ޖިންސީ އަނިޔާގެ ސަބަބުން ލިބޭ މާލީ އަދި ނަފްސާނީ އަނިޔާގެ ބަދަލު މިހާރު ކޯޓުން ނަގައިދޭ!

ޖިންސީ ކުށުގެ މައްސަލަތަކާއި ގުޅިގެން އަނިޔާ ލިބުނު ފަރާތަށް ބަދަލު ނަގައިދެވޭނެ އުސޫލު ގާނޫނު ހަދާ މަޖިލީހުން ކަނޑައަޅައިފިއެވެ.

މި އުސޫލުތައް ބަޔާންކޮށްފައިވަނީ 6 ނޮވެމްބަރު ގައި ގެޒެޓުކޮށްފައިވާ “ޖިންސީ ކުށުގެ މައްސަލަތަކާއި ގުޅޭ ޝަރީއަތް ކުރުމާބެހޭ ގަވާއިދު” ގައެވެ. މި ގަވާއިދުގެ ދަށުން، ޖިންސީ ކުށަކާއި ގުޅިގެން ދައުވާ ކުރާ ފަރާތަށް އެމީހަކަށް ލިބިފައިވާ ނަފްސާނީ ގެއްލުމަށާއި، މާލީ ގެއްލުމުގެ ބަދަލު ހޯދުމަށް އެދެވޭނެއެވެ.

advertisement

މިގޮތުން ލިބުނު އަނިޔާ އަށް ފަރުވާ ހޯދުމަށް ކުރި ހަރަދާއި، ކުރިމަތިވި ނަފްސާނީ އަނިޔާގެ ބަދަލުވެސް ކޯޓުން ނަގައިދޭނެ އުސޫލު މިގަވާއިދުގައި ބަޔާންކޮށްފައިވެއެވެ.

މި ގަވާއިދުގެ ދަށުން، ހަށިގަނޑުގެ އެކި ގުނަވަންތަކަށް ލިބޭ ޖިސްމާނީ އަނިޔާ އާއި، ނަފްސާނީ އަނިޔާ ގިންތިކޮށް، އެކި މިންވަރުގެ އަނިޔާ ތަކަށް ބަދަލުގެ ގޮތުގައި ނަގައިދެވޭނެ ފައިސާގެ މިންވަރު ކަނޑައަޅާފައިވެއެވެ. ޖިންސީ އަނިޔާގެ މައްސަލަ ކޯޓަށް ހުށައަޅާތާ 6 މަސް ދުވަހުގެ ތެރޭގައި މައްސަލަ އާއި މެދު ވަކި ގޮތެއް ކޯޓުން ނިންމަން ޖެހެއެވެ. ބަދަލުގެ ގޮތުގައި ނަގައިދެވޭ ފައިސާގެ ތަފްސީލު މި ލިންކުގައި ގެޒެޓުގައި ވަނީ ބަޔާންކޮށްފައި އެވެ.