އެއްވެސް ރީޖަނަލް ހޮސްޕިޓަލަކުން ނަފްސާނީ ބަލިތަކަށް ލިބެންޖެހޭ ތެރަޕީ ނުލިބޭ

ނަފްސާނީ ދުޅަހެޔޮކަމާއި ގުޅޭ ގައުމީ ކެމްޕެއިން “ކިހިނެއް؟” ފަށްޓަވަމުން ރައީސް އިބްރާހިމް މުހައްމަދު ސާލިހު އާއި ހެލްތް މިނިސްޓަރ ނަސީމު ވަނީ ނަފްސާނީ ދުޅަހެޔޮކަމާއި ގުޅޭ ގޮތުން އެކި ވާހަކަތައް ދައްކަވާފައެވެ. ރައީސް ވިދާޅުވެފައިވަނީ ނަފްސާނީ ބަލީގެ ކުރީ ކޮޅު ބަލި ދެނެގަނެވި ފަރުވާ ފެށުމަކީ މުހިންމު ކަމެއް ކަމަށެވެ. ނަސީމް ވިދާޅުވެފައިވަނީ ރާއްޖޭގެ ހުރިހާ ސަރަހައްދަކުން މިހާރު ނަފްސާނީ ބަލިތަކަށް ފަރުވާ ލިބޭނެ ގޮތް ހަމަޖައްސާފައިވާ ކަމަށެވެ.

ސައިކޭޓްރިސްޓުންނާއި ތެރަޕިސްޓުންގެ ފަރަގު

ރާއްޖޭގެ އެކި ސަރަހައްދުތަކުގައި ގާއިމުކޮށްފައިވާ ރީޖަނަލް ހޮސްޕިޓަލް ތަކުގައި ސައިކޭޓްރިސްޓަކު ނުވަތަ ނަފްސާނީ ބަލިތަކުގެ ފަރުވާ ދޭ ޑޮކްޓަރެއް ހުރެއެވެ. ނަމަވެސް މިއިން އެއްވެސް ހޮސްޕިޓަލެއްގައި ކައުންސެލިން ނުވަތަ ތެރަޕީ ދޭނެ ސައިކޮލޮޖިސްޓެއް ނެތެވެ.

advertisement

މާނަ އަކީ އެސަރަހައްދުތަކުގައި ދިރިއުޅޭ މީހުންނަށް އަދިވެސް ނަފްސާނީ ބަލިތަކުގެ ފަރުވާ ފުރިހަމައަށް ނުލިބޭކަމެވެ. ސައިކޭޓްރިސްޓުންނަކީ ހަމަ އެކަނި ބަލި ދަނެގަނެ ބައްޔަށް ބޭސް ލިޔެދޭ މީހުންނެވެ. ބަލީގެ ބޭހުގެ ބަދަލުގައި އަދި ބޭހާއި އެކުވެސް ތެރަޕީ ހޯދުމަށް ޑޮކްޓަރުން ހުރިހާ ބަލި މީހުންނަށް ވެސް ލަފާދޭނެއެވެ.

ނަފްސާނީ ބަލިތަކަކީ ތެރަޕީ ބޭނުންވާ ބަލިތަކެކެވެ. އެހެން ކަމުން އައްޑޫ އިން ފެށިގެން ތުރާކުނާއި ހަމައަށް ތިބި އާއްމުންނަށް އަދިވެސް އޮތީ ތެރަޕީ ހޯދަން މާލެ ދިޔުމެވެ. މާލެއިން ތެރަޕީ ހޯދުމަކީ ވަކި ފަސޭހަ ކަމެއް ނޫނެވެ. ސިއްހީ ނިޒާމަށް ނުކަތާ ވަރަށް ބަލި މީހުން ގިނަވުމުގެ ސަބަބުން އައިޖީއެމް އެޗް އިން ތެރަޕީ ހޯދުމަކީ ވޭނެކެވެ.

ކިއުގައި މަސްތަކެއް މަޑުކޮށްގެން ނޫނީ ތެރަޕީ ނުލިބެއެވެ. އަމިއްލަ ކްލިނިކް ތަކުން ތެރަޕީ ލިބެނީ ފިސާރި ބޮޑު އަގުގައެވެ. ސެޝަނެއްގެ އަގު އުޅެނީ ގަޑިއިރަކަށް 500 އާއި 700 އާއި ދެމެދުގެ އަގުތަކުގައެވެ. މާލެ ދިޔުމުގެ ދަތުރު ފައިސާ އާއި މާލޭގައި ހުރުމާއި ކެއުމުގެ ހަރަދާއި އެކު ބަލާނަމަ ތެރަޕީ ލިބޭ އިރު މީހާ ހުންނާނީ ދަރަނިވެރިވެ ނަފްސާނީގޮތުން އިތުރަށް މާޔޫސްވެ ހާސްވެފައެވެ.

