ސާބާގެ އަންހެން ބާސްކެޓް ބޯޅަ މުބާރާތް 2022ގެ ފެށުމުގެ ރަސްމިއްޔާތު ރައީސުލްޖުމްހޫރިއްޔާގެ ދެކަނބަލުން ޝަރަފުވެރިކޮށްދެއްވައިފި

ސައުތު އޭޝިއަން ބާސްކެޓްބޯލް އެސޯސިއޭޝަން (ސާބާ)ގެ އަންހެން ބާސްކެޓް ބޯޅަ މުބާރާތް 2022ގެ ފެށުމުގެ ރަސްމިއްޔާތު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ޝަރަފުވެރި ކޮށްދެއްވައިފިއެވެ.

ސާބާގެ އަންހެން ބާސްކެޓް ބޯޅަ މުބާރާތް 2022 ކުރިޔަށްދަނީ މި ސެޕްޓެންބަރު މަހުގެ 25 – 30 އަށް ސޯސަލްސެންޓަރުގައެވެ. މި މުބާރާތުގައި ރާއްޖެ ހިމެނޭހެން މި ސަރަޙައްދުގެ 4 ޓީމަކުން ބައިވެރިވެއެވެ. މިއީ ބައިނަލްއަޤްވާމީ އަންހެން ބާސްކެޓް ބޯޅަ މުބާރާތެއް ރާއްޖޭގައި ބާއްވާ ފުރަތަމަ ފަހަރެވެ.

advertisement

މި މުބާރާތް ފެށުމުގެ ގޮތުން ސޯސަލްސެންޓަރުގައި ކުޅުނު ފުރަތަމަ މެޗުގައި ދިވެހިރާއްޖޭގެ ޤައުމީ އަންހެން ބާސްކެޓް ބޯޅަ ޓީމާ ބައްދަލުކުރީ ނޭޕާލުގެ ޓީމެވެ.

މި މެޗުން ފަހުވަގުތު ރާއްޖެ މޮޅުވީ، ހަތަރު ޕޮއިންޓުގެ ލީޑަކާ އެކު 51-47 ޕޮއިންޓުންނެވެ.

ރާއްޖެއިން މިހޯދައިފާވާ މޮޅަކީ އަންހެން ބާސްކެޓްބޯޅައިގެ ތާރީހުގައި ރާއްޖެއިން ނޭޕާލް އަތުން ހޯދި ފުރަތަމަ މޮޅެވެ. 2016 ގެ ސާބާ އަންހެން މުބާރާތުގައި ނޭޕާލް އަތުން ރާއްޖެ ބަލިވި އިރު، 2019 ގެ ސާފް ގޭމްސްގައި ރާއްޖެ، ނޭޕާލް އަތުން ބަލިވީ ނުވަ ޕޮއިންޓުގެ ތަފާތުންނެވެ. އެ ދެ މުބާރާތުގައި ވެސް ރިހި މެޑަލް ހޯދި ނޭޕާލް އަތުން މިރޭ ރާއްޖެއިން ވަނީ ބަދަލު ހިފައި އަމިއްލަ ގައުމުގައި މޮޅުވެފައެވެ.

މި ރަސްމިއްޔާތުގައި ރައީސުލްޖުމްހޫރިއްޔާގެ ދެކަނބަލުންގެ އަރިހުގައި ރައީސުލްޖުމްހޫރިއްޔާގެ ނައިބު ފައިޞަލް ނަސީމް ބައިވެރިވެވަޑައިގެންނެވިއެވެ. އަދި ރައީސުލްޖުމްހޫރިއްޔާގެ ދެކަނބަލުންނާއި ނައިބުރައީސްގެ އިތުރުން ބައެއް ވަޒީރުންނާއި ކުޅިވަރުގެ ދާއިރާގެ އިސްފަރާތްތަކާއި ދިވެހި ސަޕޯޓަރުން މިރޭ ރާއްޖޭގެ ޤައުމީ އަންހެން ޓީމާއި ނޭޕާލްގެ ޓީމު ބައްދަލުކުރި މެޗް ބަލާލުމަށާއި ދިވެހިޓީމަށް ހިތްވަރުދިނުމުގެ ގޮތުން ސޯސަލްސެންޓަރުގައި ތިއްބެވެ.