ފާރޓިލިޓީ ސަޕޯޓް ކޮމިއުނިޓީއިން”ވޯރލްޑް ފާރޓިލިޓީ ޑޭ” އާއި ގުޅިގެން ފަންޑްރެއިޒިން ގާލާ ޑިނާއެއް ބާއްވަނީ

ފާޓިލިޓީ ސަޕޯޓް ކޮމިއުނިޓީއަކީ 2021 ވަނަ އަހަރުގެ ޖެނުއަރީމަހުގައި ދަރިމައިވުމުގައި ދިމާވާ ދަތިތަކާއި ގުޅޭގޮތުން އާންމުން ހޭލުންތެރިކޮށް، މި ކަމާއި ގުޅިގެން ދިމާވާ މައްސަލަތަކަށް ހައްލު ހޯދުމަށްޓަކައި ލިބެންހުރި ފަރުވާތަކުގެ މައުލޫމާތުދީ، އަދި ދަރިމައިވުމުގެ އުނދަގޫތައް ތަހައްމަލުކުރާ ފަރާތްތަކަށް ނަފްސާނީ އެހީތެރިކަން ފޯރުކޮށްދިނުމަށްޓަކައި އުފެއްދި ޖަމިއްޔާއެކެވެ. އާދައިގެ ގޮތަކަށް ބޭއްވުނު ޕިއަރ ޓު ޕިއަރ ސަޕޯޓް ގްރޫޕް ސެޝަންތަކަކުން ފެށިގެން، ދަރިމައިވުމުގެ ދަތިތަކާއި ގުޅުންހުރި ތަފާތު މައުޟޫތަކަށް ރާއްޖެއިންނާއި ރާއްޖެއިން ބޭރުގެ އެކިއެކި ތަޖުރިބާކާރުންގެ އެހީއާއިއެކު މައުލޫމާތު ސެޝަންތައް ހިންގި، ޖަމިއްޔާގެ ހަރަކާތްތައް އިތުރުވުމުގެ ނަތީޖާއެއްގެ ގޮތުން މިވަގުތު ޖަމިއްޔާގައި 250 އަށްވުރެ ގިނަ އެކްޓިވް މެންބަރުން ރާއްޖޭގެ އެކިކަންކޮޅުތަކުގައި އެބަތިއްބެވެ. އެއާއެކު ޖަމިއްޔާގެ ހަރަކާތްތައް ކުރިއަށްވުރެވެސް ފުޅާކޮށް, ވީހާވެސް ގިނަބަޔަކަށް ޚިދުމަތްފޯރުކޮށްދިނުމަށްޓަކައި މިދަނީ ގިނަ މަސައްކަތްތަކެއް ކުރަމުންނެވެ. 

މިގޮތުން، ކޮންމެ އަހަރަކުވެސް ބައިނަލްއަޤްވާމީ ގޮތުން ފާހަގަކުރާ “ވޯރލްޑް ފާރޓިލިޓީ ޑޭ” އާ ގުޅިގެން ރާއްޖޭގައި ފުރަތަމަ ފަހަރަށް “އަ ނައިޓް އޮފް ހޯޕް” ގެ ނަމުގައި ފަންޑްރެއިޒިން ގާލާ ޑިނާއެއް ބޭއްވުމަށް މި ޖަމިއްޔާއިންވަނީ ނިންމާފައެވެ. ދައުވަތު އެރުވިގެން ވަޑައިގަންނަވާ ހާއްސަ މެހެމާނުންނާއި އަދި އާންމުންނަށްވެސް ހުޅުވާލައިގެން ބާއްވާ މި ގާލާ ޑިނާ ކުރިއަށްދާނީ 2 ނޮވެމްބަރު 2022 ވާ ބުރާސްފަތި ދުވަހުގެ ރޭ މީރުމާ ހޯލްގައެވެ.

advertisement

މި ހަރަކާތުގެ އެންމެ ހާއްސަ ނަންބަރެއްގެ ގޮތުގައި ކުރިއަށްދާނީ ޖަމިއްޔާގެ “އައިވީއެފް ފަންޑް” ލޯންޗްކުރުމެވެ. އައިވީއެފް ފަންޑަކީ، މާލީ ދަތިތަކާއި ހެދި އިންވިޓްރޯ ފާޓިލައިޒޭޝަން (އައިވީއެފް) ގެ ޓްރީޓްމަންޓް ހެދުމުގެ ފުރުސަތު ލިބިފައިނުވާ ފަރާތްތަކަށް ހާއްސަކޮށްގެން މާލީ އެހީ ފޯރުކޮށްދިނުމަށްޓަކައި ޖަމިއްޔާއިން ހުޅުވާލާ ފަންޑެކެވެ.

