަތްތައް ކުރިމަތިކުރުވާ ނުރައްކާތެރި އެއްޗެކެވެ. ބޯޓުޔާޑުތަކުގައި ބޭނުންކުރެވޭ ރެޒިންގެ ވިހަގަދަ އާވިތައް ހަށިގަނޑަށް އެތެރެވެއްޖެނަމަ ނޭވާލުމުގެ ނިޒާމަށް އަދި ހަޖަމުކުރުމުގެ ނިޒާމަށް އަސަރުކޮށް، މޭނުބައިކޮށް، ހޮޑުލަވާ، ވަރުބަލިވުންފަދަ ކަންކަން ދިމާވެ، އަޑުއިވުމާއި ނާރުތަކުގެ ބަލިތަށް ހުންނަ މީހުންގެ ހާލަތު އިތުރަށް ގޯސްވުމަށް މަގުފަހިވެއެވެ.

ނޭވާލުމުގެ ނިޒާމަށް ބޮޑެތި އަސަރުތަކެއް ކުރުމަތިކުރުވާ ކޮވިޑްގެ ބަލިމަޑުކަމުން އަރައިނުގަނެވި އުޅޭ މި ދަނޑިވަޅުގައި އާންމު ރައްޔިތުން މިފަދަ ގެއްލުންތަކަށް ހުށަހެޅޭގޮތަށް ބޯޓްޔާޑު އަޅަން ނިންމުމަކީ ބަލައިގަނެވޭނެ ކަމެއް ނޫންކަމަށް ސޭވްމޯލްޑިވްސް އިން އަންނަނީ ބުނަމުންނެވެ. ​​​​​​​

“ކޮންމެ ދުވަހަކީވެސް އެތަނަށް ގެއްލުންވާ ދުވަސް”

މިހާރުވެސް ވިލިނގިލީ ބީޗް ސަރަހައްދުގައި 25 ވަރަކަށް ފަރާތުން ފައިބަރ މަސައްކަތް ކުރަމުންދާކަމަށް ސޭވް ދަ ބީޗްއިން ބުނެއެވެ. ބޯޓު ބަނުމާއި، ފައިބަރގެ މަސައްކަތްތަކާއި، ޑޮކިންގ ގެ މަސައްކަތްތައް ބަދަލުކޮށްފައިވާކަމަށެވެ. އެރަށުގައި ދިރިއުޅޭ މީހުންނާއި މާލެއިން ދާ މީހުންވެސް ބާބަކިއު ހެދުމަށް ތިބޭ ބީޗް ސަރަހައްދު މިހާރު ބޭނުންކުރަމުންދަނީ ބޯޓު ޔާޑެއްގެ ގޮތުގައެވެ. މުޅި ސަރަހައްދުވަނީ ފައިބަރު ކުނޑިން ތަގައްޔަރުވެފައެވެ.

ތިމާވެށީގެ  ގާނޫނުތަކަށް އަމަލެއް ނުކުރޭ. ކަންކުރަނީ މަދު ބައެއްގެ ފައިދާއަށް

ވިލިމާލޭގައި މި މަސައްކަތްތައް ކުރަމުން އަންނަ ފަރާތުން އެކަން ކުރަމުން އަންނަނީ ގާނޫނާއި ގަވާއިދުން ބޭރުންނެވެ. ބޯޓުޔާޑު އެޅުމަށްޓަކައި ގާނޫނީ ގޮތުން ކުރަންޖެހޭ ކަންކަން އެފަރާތުން ފުރިހަމަ ކޮށްފައި ނުވާ ކަން ސޭވް ދަ ބީޗް ޖަމިއްޔާއިން ވެސް ފާހަގަ ކުރެއެވެ. އެގޮތުން، މި ބޯޓުޔާޑު ހެދުމަށްޓަކައި ވިލިމާލޭގެ އިރުމަތީ ހޭޅިފަށުން ރުއްގަސް ނަގާފައިވަނީ ޤާނޫނީ ގޮތުން ހަދަންޖެހޭ އެންވަޔަރަމެންޓަލް އިމްޕެކްޓް އެސެސްމެންޓް (އީ.އައި.އޭ) ނުހަދައެވެ.

އަދި އަތިރިމަތިން ރުއްގަސް ނެގުމުން ވިލިމާލޭގެ އިރުމަތީ ފަރާތުން މިހާރުވެސް ފެންނަމުންދާ ރަށްގިރުމުގެ މައްސަލަ ގޯސްވެގެންދާނެ ކަމަށް ދިރާސާތަކުން ކަށަވަރު ކޮށްދެއެވެ. ކޮންމެ ރަށެއްގެ އަތިރިމަތީގައި 15 މީޓަރގެ ‘ބަފަރް ޒޯން’ އެއް  ހުންނަންޖެހޭނެކަމަށް ‘އަޕްރޫޓިން ޕާމް އެންޑް ޓްރީސް ރެގިޔުލޭޝަން’ ގައި ވަނީ ކަނޑައަޅާފައިވެއެވެ. މިއިން އެއްވެސް ކަމެއް އެފަރާތުން ފުރިހަމަ ކޮށްފައި ނުވެއެވެ. 

އަދި ތިމާވެށްޓާ ގުޅިގެން މޫސުމަށް އަންނަ ބަދަލުތަކުގެ  ނޭދެވޭ އަސަރުަ މުޅިދުނިޔެއަށާއި ހާއްސަކޮށް ދިވެހި ރާއްޖެ ފަދަ ޖަޒީރާ ޤައުމުތަކަށް ކުރިމަތިވަމުންދާ، އަދި އެކަމާ ދިވެހި ސަރުކާރުން ބައިނަލްއަގުޤުވާމީ ސްޓޭޖުތަކުގައި އަޑުއުފުލާ ބޮޑުތި ޤައުައުމުތަށް އިތުރަށް ހޭލުންތެރިވެ ހަރަކާތްތެރިވުމަށް ގޮވާލަމުން އަންނަ ދަނޑިވަޅެއްގައި މިފަދަ ނިންމުމެއް ނިންމުމުން ފެންނަނީ ކަމާބެހޭ ފަރާތްތައް  ދުރުރާސްތާ ޕްލޭންކުރުމަށް ނުކުޅެދިފައިވާ މިންވަރުކަމަށް ސޭވްދަ ބީޗް ޖަމްއިއްޔާއިން ދެކެއެވެ.