އަގުބޮޑުކޮށް “ރާއްޖެވަންތަކަން” ވިއްކާ ރިޒޯޓުތަކުގައި ތާރުމަގުތައް ނުހަދަނީ ކީއްވެ؟

ރާއްޖޭގެ ރަށްރަށަކީ ހިތްފަސޭހަ ރަށްތަކެކެވެ. ހާއްސަކޮށް މީގެ ކުރީގައި ރަށްރަށުގައި ދުއްވާ އުޅަނދުތައް މަދުކަމުންނާއި އޭސީފަދަ ތަކެތި މަދުކަމުން ރަށުގެ ވައި ސާފެވެ. ރަށުތެރެއިން އިވޭ އަޑުތައް މަދެވެ. އަޑަކަށް އިވޭނީ ރާޅު ބިންދާލާ އަޑެވެ. ނުވަތަ ދޫނިތައް ގޮވާ އަޑެވެ. ނުވަތަ ހާލާއި ކުކުޅުގެ އަޑެވެ. ވައިރޯޅި އާއި އެކު ގަސްތައް ހެލިލާ އަޑެވެ.

ރޭގަނޑު އުޑުމަތިން ތަރިތަކާއި ހަނދު ސާފުކޮށް ފެނެއެވެ. ލައިޓް ޕޮލިއުޝަން މަދެވެ. މިއީ ރާއްޖޭގެ ރިޒޯޓުތަކުގެ މާހައުލުތައް މިހާރުވެސް ހުންނަ ގޮތެވެ. ދުނިޔޭގެ އެންމެ އަގު ބޮޑެތި މަހުޖަނުން ހިތްހަމަ ޖައްސާލަން އައިސް ރެއަކަށް ހާހުން ޑޮލަރު ހޭދަ ކުރަނީ މި ހިތްގައިމުކަމަށެވެ. 21 ވަނަ ގަރުނުގައި އެންމެ އަގުބޮޑު އެއްޗަކީ ރާއްޖޭގައި މިހުރި ފަދަ ހިތްފަސޭހަ ޗާލު ރަށްތަކެވެ.

advertisement

ދެރަ ކަމަކީ، މިރަށްތަކުގައި އަހަރެމެން ލެއްވުމުންވެސް މި ނިއުމަތް ނުފެންނާތީއެވެ. ސަރުކާރުތަކުގެ ވެރިންގެ އަމިއްލަ ކުންފުނިތަކަށް ފައިސާ ހޯދަންވެގެން ހިންގާ ހުރިހާ ޕްރޮޖެކްޓް ތަކަކީ ރަށްތައް ހަލާކު ކުރެވޭ ޕްރޮޖެކްޓްތަކެވެ. ބަނދަރު ހެދުމާއި، މަގުތަކުގައި ތާރު އެޅުމާއި ބިން ހިއްކުމަކީ ރަށްރަށުގެ ހަމަހިމޭން ކަމާއި ރަށްވަންތަކަން ގެއްލިގެންދާ ކަންތައްތަކެވެ.

އުމްރާނީ ތަރައްގީއާއި ރާއްޖެވަންތަކަން

މިފަދަ އުމްރާނީ ތަރައްގީ އަކީ އެއަށް ރައްޔިތުން ބޭނުންވާ ކަންކަން ކަމެވެ. މިސާލަކަށް، މަގުހެދުމަށް ރައްޔިތުން އެދެނީ މަގުތަކުގައި ފެން ބޮޑުވެ ހިނގައިބިނގާވެ އުޅުމަށް ނުކުޅަދާނަ ވާތީއެވެ. މަގުތަކުގައި ފެން ހެދޭ ސަބަބަކީ ބަރު އުޅަނދުފަހަރު ދުއްވުމެވެ. ސުވާލަކީ ރާއްޖޭގެ ކޮންމެ ރަށެއްގެ ކޮންމެ މަގެއްގައި މިފަދަ އުޅަނދު ދުއްވަން ޖެހޭތޯއެވެ؟ މަގުތަކަށް ތާރު އަޅަންޖެހޭ ހިސާބަށް މަގުތަކުގެ ހާލަތު ދިޔުން ހުއްޓުވުމަށްޓަކައި ޕޮލިސީ ލެވެލް އިން ކުރެވެން ހުރި ކަންކަން އެބަހުއްޓެވެ.