ރާއްޖެތެރޭ ރީޖަނަލް ހޮސްޕިޓަލްތަކުގެ ހާލަތު

• ލ. ގަމު ރީޖަނަލް ހޮސްޕިޓަލް – ސައިކޭޓްރިސްޓެއް ހުރޭ – ތެރަޕިސްޓެއް ނުހުރޭ
• އައްޑޫ ހޮސްޕިޓަލުގައި ސައިކޭޓްރިސްޓެއް ހުރޭ – ތެރަޕިސްޓެއް ނުހުރޭ
• ހދ. ކުޅުދުއްފުށީ ރީޖަނަލް ހޮސްޕިޓަލް – ސައިކޭޓްރިސްޓެއް ހުރޭ – ތެރަޕިސްޓެއް ނުހުރޭ
• ރ. އުނގޫފާރު ހޮސްޕިޓަލް – ސައިކޭޓްރިސްޓެއް ހުރޭ – ތެރަޕިސްޓެއް ނުހުރޭ
• މ. މުލީ ރީޖަނަލް ހޮސްޕިޓަލުގައި ސައިކޭޓްރިސްޓެއް ނުހުރޭ – ތެރަޕިސްޓެއް ނުހުރޭ
• ފ. އަތޮޅު ހޮސްޕިޓަލުގައި – ސައިކޭޓްރިސްޓެއް ނުހުރޭ – ތެރަޕިސްޓެއް ނުހުރޭ

ނަފްސާނީ މައްސަލަތަކުގެ އަސްލަކީ ފަގީރުކަމާއި ތޮއްޖެހުން

ސިޔާސީ ފަރާތްތަކުން މަތި އޮމާންކޮށް ވާހަކަ ދެއްކި ނަމަވެސް ކަމުގެ ހަގީގަތް ބަލާއިރު އަބަދުވެސް ފެންނަނީ ދިމާ އިދިކޮޅަށެވެ. ހަގީގަތަކީ ރާއްޖޭގެ ކޮންމެ 5 މީހަކުން އެކަކު މާޔޫސް ބައްޔަށް ހުށައެޅެން ޖެހުނު ސަބަބުތަކުގެ ތެރޭގައި، ރައީސް ބުނެފައިވާ ފަދައިން ތޮއްޖެހުމާއި ފަގީރުކަން ހިމެނޭ ކަމެވެ.

ނަމަވެސް މި ކަންކަން ނައްތާލުމަށް އެދެވޭ މަސައްކަތްތަކެއް ކުރެވޭ ތަނެއް ނުފެނެއެވެ. މާލޭ ސަރަހައްދުގައި ކުދިން ބޮޑެތި ވަނީ އެކަނި މާ އެކަނި ގޭގައި ތިބެއެވެ. މައިންބަފައިން އުޅެން ޖެހެނީ ކުލި ދައްކަން ދެތިން ވަޒީފާ އަދާކުރުމުގައެވެ. އަތްމަތި ދަތި ކަމާއި ނުތަނަވަސް ކަމުގެ ސަބަބުން ނުވަތަ ވަގުތުގެ ދަތިކަމުން މީހުންގެ ދިރިއުޅުމުގެ ވަށްޓަފާޅި ބަދަލުވެ ޖިސްމާނީ ގޮތުން ވެސް ގިނަ ބަލިތަކާއި ކުރިމަތިލަމުން އަންނަ އިރު ނަފްސާނީ ބަލިތައް އަންނަނީ ކަންބޮޑުވާ މިންވަރަށް ގިނަވަމުންނެވެ.

ކުޑަކުދިންނާއި ޒުވާނުންނާއި އުމުރުން ދުވަސްވީ މީހުންގެ ތެރޭގައިވެސް މިބަލި ވަރަށް ގިނައެވެ. ހަމަ މިއާއި އެކު ޑްރަގްގެ ޝިކާރައަކަށް ވާ ކުޑަކުދިންނާއި ޒުވާނުން އަންނަނީ ގިނަވަމުންނެވެ. މިކަމަށްޓަކައި އެކަށީގެންވާ ބަޖެޓެއް ދައުލަތުން އެ ދާއިރާތަކަށް ކަނޑައަޅާފައި ނުވެއެވެ.

ރައްޔިތުންގެ އާމަދަނީ އިތުރުވެ ދުޅަހެޔޮ ދިރިއުޅުމެއް އުޅުމަށް އޮތް މަގު މިހާރު ވަކިން މިވަނީ ހަނިވެފައެވެ. “ކިހިނެއް؟” ކެމްޕެއިން އިން މިކަން ހައްލުކުރާނީ ކިހިނެއް ހެއްޔެވެ؟