“ޓުއަރިޒަމަށް 50 އަހަރު، ހދ އަށް އަންނަ އަހަރު”: ހދ ރައްޔިތުން ފަތުރުވެރިކަމުގެ އިންތިޒާރުގައި

ޓޫރިޒަމް މިނިސްޓަރު ޑރ. އަބްދުﷲ މައުސޫމް ހދ. ގެ އަތޮޅުތަކަށް ކުރައްވަވާ ދަތުރުފުޅުގައި އެ އަތޮޅުގެ ރަށެއްކަމަށްވާ ނެއްލައިދޫއިން ތަފާތު މަރުހަބާއެއް ކިޔައިފި އެވެ. އެރަށުގެ ރައްޔިތުންވަނީ ފަތުރުވެރިކަން ނެތް އެއަތޮޅުގެ ހާލަތު މަޒާޖީ ގޮތުން މިނިސްޓަރަށް ދައްކުވާފައި އެވެ.

މިނިސްޓަރާއި ޓުއަރިޒަމް މިނިސްޓްރީގެ އިސްބޭފުޅުންނަށް މަރުހަބާ ދެންނެވުމަށް ހަދާފައިވާ ބެނާގައި “ޓޫރިޒަމް ނެތް ހދ އަށް މަރުޙަބާ!!” އަދި “ޓުރިޒަމަށް 50އަހަރު، ހދ އަށް އަންނަ އަހަރު!! މީ ހދގެ ހައްގު މިންވަރުތޯ؟” ވަނީ ޖަހާފައި އެވެ.  

advertisement

“ޓްރިޕްލް އޭއަށް ބަލަދު ނާރާ ވެރިކަމެއް ބޭނުން”

 މިތަނުގައި ބަހައްޓާފައިވާ މިނީ ފްރިޖެއްގައި “ޓްރިޕްލް އޭއަށް ބަލަދު ނާރާ ވެރިކަމެއް ބޭނުން” ކަމަށް ޖަހާފައިވެ އެވެ.

ހދ. އަތޮޅުގައި މިހާރު ހިންގަމުން އަންނަނީ އެންމެ ރިސޯޓެކެވެ. އެއީ ޓްރިޕްލްއޭ އަށް ދޫކޮށްފައިވާ ހދ. ހޮނޑާފުށީގައި ހިންގަމުން އަންނަ 118 އެނދު ހިމެނޭ ހޮނޑާފުށި އައިލެންޑް ރިސޯޓެވެ. ތިލަދުންމަތި މީޑިއާއިން ރިޕޯޓުކުރާ ގޮތުގައި މިއީ މުޅިރާއްޖެއިންވެސް އެންމެ ކުޑަ ސަރވިސްޗާޖް ދެމުން އަންނަ ރިސޯޓެވެ.

މިއަތޮޅުގައި ބައެއް ރަށްތަކުގެ ސްޓޭޓަސް:

• ހދ. ނާގޯށި، މޯލްޑިވްސް ޓޫރިޒަމް ޑިވަލޮޕްމަންޓް ކޯޕަރޭޝަނަށް 2017ގައި ހަވާލުކުރެވިފައި
• ހދ. ކުޑަމުރައިދޫ، 2017އިން ފެށިގެން މިނިސްޓްރީ އޮފް ޓޫރިޒަމްގެ ބެލުމުގެ ދަށުގައި، އެއްވެސް ބަޔަކާ ހަވާލުނުކޮށް
• ހދ. ވައިކަރަމުރައިދޫ، 2003އިން ފެށިގެން ވީ.ކޭ.އެމް އިންވެސްޓްމަންޓްސް ޕވޓ ލޓޑއާއި ހަވާލުކޮށްފައި، ދަނޑުވެރިކަންކުރުމަށް
• ހދ. މުއިރި، މިނިސްޓްރީ އޮފް ޓޫރިޒަމްގެ ދަށުގައި، އެއްވެސް ބަޔަކާ ހަވާލުނުކޮށް
• ހދ. ދިއްޕަރުފުށި، 2018ވަނަ އަހަރު ސީކްރެޓް ވެންޗުއަރ ޕވޓ ލޓޑއާއި ހަވާލުކުރެވިފައި

ހދ.އަތޮޅަކީ 23،157 ރައްޔިތުންނާއި އެކު ރާއްޖޭގެ ތިންވަނައަށް އެންމެ އާބާދީ ބޮޑު އަތޮޅެވެ. އަދި ހދ. ހަނިމާދޫގައި އެއަރޕޯޓެއް ގާއިމްކުރެވިފައިވާއިރު އެންމެ ރިސޯޓަކާއި މަދު ގެންޓްހައުސްތަކަކުން މި އަތޮޅުގެ ރައްޔިތުންނަށް ފުދޭނެ ހެއްޔެވެ؟

 ހދ، ނެއްލައިދޫއިން މިދައްކުވައިދިނީ ވައުދު ނުފުއްދާ ސިޔާސީ މީހުންނަށް މަރުހަބާ ކިޔުމުގެ ލާމަސީލް ނަމޫނާއެކެވެ. ސިޔާސީ ވެރިންނަށް މަރުހަބާ ކިޔާނީ ހަމައެކަނި ބަނދަރުމައްޗަށް ނިކުމެ ނަށައި، ޖާފަތެއް ތައްޔާކޮށްގެންނެއް ނޫނެވެ.