މިސާލަކަށް، ކަނޑައެޅޭ ވަކި މަގުތަކެއްގައި ނޫނީ ވެހިކަލް ނުދުއްވޭ ގޮތް ހެދުމެވެ. ނުވަތަ ބަގީ އާއި ބައިސިކަލު ނޫން ވެހިކަލްތައް އެކީ މަނާ ކުރުމަށް ފަހު ޒަރޫރީ ބޭނުމަށް ބޭނުންވާ ވެހިކަލްތަކަށް އެކަނި ހުއްދަ ދިނުމަކީ ވެސް ކުރެވިދާނެ ކަމެކެވެ.

ރިޒޯޓުތަކަކީ ރާއްޖޭގެ އެވްރެޖު ރަށެއްގެ އާބާދީ އާއި އެއްވަރުގެ އާބާދީއެއް ދިރިއުޅޭ ރަށްތަކެކެވެ. މިފަދަ 170 ވަރަކަށް ރިޒޯޓު މިވަގުތު ހިންގަމުން އެބަ އާދެއެވެ. ގެސްޓުންނާއި މުވައްޒަފުންނާއި އެކު ޖުމުލަ އާބާދީ ރަށެއްގެ އާބާދީ އާއި އެއްވަރު ނުވާ ރިޒޯޓެއް ނެތެވެ. އެ އެންމެވެސް ތިބެނީ ކައިގެންނެވެ. ނިދައިގެންނެވެ. އެ ރިޒޯޓުތަކަށް ރާއްޖޭގެ ރަށަކަށް ނާރުވާ ވަރަށް ކާނާގެ ބާވަތްތައް އަރުވައެވެ. ދޯނިފަހަރު އައިސް ގޮސްވެއެވެ. މީހުން މަގުތަކުގައި ހިނގާ ބިނގާވެ އެއްތަނުން އަނެއް ތަނަށް ދެއެވެ. ނަމަވެސް ކާރުތަކެއް ނުހުރެއެވެ. މަގުތަކުގައި ތާރައެއް ނޯވެއެވެ. ބަނދަރުތަކެއް ނުހުރެއެވެ. ސަބަބަކީ ރިޒޯޓުތަކަށް އަންނަ ގެސްޓުން ގަންނަން ބޭނުންވާ ހިތްފަސޭހަކަން ވިއްކެން އޮތީ މިގޮތަށް ރަށް ބެލެހެއްޓުމުން ކަމުގައި ވާތީއެވެ. އަޑު މަޑު، ގަސްގިނަ، ހިޔާ ބޮޑު މަގުތައް އެއީ އަގުހުރި ތަނެކެވެ.

އަހަރެމެންގެ ރަށްތަކަކީ ރިޒޯޓުތައް ފަދައިން އެ ހިތްގައިމުކަން މަތީ ދެމެހެއްޓޭނެ ތަންތަނެވެ. ނަމަވެސް ތަރައްގީ އަކީ މިފަދަ އުމްރާނީ ޕްރޮޖެކްޓުތައް ކަމަށް ދެއްކުމުން، މިނޫން ގޮތެއް އޮތްތޯ ބެލުމަށް ބޭނުންވާ ބަޔަކު ނެތެވެ. ނުވާނެ އޭ ހީވިއަސް، މިހާރުވެސް ރާއްޖޭގައި މިކަން ކުރަމުން އަންނަ ދެތިން ރަށް ވެއެވެ. އަގުބޮޑު ރީތި އެއްޗަކީ ގުދުރަތީ ރީތިކަމެވެ. އެއީ ހަލާކުނުކޮށް ދެމެހެއްޓެން އޮތް ރީތިކަމެއް ކަމީ ޔަގީންކަމެކެވެ