ދަރިމައިވުމުގެ މައްސަލަތަކަކީ ރާއްޖޭގައި އިންތިހާއަށް ގިނަވެފައިވާ އަދި ގިނަބަޔަކު ފަރުވާ ހޯދަމުންދާ ކަމަކަށްވާއިރު، ރާއްޖޭގައި އަދި މިހާތަނަށް ދާއިމީގޮތެއްގައި މަސައްކަތްކުރައްވާ އެއްވެސް ފާޓިލިޓީ ޑޮކްޓަރެއް ނުވަތަ މިފަދަ ޚިދުމަތެއް ދެވޭނެފަދަ ފާޓިލިޓީ ސެންޓަރެއްވެސް ނެތްކަން ހިތާމައާއިއެކު މި ޖަމިއްޔާއިން ފާހަގަކުރަމެވެ. އެއާއެކު ކޮންމެ އައިވީއެފް ސައިކަލްއަކަށް 2 މަސްދުވަހަށް ރާއްޖެއިންބޭރަށް ދާން މަޖުބޫރުވެފައިވާއިރު، މި ޚިދުމަތުގެ އަގު ގާތްގަނޑަކަށް 5000 ޑޮލަރަށް އަރައެވެ.

އެހެންކަމުން މި ޖަމިއްޔާގެ އެންމެ ބޮޑު އަމާޒަކީ ދަރިމައިވުމުގެ މައްސަލަތައް ކުރިމަތިވެ، އިތުރު އެހެން އެއްވެސް ފަރުވާއަކުން ކުއްޖަކު ހޯދުމުގެ މަގު ބަންދުވެފައިވާ ފަރާތްތަކުގެ ތެރެއިން މާލީގޮތުން ދަތިކަންހުރި ފަރާތްތަކަށް މި ފަންޑްގެ އެހީގައި އައިވީއެފް ހެދުމުގެ މަގުފަހިކޮށްދިނުމެވެ.

ދަރިމައިވުމުގައި ދިމާވާ މައްސަލަތަކުގެ ވާހަކައަކީ އަދިވެސް ގިނަ ބަޔަކު ދައްކަން ފަސްޖެހޭ ވާހަކައަކަށްވާއިރު، މި ވިސްނުން ބަދަލުކޮށް، އާންމުން ހޭލުންތެރިކޮށް، އެކަށީގެންވާ ރަނގަޅު ފަރުވާ ހޯދުމަށް ހިތްވަރުދިނުމަކީ މި ޖަމިއްޔާއިން ވަރަށްބޮޑު އަހަންމިއްޔަތުކަމެއްދޭ ކަމެއްކަންވެސް މި ފުރުސަތުގައި ފާހަގަކުރަމެވެ.

ދަރިމައިވުމުގެ މައްސަލައަކީ މުޅި ދުނިޔޭގައިވެސް ކަންބޮޑުވާ މިންވަރަށް އިތުރުވަމުންދާ ބައްޔެކެވެ. ދުނިޔޭގެ ސިއްޚަތު ޖަމިއްޔާގެ ތަފާސް ހިސާބުތައް ދައްކާގޮތުން ގާތްގަނޑަކަށް 48 މިލިއަން މީހުންނާއި 186 މިލިއަން މީހުންނާއި ދެމެދުގެ އަދަދަކަށް ދަރިމައިވުމުގެ މައްސަލަތަކަށް ފަރުވާ ހޯދައެވެ.

 ފަންޑްރެއިސިން ގާލާ ޑިނާގެ ޓިކެޓު މި ލިންކުން ލިބިވަޑައިގަންނަވާނެއެވެ.

https://linktr.ee/fertilitysupportcommunity